LK Advani / ଛାତିରେ ସଂକ୍ରମଣ; ମେଡିକାଲରେ ଭର୍ତ୍ତି ହେଲେ ବରିଷ୍ଠ ବିଜେପି ନେତା ଲାଲକୃଷ୍ଣ ଆଡଭାନୀ

ନୂଆଦିଲ୍ଲୀ: ବିଜେପିର ବରିଷ୍ଠ ନେତା ତଥା ପୂର୍ବତନ ଉପପ୍ରଧାନମନ୍ତ୍ରୀ ଲାଲକୃଷ୍ଣ ଆଡଭାନୀ ଅସୁସ୍ଥ । ଛାତିରେ ସଂକ୍ରମଣ ପାଇଁ ଆଡଭାନୀଙ୍କୁ ଦିଲ୍ଲୀର ଏକ ଘରୋଇ ହସ୍ପିଟାଲ୍‌ରେ ଭର୍ତ୍ତି କରାଯାଇଛି । ୯୮ ବର୍ଷୀୟ ଆଡଭାନୀଙ୍କୁ ଶୁକ୍ରବାର ସନ୍ଧ୍ୟା ସାଢ଼େ ୭ଟାରେ ମେଡିକାଲ୍ ନିଆଯାଇଥିବା ବେଳେ ଏବେ ତାଙ୍କର ସ୍ଵାସ୍ଥ୍ୟାବସ୍ଥା ସ୍ଥିର ରହିଛି । ପଲ୍ମୋନରି ବିଭାଗରେ ଆଡଭାନୀଙ୍କ ଚିକିତ୍ସା ଚାଲିଛି ।

ନିକଟରେ ଭେଟିଥିଲେ ପ୍ରଧାନମନ୍ତ୍ରୀ

ବରିଷ୍ଠ ନେତା ଲାଲକୃଷ୍ଣ ଆଡଭାନୀଙ୍କୁ ମେଡିକାଲ୍‌ରେ ଭର୍ତ୍ତି କରିବାର ସପ୍ତାହକ ପୂର୍ବରୁ ଅକ୍ଟୋବର ୭ ତାରିଖରେ ଭେଟିଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଆଡଭାନୀଙ୍କ ଦିଲ୍ଲୀସ୍ଥିତ ବାସଭବନକୁ ଯାଇ ପ୍ରଧାନମନ୍ତ୍ରୀ ମୋଦି ଭେଟି ଆଲୋଚନା କରିଥିଲେ । ସରକାରରେ ମୁଖ୍ୟ ରହି ୨୫ ବର୍ଷ ପୂରଣ ଅବସରରେ ମୋଦିଙ୍କୁ ଆଶୀର୍ବାଦ କରିଥିଲେ ଲାଲକୃଷ୍ଣ ଆଡଭାନୀ ।

ଏଥିସହ ପଢ଼ନ୍ତୁ: ମହାଭାରତ ପରେ ଏବେ ସାବିତ୍ରୀଙ୍କ ସତୀତ୍ଵ କଥା କହିଲେ ଜଜ୍; ଚର୍ଚ୍ଚାରେ ଦୁଇ ଦୁଇଟି ଜଘନ୍ୟ କାଣ୍ଡ 

Met Advani Ji at his residence and sought his blessings. His decades of public service and contribution to our national life have left a lasting imprint. He has played a pivotal role in strengthening India's progress. https://t.co/ib51lx4CkU

— Narendra Modi (@narendramodi) October 7, 2026

ଏନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସୋସିଆଲ୍ ମିଡିଆ ଏକ୍ସରେ ସୂଚନା ଦେଇଥିଲେ । ଲେଖିଥିଲେ, "ଆଡଭାନୀ ଜୀ ଦଶନ୍ଧିରୁ ଅଧିକ ସମୟ ଧରି ସାର୍ବଜନୀନ ଜୀବନ ଓ ରାଷ୍ଟ୍ର ପାଇଁ ଯୋଗ ଦାନ ଦେଇ ନିଆରା ଛାପ ଛାଡ଼ିଛନ୍ତି । ଭାରତର ପ୍ରଗତିରେ ଆଡଭାନୀ ଜୀଙ୍କ ଗୁରୁତ୍ଵପୂର୍ଣ୍ଣ ଭୂମିକା ରହିଛି ।"

ଲାଲକୃଷ୍ଣ ଆଡଭାନୀ କିଏ ?

