Argus News - ISI ନିର୍ଦ୍ଦେଶରେ ରଚୁଥିଲା ଷଡ଼ଯନ୍ତ୍ର; ଧରାପଡ଼ିଲା ଲସ୍କର ଆତଙ୍କୀ ଶବିର ଅହମ୍ମଦ

ଦିଲ୍ଲୀ ପୋଲିସର ସ୍ପେଶାଲ ସେଲ୍ ପାକିସ୍ତାନ ସ୍ଥିତ ଆତଙ୍କୀ ସଂଗଠନ ଲସ୍କର-ଇ-ତୋଇବାର ଆତଙ୍କୀ ଶବିର ଅହମ୍ମଦକୁ ଗିରଫ କରିଛି । ଦିଲ୍ଲୀ ସୀମାରୁ ଅହମ୍ମଦକୁ ଗିରଫ କରିଛି ସୁରକ୍ଷା ଏଜେନ୍ସି । ଶବୀର ଅହମ୍ମଦ ବାଂଲାଦେଶରେ ବସି ପାକିସ୍ତାନୀ ଗୁପ୍ତଚର ସଂସ୍ଥା ଆଇଏସଆଇ ଇସାରାରେ ଲସ୍କରର ଏକ ନୂଆ ମଡ୍ୟୁଲ ତିଆରି କରୁଥିଲା । ଭାରତର ଯୁବପିଢିଙ୍କ ମନରେ ଭାରତ ବିରୋଧୀ ଚିନ୍ତାଧାରା ଭର୍ତ୍ତି କରି ସେମାନଙ୍କୁ ଆତଙ୍କୀ ସଂଗଠନରେ ସାମିଲ କରିବାକୁ ଉଦ୍ୟମ ଚଳାଇଥିଲା ।

ଦିଲ୍ଲୀ ସ୍ପେଶାଲ ଟିମ ମାର୍ଚ୍ଚ ୨୯ ତାରିଖ ବିଳମ୍ବିତ ରାତିରେ ଉତ୍ତର-ପୂର୍ବ ଦିଲ୍ଲୀର ଗାଜିପୁର ସୀମାରେ ଚଢାଉ କରି ଶବିର ଅହମ୍ମଦକୁ ଗିରଫ କରିଛି । ପୋଲିସ କହିଛି ଯେ ନିକଟରେ ଯେଉଁ ଲସ୍କର ମଡ୍ୟୁଲର ଖୁଲାସା ହୋଇଥିଲା, ଶବିର ଉକ୍ତ ମଡ୍ୟୁଲର ମୁଖ୍ୟ ଷଡ଼ଯନ୍ତ୍ରକାରୀ ଓ ହ୍ୟାଣ୍ଡେଲର ଥିଲା । ଶେଷରେ ପୋଲିସ ଏହି ଆତଙ୍କୀକୁ ଗିରଫ କରିବାରେ ସଫଳ ହୋଇଛି ।

ନେପାଳ ଦେଇ ଭାରତରେ ପଶିଥିଲା
ତଦନ୍ତରୁ ଜଣାପଡ଼ିଛି ଯେ ଶବିର ଭାରତକୁ ସିଧାସଳଖ ପ୍ରବେଶ କରିନଥିଲା, ବରଂ ନେପାଳ ସୀମା ଦେଇ ଲୁଚିଛପି ଭାରତରେ ପହଞ୍ଚିଥିଲା । ଏହାପରେ ଦିଲ୍ଲୀ ଓ ଆଖପାଖ ଅଞ୍ଚଳରେ ରହି ଆତଙ୍କୀ ସଂଗଠନ ଲାଗି ନୂଆ ଲୋକଙ୍କୁ ଖୋଜୁଥିଲା । ପୋଲିସର କହିବାନୁସାରେ, ଶବିରକୁ ପାକିସ୍ତାନରେ ବସିଥିବା ଲସ୍କରର ହ୍ୟାଣ୍ଡେଲରଙ୍କଠାରୁ ଲଗାତାର ନିର୍ଦ୍ଦେଶ ମିଳୁଥିଲା । ଏମାନେ ଭାରତରେ ନିଜ ନେଟୱର୍କକୁ ସୁଦୃଢ କରିବା ନୂଆ ଯୁବକଙ୍କ ବ୍ରେନୱାସ କରି ସେମାନଙ୍କୁ ସଂଗଠନରେ ସାମିଲ କରିବାକୁ ଉଦ୍ୟମ କରୁଥିଲେ ।

