Kolkata Airport Bankra Masjid / ୧୩୬ ବର୍ଷ ପୁରୁଣା ବାଙ୍କାରା ମସଜିଦରେ ନମାଜ ଉପରେ ଲାଗିଲା ନିଷେଧାଦେଶ

kolkata bankra masjid entry ban: କୋଲକାତା ବିମାନବନ୍ଦର ପରିସରରେ ଅବସ୍ଥିତ ୧୩୬ ବର୍ଷ ପୁରୁଣା ବାଙ୍କାରା ମସଜିଦରେ ପ୍ରବେଶକୁ ନେଇ ଜାରି ହୋଇଛି ନିଷେଧାଦେଶ। ଏପରିକି ଏହି ମସଜିଦରେ ନମାଜ ପଢିବା ଉପରେ ମଧ୍ୟ ପ୍ରତିବନ୍ଧକ ଲଗାଯାଇଛି। କୋଲକାତା ବିମାନବନ୍ଦରରେ ରନୱେ ସମ୍ପ୍ରସାରଣ ପାଇଁ ସ୍ଥାନାନ୍ତର ପ୍ରକ୍ରିୟା ଆରମ୍ଭ ହୋଇଯାଇଛି। ଯେଉଁଥିପାଇଁ ଏହି ମସଜିଦରେ ପ୍ରବେଶ କରିବା ଉପରେ ରୋକ ଲଗାଯାଇଛି। ପ୍ରାୟ ୧୩୬ ବର୍ଷ ପୁରୁଣା ଗୌରୀପୁର ଜାମା ମସଜିଦ, ଯାହାକୁ ବାଙ୍କାରା ମସଜିଦ ମଧ୍ୟ କୁହାଯାଏ, ତାହା କୋଲକାତା ସ୍ଥିତ ନେତାଜୀ ସୁଭାଷ ଚନ୍ଦ୍ର ବୋଷ ଅନ୍ତର୍ଜାତୀୟ ବିମାନବନ୍ଦର ପରିସରରେ ଅବସ୍ଥିତ। ଏହି ମସଜିଦକୁ ଅନ୍ୟତ୍ର ସ୍ଥାନାନ୍ତର କରିବାକୁ ନେଇ ବହୁ ଦିନ ଧରି ଆଲୋଚନା ଚାଲିଛି। ଏହି ପ୍ରକ୍ରିୟା ଏବେ ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀଙ୍କ ନେତୃତ୍ୱାଧିନ ସରକାରଙ୍କ ଅଧିନରେ ଆରମ୍ଭ ହୋଇଯାଇଛି।

ବାଙ୍କାରା ମସଜିଦ ସମ୍ପର୍କରେ ପ୍ରତିକ୍ରିୟା ରଖି ପଶ୍ଚିମବଙ୍ଗ ସରକାରଙ୍କ ମନ୍ତ୍ରୀ ଦିଲୀପ ଘୋଷ କହିଛନ୍ତି, "ମସଜିଦ ଯେଉଁଠାରେ ଥିଲା ସେଠାରେ ରହିବାର କୌଣସି ଯଥାର୍ଥତା ନଥିଲା। ଏହାକୁ ଜାଣିଶୁଣି ରନୱେ ଅଞ୍ଚଳରେ ରହିବାକୁ ଦିଆଯାଇଥିଲା। ବର୍ତ୍ତମାନ ସେଠାରେ ନମାଜ ପଢିବା ମଧ୍ୟ ବନ୍ଦ କରାଯାଇଛି।" ମୁଁ ଆଶା କରୁଛି ସେମାନେ ଏହାକୁ ଖାଲି କରିଦେବେ। ଯାହା ଦ୍ୱାରା ବିମାନବନ୍ଦରର ରନୱେ ସମ୍ପ୍ରସାରଣ କାର୍ଯ୍ୟ ସୁରୁଖୁରୁରେ ଆଗେଇ ପାରିବ।"

ଅଧିକାରୀ କହିଥିଲେ ଯେ ଗୌରୀପୁର ଜାମେ ମସଜିଦକୁ ଯାଉଥିବା ରାସ୍ତା ବର୍ଷା ଯୋଗୁଁ କ୍ଷତିଗ୍ରସ୍ତ ହୋଇଥିବାରୁ ଏବଂ ତୁରନ୍ତ ମରାମତି ଆବଶ୍ୟକ କରୁଥିବାରୁ ସେଠାରେ ପ୍ରବେଶ ୨ ଦିନ ପାଇଁ ବନ୍ଦ ରହିବ। ଯଦି ମରାମତି କାର୍ଯ୍ୟ ସମୟ ମଧ୍ୟରେ ସମାପ୍ତ ହୋଇଯାଏ, ତାହେଲେ ନମାଜ ପଢିବାକୁ ଅନୁମତି ଦିଆଯିବ।