୮ ନଭେମ୍ବର ୧୯୨୭ରେ ଆଡଭାନୀଙ୍କ ଜନ୍ମ ପାକିସ୍ତାନର କରାଚିରେ ହୋଇଥିଲା । ଭାରତରୁ ପାକିସ୍ତାନ ଅଲଗା ହେବା ବେଳେ ଆଡଭାନୀଙ୍କ ପରିବାର ଦିଲ୍ଲୀ ଚାଲି ଆସିଥିଲା । ଆଡଭାନୀ ମାତ୍ର ୧୪ ବର୍ଷ ବୟସରେ RSS ସହ ଯୋଡ଼ି ହୋଇଥିଲେ ।

୧୯୫୦ରେ ଜନସଂଘ ସହ ସାମିଲ୍ ହୋଇଥିଲା ଲାଲକୃଷ୍ଣ ଆଡଭାନୀ । ୧୯୭୦ରେ ରାଜ୍ୟସଭାକୁ ଯାଇଥିଲେ । ୧୮୭୩ରେ ଆଡଭାନୀ ହୋଇଥିଲେ ଜନସଂଘର ଅଧ୍ୟକ୍ଷ । ଜରୁରୀକାଳୀନ ସ୍ଥିତିବେଳେ ୧୯୭୫ରେ ଆଡଭାନୀଙ୍କୁ ବେଙ୍ଗାଲୁରୁର ଜେଲ୍‌ରେ ମାସେ ରହିବାକୁ ପଡ଼ିଥିଲା ।

୧୯୭୭ରେ ଦେଶରେ ଜନତା ପାର୍ଟି ସରକାରରେ ଆଡଭାନୀ ହୋଇଥିଲେ ସୂଚନା ମନ୍ତ୍ରୀ । ୧୯୮୦ରେ ବିଜେପିର ଗଠନ ବେଳେ ଆଡଭାନୀ ରହିଥିଲେ ପ୍ରତିଷ୍ଠାତା ସଦସ୍ୟ । ୧୯୮୬ରୁ ୧୯୯୮ ପର୍ଯ୍ୟନ୍ତ ବିଜେପିର ଅଧ୍ୟକ୍ଷ ଦାୟିତ୍ଵ ନିର୍ବାହ କରିଥିଲେ । ଆଡବାନୀଙ୍କ ନେତୃତ୍ଵରରେ ବିଜେପି ୧୯୮୪ରେ ମାତ୍ର ୨ଟି ଆସନରୁ ୧୯୮୯ରେ ୮୬ଟି ଆସନ ଜିତିଥିଲା । ୧୯୯୬ରେ ଆସନ ସଂଖ୍ୟା ୧୬୧କୁ ବୃଦ୍ଧି ପାଇଥିଲା ।

ଏଥିସହ ପଢ଼ନ୍ତୁ: 'ପରାଜୟରେ ଶତକ, ବାରମ୍ବାର ଜନମତକୁ ଅପମାନିତ କରୁଛନ୍ତି ରାହୁଲ୍ ଗାନ୍ଧୀ': ଧର୍ମେନ୍ଦ୍ର ପ୍ରଧାନ 

ଆଡଭାନୀଙ୍କ ରାମ ରଥ ଯାତ୍ରା (୧୯୯୦) ବିଜେପିକୁ ଜନ ଆନ୍ଦୋଳନର ଦଳ ଭାବେ ଗଢ଼ି ତୋଳିଥିଲା । ୧୯୯୯ରୁ ୨୦୦୪ ପର୍ଯ୍ୟନ୍ତ୍ର ଗୃହ ମନ୍ତ୍ରୀ ସହ ଆଡଭାନୀ ଅଟଳ ବିହାରୀ ବାଜପେୟୀ ସରକାରରେ ଦେଶର ଉପ ପ୍ରଧାନମନ୍ତ୍ରୀ ଭାବେ କାର୍ଯ୍ୟ ଭାର ତୁଲାଇଥିଲେ ।