LPG Truck Fire / ରାସ୍ତା ମଝିରେ ଜଳିଲା LPG ସିଲିଣ୍ଡର ବୋଝେଇ ଟ୍ରକ୍, ଅଳ୍ପକେ ଟଳିଲା ବଡ଼ ଅଘଟଣ

ରାସ୍ତା ମଝିରେ ହଠାତ୍ ଜଳିଗଲା LPG ସିଲିଣ୍ଡର ବୋଝେଇ ଟ୍ରକ୍‌ । ଆଉ ଏହାକୁ ନେଇ ଘଟଣାସ୍ଥଳରେ ହଠାତ୍‌ ଖେଳିଗଲା ଆତଙ୍କର ବାତାବରଣ । ମଙ୍ଗଳବାର ନୋଏଡାର ଏଲିଭେଟେଡ୍ ରୋଡରେ ଏକ LPG ସିଲିଣ୍ଡର ବୋଝେଇ ଟ୍ରକ୍‌ରେ ହଠାତ୍ ନିଆଁ ଲାଗିଯିବାରୁ ଆତଙ୍କ ସୃଷ୍ଟି ହୋଇଥିଲା । ଟ୍ରକ୍‌ରେ ବହୁ ସଂଖ୍ୟକ ଗ୍ୟାସ୍ ସିଲିଣ୍ଡର ଥିବାରୁ ଘଟଣାକୁ ଗୁରୁତର ଭାବେ ନିଆଯାଇଥିଲା । ନିଆଁ ଲାଗିବା ଖବର ପାଇ ତୁରନ୍ତ ଦମକଳ ବିଭାଗକୁ ସୂଚନା ଦିଆଯାଇଥିଲା ।

ଖବର ପାଇବା ପରେ ଫାୟାର ବ୍ରିଗେଡ୍‌ର ଦୁଇଟି ଗାଡ଼ି ଘଟଣାସ୍ଥଳରେ ପହଞ୍ଚିଥିଲା । ଫାୟାର କର୍ମଚାରୀମାନେ ଟ୍ରକ୍‌ରେ ଥିବା ଗ୍ୟାସ୍ ସିଲିଣ୍ଡରକୁ ଦୃଷ୍ଟିରେ ରଖି ଅତ୍ୟନ୍ତ ସତର୍କତାର ସହ ନିଆଁ ଲିଭାଇବା କାର୍ଯ୍ୟ ଆରମ୍ଭ କରିଥିଲେ । ଦୀର୍ଘ ସମୟର ଚେଷ୍ଟା ପରେ ନିଆଁକୁ ଆୟତ୍ତ କରାଯାଇଥିଲା ।

ଅଧିକ ପଢ଼ନ୍ତୁ: ରାଜଧାନୀର ୩ ସ୍କୁଲକୁ ବୋମା ଧମକ, ଛାତ୍ରଛାତ୍ରୀଙ୍କୁ କରାଗଲା ବାହାର...ଧମକପୂର୍ଣ୍ଣ ଇମେଲ୍ ପରେ ହଇଚଇ

ପ୍ରାଥମିକ ସୂଚନା ଅନୁସାରେ, ଟ୍ରକ୍‌ଟି LPG ସିଲିଣ୍ଡର ନେଇ ଏଲିଭେଟେଡ୍ ରୋଡ୍ ଦେଇ ଯାଉଥିବା ସମୟରେ ହଠାତ୍ ନିଆଁ ଲାଗିଥିଲା । ଟ୍ରକ୍‌ରେ ବହୁ ସଂଖ୍ୟକ ସିଲିଣ୍ଡର ଥିବାରୁ ଏକ ବଡ଼ ଅଘଟଣର ଆଶଙ୍କା ସୃଷ୍ଟି ହୋଇଥିଲା । ତେବେ ଦମକଳ ବାହିନୀ ସମୟରେ ପହଞ୍ଚି ନିଆଁକୁ ନିୟନ୍ତ୍ରଣ କରିଥିଲା ।

ଏହି ଅଗ୍ନିକାଣ୍ଡର ପ୍ରକୃତ କାରଣ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ । ଅଗ୍ନିକାଣ୍ଡ ଯୋଗୁଁ ଟ୍ରକ୍‌ରେ ଲକ୍ଷାଧିକ ଟଙ୍କାର କ୍ଷୟକ୍ଷତି ହୋଇଥିବା ଆକଳନ କରାଯାଉଛି। ତେବେ ଏହି ଘଟଣାରେ କାହାରି ମୃତାହତ ହୋଇନଥିବା ଖବର ମିଳିଛି । ଘଟଣା ପରେ ପୋଲିସ ଓ ଫାୟାର ବ୍ରିଗେଡ୍ ପକ୍ଷରୁ ତଦନ୍ତ ଜାରି ରହିଛି । ଟ୍ରକ୍‌ରେ କିପରି ନିଆଁ ଲାଗିଲା ଏବଂ ଏହା ପଛରେ କୌଣସି ଅନ୍ୟ କାରଣ ରହିଛି କି ନାହିଁ, ସେନେଇ ଯାଞ୍ଚ କରାଯାଉଛି ।