LK Advani Discharged / ହସ୍ପିଟାଲରୁ ଡିସଚାର୍ଜ ହେଲେ ବରିଷ୍ଠ ବିଜେପି ନେତା ଲାଲକୃଷ୍ଣ ଆଡଭାନୀ

ନୂଆଦିଲ୍ଲୀ: ସୁସ୍ଥ ହୋଇ ହସ୍ପିଟାଲରୁ ଡିସଚାର୍ଜ ହେଲେ ବରିଷ୍ଠ ବିଜେପି ନେତା ଲାଲକୃଷ୍ଣ ଆଡଭାନୀ । ଛାତିରେ ସଂକ୍ରମଣ କାରଣରୁ ଗତ ୧୬ ତାରିଖରେ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା । ତେବେ ସ୍ବାସ୍ଥ୍ୟାବସ୍ଥାରେ ଉନ୍ନତି ଆସିବା ପରେ ୯୮ ବର୍ଷୀୟ ଆଡଭାନୀଙ୍କୁ ଡିସଚାର୍ଜ କରାଯାଇଥିବା ତାଙ୍କୁ ଚିକିତ୍ସା କରୁଥିବା ଡାକ୍ତର ସୂଚନା ଦେଇଛନ୍ତି । ବରିଷ୍ଠ ସ୍ନାୟୁରୋଗ ବିଶେଷଜ୍ଞ ଡ. ଭିନୀତ ସୁରୀ ତାଙ୍କର ଚିକିତ୍ସା କରୁଥିଲେ ।

ପୂର୍ବତନ ଉପପ୍ରଧାନମନ୍ତ୍ରୀ ଲାଲକୃଷ୍ଣ ଆଡଭାନୀ ଅକ୍ଟୋବର ୧୬ ତାରିଖରେ ଛାତିରେ ଯନ୍ତ୍ରଣା ଅନୁଭବ କରିଥିଲେ । ଏହାପରେ ତାଙ୍କୁ ରାତି ୭.୩୦ଟାରେ ନୂଆଦିଲ୍ଲୀ ସ୍ଥିତ ଏକ ଘରୋଇ ହସ୍ପିଟାଲରେ ପଲମୋନାରୀ ବିଭାଗ (ଫୁସଫୁସ ସମ୍ବନ୍ଧୀୟ ଚିକିତ୍ସା ବିଭାଗ)ରେ ଭର୍ତ୍ତି କରାଯାଇଥିଲା । ଏହାପରେ ଶନିବାର କେନ୍ଦ୍ର ସ୍ଵାସ୍ଥ୍ୟମନ୍ତ୍ରୀ ଜେପି ନଡ୍ଡା ତାଙ୍କୁ ହସ୍ପିଟାଲରେ ଭେଟି ସ୍ଵାସ୍ଥ୍ୟାବସ୍ଥା ପଚାରି ବୁଝିଥିଲେ । ତେବେ ଏହା ପ୍ରଥମ ଥର ନୁହେଁ ଯେ ଯେତେବେଳେ ବରିଷ୍ଠ ବିଜେପି ନେତା ଆଡଭାନୀ ହସ୍ପିଟାଲରେ ଭର୍ତ୍ତି ହୋଇଛନ୍ତି । ଏହାପୂର୍ବରୁ ଚଳିତ ବର୍ଷ ମେ ମାସରେ ସେ ବାର୍ଦ୍ଧକ୍ୟ ଜନିତ ସମସ୍ୟା ଯୋଗୁଁ ହସ୍ପିଟାଲରେ ଚିକିତ୍ସିତ ହୋଇଥିଲେ । ଏହାପରେ ସେ କିଛି ଦିନ ଡାକ୍ତରଙ୍କ ନିରୀକ୍ଷଣରେ ରହିବା ପରେ ହସ୍ପିଟାଲରୁ ଡିସଚାର୍ଜ ହୋଇଥିଲେ ।

