Meerut Murder Case / ମହାଭାରତ ପରେ ଏବେ ସାବିତ୍ରୀଙ୍କ ସତୀତ୍ଵ କଥା କହିଲେ ଜଜ୍; ଚର୍ଚ୍ଚାରେ ଦୁଇ ଦୁଇଟି ଜଘନ୍ୟ କାଣ୍ଡ

ଲକ୍ଷ୍ନୌ: ନାରୀ ଯେତେବେଳେ ପ୍ରେମ ପାଇଁ ଅପରାଧର ସୀମା ଲଙ୍ଘିଯାଏ, ସେତେବେଳେ ଆଇନର କଠୋର ହାତ କିପରି ସେମାନଙ୍କୁ କାବୁ କରେ, ତାର ଦୁଇଟି ଜ୍ୱଳନ୍ତ ଉଦାହରଣ ଦେଖିବାକୁ ମିଳିଛି ଉତ୍ତରପ୍ରଦେଶର ମିରଟରୁ । ଗୋଟିଏ ପଟେ ପ୍ରେମିକ ସାହିଲ୍ ସହ ମିଶି ସ୍ୱାମୀ ସୌରଭକୁ ନିର୍ମମ ଭାବେ ହତ୍ୟା କରି ନୀଳ ଡ୍ରମରେ ସିମେଣ୍ଟ ଦେଇ ଜମାଇ ଦେଇଥିବା ମୁସ୍କାନକୁ ଫାଶୀ ଦଣ୍ଡ ମିଳିଛି । ସେପଟେ ପ୍ରେମିକ ଅମରଦୀପ ପାଇଁ ସ୍ୱାମୀ ଅମିତଙ୍କୁ ଗଳାଚିପି ମାରି ଶବ ପାଖରେ ସାପ ଛାଡ଼ି ସର୍ପଦଂଶନର ନାଟକ ରଚିଥିବା ପତ୍ନୀ ରବିତାକୁ ମଧ୍ୟ କୋର୍ଟ ମୃତ୍ୟୁଦଣ୍ଡ ଶୁଣାଇଛନ୍ତି ।

ବଡ଼ କଥା ହେଲା, ଏ ଦୁଇଟି ଯାକ ସମ୍ବେଦନଶୀଳ ମାମଲାରେ ଶୁଣାଣି ସମୟରେ ଅଦାଲତ ଯାହା କହିଛନ୍ତି, ତାହା ଆଜି ସମାଜ ପାଇଁ ଏକ ବଡ଼ ବାର୍ତ୍ତା ପାଲଟିଛି । ମିରଟରେ ପରକୀୟା ପ୍ରୀତି ପାଇଁ ସ୍ୱାମୀଙ୍କୁ ଭୟଙ୍କର ଭାବେ ହତ୍ୟା କରିଥିବା ଦୁଇଟି ପୃଥକ୍ ମାମଲାରେ କୋର୍ଟ ଶୁଣାଇଛନ୍ତି କଠୋରରୁ କଠୋରତମ ଦଣ୍ଡାଦେଶ । ପାପର ଶେଷ ପରିଣତି କେବଳ ଫାଶୀଖୁଣ୍ଟ ବୋଲି କହିଛନ୍ତି କୋର୍ଟ ।