ଏହା ସହ ପଢନ୍ତୁ: ବଙ୍ଗରେ ବଦଳିଲା ସରକାର; ବଦଳିଗଲା ୧୦୭ ବର୍ଷର ଇତିହାସ

ଜାତୀୟ ସୁରକ୍ଷା ସର୍ବୋପରି: ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀ
ଗତକାଲି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀ, ରାଜଧାନୀ କୋଲକାତା ବିମାନବନ୍ଦର ପରିସରରେ ଅବସ୍ଥିତ ବାଙ୍କାରା ମସଜିଦରେ ନମାଜ ପଢିବାକୁ ନେଇ ଜାରି ହୋଇଥିବା ନିଷେଧାଦେଶ ଉପରେ ପ୍ରତିକ୍ରିୟା ରଖିଛନ୍ତି। ଏନେଇ ମୁଖ୍ୟମନ୍ତ୍ରୀ କହିଛନ୍ତି ଯେ ଜାତୀୟ ସୁରକ୍ଷା ହେଉଛି ସର୍ବୋପରି। ଗୁରୁତ୍ୱପୂର୍ଣ୍ଣ ରଣନୈତିକ ଗୁରୁତ୍ୱ ବହନ କରୁଥିବା ଏହି ବିମାନବନ୍ଦରର ଫାଟକକୁ ବାହାର ଲୋକଙ୍କ ପାଇଁ ଖୋଲା ରଖାଯାଇ ପାରିବ ନାହିଁ।

ପୂର୍ବ ମେଦିନୀପୁର ଜିଲ୍ଲାର ତମଲୁକ ଠାରେ ଏକ ଦଳୀୟ ବୈଠକ ପରେ ଗଣମାଧ୍ୟମରେ ପ୍ରତିକ୍ରିୟା ରଖି ମୁଖ୍ୟମନ୍ତ୍ରୀ କହିଥିଲେ, "ଜାତୀୟ ସୁରକ୍ଷା ଏବଂ ବିମାନବନ୍ଦର ସୁରକ୍ଷାକୁ ଅନ୍ୟ ସବୁକିଛି ଅପେକ୍ଷା ପ୍ରଥମେ ପ୍ରାଥମିକତା ଦିଆଯିବ। ମୁଖ୍ୟମନ୍ତ୍ରୀ ଭାବରେ ମୁଁ ଆଉ କୌଣସି ମନ୍ତବ୍ୟ ଦେବି ନାହିଁ। କୋଲକାତା ଅନ୍ତର୍ଜାତୀୟ ବିମାନବନ୍ଦରର ସ୍ଥାନ ଅତ୍ୟନ୍ତ ସମ୍ବେଦନଶୀଳ। କାରଣ ଏହା ଚୀନ୍ ଏବଂ ବାଂଲାଦେଶ ଉଭୟ ପଡୋଶୀ ଦେଶର ନିକଟତର। ଏହାର ଫାଟକ ବାହାର ଲୋକଙ୍କ ପାଇଁ ବନ୍ଦ କରାଯିବା ଉଚିତ।" ଧାର୍ମିକ ଉଦ୍ଦେଶ୍ୟରେ ଏହାକୁ ଖୋଲା ରଖାଯାଇ ପାରିବ ନାହିଁ।

ଆମେ କାହାକୁ ନିଜର ଧର୍ମ ପାଳନ କରିବାରୁ ବାରଣ କରୁନାହୁଁ
ସେ ଆହୁରି କହିଛନ୍ତି, "ଆମେ କାହାକୁ ନିଜର ଧର୍ମ ପାଳନ କରିବାରୁ ବାରଣ କରିନାହିଁ। ଯେପରି ବିରୋଧି ଦାବି କରୁଛନ୍ତି। ବକ୍ରୀଇଦ ଅବସରରେ ପଶୁ ହତ୍ୟା ଆଇନ ପାଳନ କରାଯାଇଥିଲା ଏବଂ ଅସ୍ତ୍ର ପ୍ରଦର୍ଶନ ବିନା ମୁହରମ୍ ପାଳନ କରାଯାଇଥିଲା। ଏହାକୁ ନେଇ କୌଣସି ସମସ୍ୟା ନଥିଲା। ଆଇନ ପାଳନ କରନ୍ତୁ ଏବଂ ଭଲ ନାଗରିକ ପରି ବ୍ୟବହାର କରନ୍ତୁ। ନିଜ ଧର୍ମକୁ ଏକ ବ୍ୟକ୍ତିଗତ ବିଷୟ ଭାବରେ ପାଳନ କରନ୍ତୁ ଏବଂ ଅନ୍ୟମାନଙ୍କୁ ପ୍ରଭାବିତ କରିବାକୁ ଚେଷ୍ଟା କରନ୍ତୁ ନାହିଁ। ତାହେଲେ ଯାଇ ସବୁକିଛି ସୁରୁଖୁରୁରେ ଚାଲିବ।