ସେହିପରି ଡିସେମ୍ବର ୨୦୨୪ରେ, ଅସୁସ୍ଥତା ଯୋଗୁଁ ଆଡଭାନୀ ଆଇସିୟୁରେ ଭର୍ତ୍ତି ହୋଇଥିଲେ । ତାଙ୍କୁ ସ୍ନାୟୁ ବିଶେଷଜ୍ଞମାନେ ଚିକିତ୍ସା କରିଥିଲେ । ସ୍ଵାସ୍ଥ୍ୟାବସ୍ଥା ସ୍ଥିର ହେବାପରେ ତାଙ୍କୁ ଡିସଚାର୍ଜ କରାଯାଇଥିଲା । ଆଡଭାନୀ ୧୯୨୭ ମସିହା ନଭେମ୍ବର ୮ ତାରିଖରେ କରାଚୀ (ବର୍ତ୍ତମାନ ପାକିସ୍ତାନରେ ଅବସ୍ଥିତ)ରେ ଜନ୍ମଗ୍ରହଣ କରିଥିଲେ । ଭାରତୀୟ ଜନତା ପାର୍ଟିର ଜଣେ ପ୍ରମୁଖ ନେତା ହେଉଛନ୍ତି ଆଡଭାନୀ । ବିଜେପିକୁ ଏକ ଛୋଟ ଦଳରୁ ଦେଶର ପ୍ରମୁଖ ଜାତୀୟ ରାଜନୈତିକ ଦଳ ଭାବେ ଗଢି ତୋଳିବାରେ ଆଡଭାନୀଙ୍କ ବଡ଼ ଭୂମିକା ରହିଛି ।

ପଢନ୍ତୁ ଏହି ଖବର: ଛାତିରେ ସଂକ୍ରମଣ; ମେଡିକାଲରେ ଭର୍ତ୍ତି ହେଲେ ବରିଷ୍ଠ ବିଜେପି ନେତା ଲାଲକୃଷ୍ଣ ଆଡଭାନୀ

• ବିଜେପିର ପ୍ରମୁଖ ନେତା ଆଡଭାନୀ

ଆଡଭାନୀ ଅନେକ ଥର ବିଜେପି ସଭାପତି ଭାବରେ କାର୍ଯ୍ୟ କରିଛନ୍ତି ଏବଂ ଦେଶବ୍ୟାପୀ ଦଳର ସାଂଗଠନିକ ଭିତ୍ତିଭୂମିକୁ ମଜଭୁତ କରିବାରେ ତାଙ୍କର ଗୁରୁତ୍ୱପୂର୍ଣ୍ଣ ଭୂମିକା ରହିଛି । ୧୯୯୦ ମସିହାରେ ତାଙ୍କର ଦେଶବ୍ୟାପୀ ରାମ ରଥଯାତ୍ରା ଭାରତୀୟ ରାଜନୀତିରେ ଏକ ଗୁରୁତ୍ୱପୂର୍ଣ୍ଣ ମୋଡ଼ ନେଇଥିଲା ଏବଂ ବିଜେପିକୁ ବିସ୍ତାର କରିବାରେ ସାହାଯ୍ୟ କରିଥିଲା । ସେ ତତ୍କାଳୀନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀଙ୍କ ନେତୃତ୍ୱାଧୀନ ସରକାରରେ ୨୦୦୨ରୁ ୨୦୦୪ ପର୍ଯ୍ୟନ୍ତ ଭାରତର ଉପପ୍ରଧାନମନ୍ତ୍ରୀ ଭାବରେ କାର୍ଯ୍ୟ କରିଛନ୍ତି ।

• ଅନେକ ଗୁରୁତ୍ଵପୂର୍ଣ୍ଣ ଦାୟିତ୍ଵ ସମ୍ଭାଳିଛନ୍ତି

ସେ ତାଙ୍କ ରାଜନୈତିକ ଜୀବନରେ ଗୃହ ବିଭାଗ ସମେତ ଅନେକ ଗୁରୁତ୍ୱପୂର୍ଣ୍ଣ ଦାୟିତ୍ୱ ମଧ୍ୟ ତୁଲାଇଛନ୍ତି । ସାର୍ବଜନୀନ ଜୀବନରେ ତାଙ୍କ ଅବଦାନକୁ ସ୍ୱୀକୃତି ଦେଇ ଆଡଭାନୀଙ୍କୁ ୨୦୨୪ ମସିହାରେ ଭାରତର ସର୍ବୋଚ୍ଚ ନାଗରିକ ପୁରସ୍କାର ଭାରତ ରତ୍ନ ପ୍ରଦାନ କରାଯାଇଥିଲା । ପୂର୍ବରୁ ତାଙ୍କୁ ୨୦୧୫ ମସିହାରେ ପଦ୍ମ ବିଭୂଷଣ ପ୍ରଦାନ କରାଯାଇଥିଲା । ଆଡଭାନୀ ବିଜେପିର ଜଣେ ବରିଷ୍ଠ ବ୍ୟକ୍ତି ଏବଂ ଦଳର ରାଜନୈତିକ ଇତିହାସର ଏକ ପ୍ରମୁଖ ଅଂଶ ହୋଇ ରହିଛନ୍ତି ।