• ନୀଳଡ୍ରମ୍ ହତ୍ୟା ମାମଲା

ମିରଟର ବହୁଚର୍ଚ୍ଚିତ ନୀଳଡ୍ରମ୍ ହତ୍ୟା ମାମଲାର ରାୟ ଆସିବାର ଦିନକ ପରେ ବହସୁମା ଅଞ୍ଚଳରୁ ଆସିଲା ଆଉ ଏକ ସାଂଘାତିକ ସତ । ଅମିତ କଶ୍ୟପ ହତ୍ୟାକାଣ୍ଡ । ଘଟଣା ୧୨ ଏପ୍ରିଲ ୨୦୨୫ର । ପତ୍ନୀ ରବିତା ଓ ପ୍ରେମିକ ଅମରଦୀପ ମିଶି ଅମିତଙ୍କୁ ଗଳାଚିପି ମାରିଦେବା ପରେ ଚାଲାକି କରି ଶବ ପାଖରେ ଛାଡ଼ିଦେଇଥିଲେ ଗୋଟିଏ ସାପ । ଘଟଣାକୁ ଆକସ୍ମିକ ସର୍ପଦଂଶନ ବୋଲି ଦେଖାଇବାକୁ ଚେଷ୍ଟା କରିଥିଲେ । କିନ୍ତୁ ପୋଷ୍ଟମର୍ଟମ ରିପୋର୍ଟରୁ ହୋଇଥିଲା ମମଲାର ପର୍ଦ୍ଦାଫାଶ । ଏହି ମାମଲାରେ ଅତ୍ୟନ୍ତ ଭାବପୂର୍ଣ୍ଣ ଓ କଡ଼ା ଟିପ୍ପଣୀ ଦେଇଛନ୍ତି ଅଦାଲତ । ବିଚାରପତି କହିଛନ୍ତି, "ପତ୍ନୀ ସ୍ୱାମୀଙ୍କ 'ଅର୍ଦ୍ଧାଙ୍ଗିନୀ'। ଭାରତୀୟ ସଂସ୍କୃତିରେ 'ସାବିତ୍ରୀ' ନିଜ ସ୍ୱାମୀଙ୍କ ପ୍ରାଣ ବଞ୍ଚାଇବା ପାଇଁ ଯମରାଜଙ୍କ ସହ ମଧ୍ୟ ସଂଘର୍ଷ କରିଥିଲେ । କିନ୍ତୁ ଆଜିର ସମୟରେ ଜଣେ ପତ୍ନୀ ନିଜେ ସ୍ୱାମୀଙ୍କ ଯମରାଜ ପାଲଟିଯାଉଛି । ଏଭଳି ଜଘନ୍ୟ ଷଡ଼ଯନ୍ତ୍ର ପାଇଁ କୌଣସି କ୍ଷମା ନାହିଁ ।"

ପଢନ୍ତୁ ଏହି ଖବର: ଚେକିଂ ବାହାନାରେ NH-୧୬ରେ ସ୍କୁଟି ଅଟକାଇଲେ, ମହିଳାଙ୍କ ଆଖିରେ ରାସାୟନିକ ଗୁଣ୍ଡ ପକାଇ କାନଫୁଲ ନେଇଗଲେ

• ନେଭି ଅଫିସରଙ୍କୁ ନିଶା ଖୁଆଇ ନିର୍ମମ ହତ୍ୟା

ପ୍ରଥମ ଘଟଣା ଥିଲା ୨୦୨୫ ମସିହା ମାର୍ଚ୍ଚ ମାସର । ମିରଟର ମର୍ଚ୍ଚାଣ୍ଟ ନେଭି ଅଧିକାରୀ ସୌରଭ ପାଲ୍‌ଙ୍କୁ ତାଙ୍କ ପତ୍ନୀ ମୁସ୍କାନ ରସ୍ତୋଗି ଓ ପ୍ରେମିକ ସାହିଲ୍ ଶୁକ୍ଳା ନିଶା ଖୁଆଇ ନିର୍ମମ ଭାବେ ହତ୍ୟା କରିଥିଲେ । ଏହାପରେ ମୃତଦେହକୁ ଖଣ୍ଡ ଖଣ୍ଡ କରି ଏକ 'ନୀଳ ଡ୍ରମ୍' ଭିତରେ ଭର୍ତ୍ତି କରି ସିମେଣ୍ଟ ଦେଇ ଜମାଇ ଦେଇଥିଲେ । ଏହି ମାମଲାରେ ହତ୍ୟାକାରୀ ମୁସ୍କାନ ଓ ସାହିଲଙ୍କୁ ମୃତ୍ୟୁଦଣ୍ଡ ଶୁଣାଣି ସମୟରେ ବି ଐତିହାସିକ ଟିପ୍ପଣୀ ଦେଇଥିଲେ କୋର୍ଟ । ମହାଭାରତର ଉଦାହରଣ ଦେଇ କହିଥିଲେ, "ଯେମିତି ମହାଭାରତରେ ଅଧର୍ମୀଙ୍କୁ ସଂହାର କରି ଧର୍ମ ପ୍ରତିଷ୍ଠା କରାଯାଇଥିଲା, ସେହିପରି ସମାଜରେ ଶାନ୍ତି ଓ ନ୍ୟାୟ ବଜାୟ ରଖିବା ପାଇଁ ଏଭଳି କ୍ରୂର ଅପରାଧୀଙ୍କୁ ଦଣ୍ଡ ଦେବା ମଧ୍ୟ ନ୍ୟାୟାଳୟର ଧର୍ମ ।