Pakistan Terrorism / ଭାରତକୁ ଟାର୍ଗେଟ କରୁଥିବା ଆତଙ୍କବାଦୀଙ୍କୁ ଏବେ ବି ଛାତ ଯୋଗାଉଛି ପାକିସ୍ତାନ

ଆତଙ୍କବାଦକୁ କେବେ ବି ପ୍ରଶୟ ଦେଉନଥିବା କହି ସଫେଇ ଦେଉଥିବା ପାକିସ୍ତାନର ସତ ଧରାପଡ଼ିଛି । ଆମେରିକାର ଏକ ରିପୋର୍ଟରେ ଏକ ବଡ଼ ଖୁଲାସା ହୋଇଛି । ପାକିସ୍ତାନ ନିଜ ମାଟିରେ ବିଭିନ୍ନ ଆତଙ୍କବାଦୀ ସଂଗଠନକୁ ଆଶ୍ରୟ ଦେଉଛି, ଯାହାକି ଭାରତ ଏବଂ କାଶ୍ମୀରକୁ ଟାର୍ଗେଟ କରୁଛନ୍ତି । ରିପୋର୍ଟରେ ଉଲ୍ଲେଖ କରାଯାଇଛି ଯେ ବର୍ଷ ବର୍ଷ ଧରି ସାମରିକ ଅଭିଯାନ ଏବଂ ନୀତିଗତ ପଦକ୍ଷେପ ସତ୍ତ୍ୱେ ଆତଙ୍କବାଦୀ ଗୋଷ୍ଠୀଗୁଡ଼ିକ ପାକିସ୍ତାନ ମାଟିରେ କାର୍ଯ୍ୟ ଜାରି ରଖିଛନ୍ତି ।

କଂଗ୍ରେସନାଲ ରିସର୍ଚ୍ଚ ସର୍ଭିସର ଏହି ରିପୋର୍ଟରେ କୁହାଯାଇଛି ଯେ ଭାରତକୁ କ୍ଷତି ପହଞ୍ଚାଇବା ପରି ଅନେକ ଆତଙ୍କୀ ଗୋଷ୍ଠୀ ପାକିସ୍ତାନରେ ସକ୍ରିୟ ଅଛନ୍ତି । ୨୦୦୮ ମୁମ୍ବାଇ ଆକ୍ରମଣ ପାଇଁ ଦାୟୀ ଲସ୍କର-ଏ-ତୋଇବା ଏବଂ ୨୦୦୧ ଭାରତୀୟ ସଂସଦ ଉପରେ ଆକ୍ରମଣ ସହିତ ଜଡିତ ଜୈଶ-ଏ-ମହମ୍ମଦ ପାକିସ୍ତାନୀ ଅଞ୍ଚଳରୁ କାର୍ଯ୍ୟ ଜାରି ରଖିଛନ୍ତି । ରିପୋର୍ଟରେ ପାକିସ୍ତାନକୁ ଆତଙ୍କବାଦ ଦ୍ୱାରା ସର୍ବାଧିକ ପ୍ରଭାବିତ ଦେଶ ବୋଲି ମଧ୍ୟ କୁହାଯାଇଛି ।

ଏହା ବ୍ୟତୀତ, ଆମେରିକୀୟ ଏହି ଗବେଷଣା ଶାଖା ରିପୋର୍ଟରେ ଏହା ମଧ୍ୟ କୁହାଯାଇଛି ଯେ ପାକିସ୍ତାନରେ ଥିବା ଅଧିକାଂଶ ଆତଙ୍କବାଦୀ ଗୋଷ୍ଠୀ ଇସଲାମିକ ଉଗ୍ରବାଦୀ ଚିନ୍ତାଧାରା ଦ୍ୱାରା ସଞ୍ଚାଳିତ । ଏହି ଗୋଷ୍ଠୀଗୁଡ଼ିକ ପାଞ୍ଚଟି ବ୍ୟାପକ ବର୍ଗରେ ବିଭକ୍ତ ହୋଇଛି ଯେପରିକି ବିଶ୍ୱସ୍ତରୀୟ, ଆଫଗାନିସ୍ତାନ ବିରୋଧୀ, ଭାରତ ଏବଂ କାଶ୍ମୀର ବିରୋଧୀ, ଘରୋଇ ଭାବରେ କେନ୍ଦ୍ରିତ ଏବଂ ସାମ୍ପ୍ରଦାୟିକ ସଂଗଠନ ।