କେମିତି ପାକିସ୍ତାନ ଆତଙ୍କୀଙ୍କ ସହ କଥା ହେଉଥିଲା ଶବିର ?
ପଚରାଉଚରା ସମୟରେ ଶବିର ଏନକ୍ରିପ୍ଟେଡ୍ ମେସେଜିଂ ଆପ୍ ଓ ସୋସିଆଲ ମିଡିଆ ଜରିଆରେ ଯୁବକଙ୍କ ସହିତ ଯୋଗାଯୋଗ କରୁଥିଲା । ସେମାନଙ୍କୁ କଟ୍ଟରପନ୍ଥୀ ବିଚାରଧାରା ଆଡକୁ ଆକର୍ଷିତ କରିବା ସହ ଆତଙ୍କୀ ସଂଗଠନରେ ସାମିଲ ହେବା ଲାଗି ପ୍ରବର୍ତ୍ତାଉଥିଲା । ଏଜେନ୍ସିର କହିବାନୁସାରେ, ଶବିର ଭାରତରେ ଆତଙ୍କୀ ନେଟୱର୍କକୁ ମଜଭୁତ କରିବା ଲାଗି ଉଦ୍ୟମ କରୁଥିଲା, ଯାହାଦ୍ଵାରା ଆଗାମୀ ଦିନରେ ଭାରତରେ ଆତଙ୍କବାଦୀ ଆକ୍ରମଣ କରିପାରିବ । କିନ୍ତୁ ତାର ସବୁ ଯୋଜନା ପଣ୍ଡ ହୋଇଛି । ସୀମାରୁ ଶବିରକୁ ଗିରଫ କରିଛି ଦିଲ୍ଲୀ ପୋଲିସ ।

ପଢନ୍ତୁ ଏହି ଖବର: ଭାରତକୁ ଟାର୍ଗେଟ କରୁଥିବା ଆତଙ୍କବାଦୀଙ୍କୁ ଏବେ ବି ଛାତ ଯୋଗାଉଛି ପାକିସ୍ତାନ

ଯେତେବେଳେ ପୋଲିସ ଶବିରକୁ ଗିରଫ କରିଥିଲା, ସେତେବେଳେ ତା' ନିକଟରୁ ଅନେକ ଦେଶର ମୁଦ୍ରା ଓ ଅନେକ ସାମଗ୍ରୀ ଜବତ ହୋଇଛି । ଏଥିରେ ବାଂଲାଦେଶୀ ଟକା, ପାକିସ୍ତାନୀ ମୁଦ୍ରା, ନେପାଳୀ ଓ ଭାରତୀୟ ମୁଦ୍ରା ସାମିଲ । ଏହାବ୍ୟତୀତ ଏକ ନେପାଳି ସିମ୍ କାର୍ଡ, ମୋବାଇଲ ଫୋନ, ଆଧାର କାର୍ଡର କପି ଓ କପଡ଼ା ଭର୍ତ୍ତି ଏକ ବ୍ୟାଗ୍ ମିଳିଛି । ପୋଲିସ ଏହା ମଧ୍ୟ ଜାଣିବାକୁ ପାଇଛି ଯେ ପାକିସ୍ତାନ ଓ ବାଂଲାଦେଶରେ ବସିଥିବା ଅନେକ ହ୍ୟାଣ୍ଡେଲରଙ୍କ ସହ ଯୋଗାଯୋଗରେ ଥିଲା ଶବିର । ସେମାନଙ୍କ ଜରିଆରେ ଭାରତୀୟ ଯୁବକଙ୍କୁ ଆତଙ୍କୀ ସଂଗଠନରେ ସାମିଲ କରିବାକୁ ଉଦ୍ୟମ କରୁଥିଲା ।

ପୂର୍ବରୁ ଧରାପଡ଼ି ଜେଲ୍ କାଟିଥିଲା ଶବିର
ଆତଙ୍କୀ ଶବିର ଅହମ୍ମଦକୁ ୨୦୦୭ରେ ଦିଲ୍ଲୀ ପୋଲିସ AK-47, ଗ୍ରେନେଡ୍ ଓ ଅନେକ ଅସ୍ତ୍ରଶସ୍ତ୍ର ସହ ଗିରଫ କରିଥିଲା । ଏହାପରେ ସେ ୨୦୧୮ ପର୍ଯ୍ୟନ୍ତ ଦିଲ୍ଲୀ ତିହାର ଜେଲରେ ଥିଲା । ଜେଲରୁ ମୁକୁଳିବା ପରେ ପୁଣି ଆତଙ୍କୀ ସଂଗଠନ ସହ ଯୋଡ଼ି ହୋଇଥିଲା । ଏଥର ବାଂଲାଦେଶକୁ ନିଜର ନୂଆ ଠିକଣା କରି ଭାରତ ବିରୋଧରେ ଷଡ଼ଯନ୍ତ୍ର ରଚୁଥିଲା । ଏବେ ଭାରତରେ ଅବୈଧ ଭାବେ ପ୍ରବେଶ କରିବା ପରେ ପୋଲିସ ହାବୁଡ଼ରେ ପଡ଼ିଛି ।