• ସବୁଠାରୁ ଘାତକ ତେହରିକ-ଇ-ତାଲିବାନ

ଘରୋଇ ସ୍ତରରେ ତେହରିକ-ଇ-ତାଲିବାନ ପାକିସ୍ତାନକୁ 'ପାକିସ୍ତାନରେ କାର୍ଯ୍ୟ କରୁଥିବା ସବୁଠାରୁ ଘାତକ ଆତଙ୍କବାଦୀ ଗୋଷ୍ଠୀ' ଭାବରେ ଦର୍ଶାଯାଇଛି । ଏହି ଆତଙ୍କୀ ସଂଗଠନର ପ୍ରାୟ ୨୫୦୦-୫୦୦୦ ଯୋଦ୍ଧା ଅଛନ୍ତି ଏବଂ ଶରିଆ ଆଇନ ଲାଗୁ କରିବା ଏହାର ଏକ ନିର୍ଦ୍ଦିଷ୍ଟ ଲକ୍ଷ୍ୟ । ଅନେକ ସମୟରେ ପାକିସ୍ତାନ କେବେ ବି ଆତଙ୍କବାଦକୁ ସମର୍ଥନ କରେ ନାହିଁ ବୋଲି ସଫେଇ ଦେଇଥାଏ । ହେଲେ ଏହି ରିପୋର୍ଟରେ ସ୍ପଷ୍ଟ ଭାବେ କୁହାଯାଇଛି ଯେ ଭାରତ ବିରୋଧୀ ଆତଙ୍କବାଦ ଘଟଣାରେ ଲିପ୍ତ ଆତଙ୍କୀ ସଂଗଠନ ପାକିସ୍ତାନରେ ହିଁ ସକ୍ରିୟ ଅଛନ୍ତି । ବିଗତ ଦିନମାନଙ୍କରେ ଭାରତ ଉପରେ ହୋଇଥିବା ବଡ଼ ବଡ଼ ଆତଙ୍କୀ ଆକ୍ରମଣରେ ପାକିସ୍ତାନ ସ୍ଥିତ ଆତଙ୍କୀ ସଂଗଠନଗୁଡ଼ିକର ସମ୍ପୃକ୍ତି ଥିବା ମଧ୍ୟ ଜଣାପଡ଼ିଛି । ଏପରିକି ଏହି ସଂଗଠନଗୁଡ଼ିକ ନିଜକୁ ଦାୟୀ ମଧ୍ୟ କରିଛନ୍ତି । 

ପଢନ୍ତୁ ଏହି ଖବର: ଯୁଦ୍ଧ ବେଳେ ଚର୍ଚ୍ଚାରେ ପେଣ୍ଟାଗନ ପିଜା ରିପୋର୍ଟ; କ'ଣ ରହିଛି ଏହାର ଇତିହାସ?

ଏଠାରେ କହିରଖୁଛୁ କି, CRS ହେଉଛି ଆମେରିକୀୟ କଂଗ୍ରେସର ଏକ ସ୍ୱାଧୀନ ଗବେଷଣା ଶାଖା ଯାହା କଂଗ୍ରେସ ସଦସ୍ୟମାନଙ୍କୁ ସୂଚନାପୂର୍ଣ୍ଣ ନିଷ୍ପତ୍ତି ନେବାରେ ସାହାଯ୍ୟ କରିବା ପାଇଁ ବିଭିନ୍ନ ପ୍ରସଙ୍ଗରେ ସାମୟିକ ରିପୋର୍ଟ ପ୍ରସ୍ତୁତ କରେ।