ମଧ୍ୟପ୍ରାଚ୍ୟରେ ବଢ଼ୁଥିବା ଭୂ-ରାଜନୈତିକ ଉତ୍ତେଜନାର ପ୍ରଭାବ ଏବେ ଭାରତର ଘରୋଇ ଶକ୍ତି ବଜାରରେ ଦେଖିବାକୁ ମିଳିଛି । ଯୋଗାଣ ବାଧା ଏବଂ ଏଲପିଜି ସିଲିଣ୍ଡର ବୁକିଂରେ ହ୍ରାସ ହେବା ପରେ କେନ୍ଦ୍ର ସରକାର ଏବଂ ଗ୍ୟାସ ବଣ୍ଟନ କମ୍ପାନୀଗୁଡ଼ିକ ଏବେ ପାଇପ୍ ପ୍ରାକୃତିକ ଗ୍ୟାସ (PNG)କୁ ପ୍ରୋତ୍ସାହିତ କରୁଛନ୍ତି । ଗ୍ରାହକମାନଙ୍କୁ ଆକର୍ଷିତ କରିବା ପାଇଁ କମ୍ପାନୀଗୁଡ଼ିକ ପଞ୍ଜିକରଣ ଶୁଳ୍କ ଛାଡ଼ଠାରୁ ଆରମ୍ଭ କରି ମାଗଣା ଗ୍ୟାସ ପର୍ଯ୍ୟନ୍ତ ଆକର୍ଷଣୀୟ ଅଫର ପ୍ରଦାନ କରୁଛନ୍ତି ।

ପେଟ୍ରୋଲିୟମ ମନ୍ତ୍ରଣାଳୟର ତଥ୍ୟ ଅନୁଯାୟୀ, ଗତ କିଛି ଦିନ ମଧ୍ୟରେ ଏଲପିଜି ସିଲିଣ୍ଡର ବୁକିଂ ଧାରା ଯଥେଷ୍ଟ ହ୍ରାସ ପାଇଛି । ୧୩ ମାର୍ଚ୍ଚରେ ସାରା ଦେଶରେ ପ୍ରାୟ ୮.୮୮ ନିୟୁତ ସିଲିଣ୍ଡର ବୁକିଂ ହୋଇଥିଲା, ଯାହା ୧୪ ମାର୍ଚ୍ଚରେ ୭.୭ ନିୟୁତକୁ କମିଛି । ତଥାପି, ସରକାର ସ୍ପଷ୍ଟ କରିଛନ୍ତି ଯେ ଦେଶରେ ଗ୍ୟାସର କୌଣସି ଅଭାବ ନାହିଁ ଏବଂ ଡିଜିଟାଲ ବୁକିଂ ୮୭ ପ୍ରତିଶତରେ ପହଞ୍ଚିଛି । କଳାବଜାରୀ ରୋକିବା ପାଇଁ ୨୨ଟି ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳରେ ନିୟନ୍ତ୍ରଣ କକ୍ଷ ସ୍ଥାପନ କରାଯାଇଛି ।

• ଗ୍ୟାସ କମ୍ପାନୀଗୁଡିକର 'ଧମାକା' ଅଫର୍

ଗ୍ରାହକଙ୍କୁ ଏଲପିଜି ସଙ୍କଟରୁ ମୁକ୍ତି ଦେବା ଲାଗି ପ୍ରମୁଖ ଗ୍ୟାସ କମ୍ପାନୀଗୁଡିକ ସ୍ୱତନ୍ତ୍ର ରିହାତି ଘୋଷଣା କରିଛନ୍ତି, ଯେପରିକି:

GAIL ଗ୍ୟାସ୍: ଗେଲ୍ ଗ୍ୟାସ୍ ଏହାର ନୂତନ ଘରୋଇ ସଂଯୋଗ ଉପରେ ₹୫୦୦ ମୂଲ୍ୟର ମାଗଣା ଗ୍ୟାସ୍ ମଧ୍ୟ ପ୍ରଦାନ କରୁଛି ।
ବାଣିଜ୍ୟିକ ଗ୍ରାହକଙ୍କ ପାଇଁ ଆଶ୍ୱସ୍ତି: BPCL ଏବଂ ଅନ୍ୟାନ୍ୟ କମ୍ପାନୀଗୁଡ଼ିକ ବାଣିଜ୍ୟିକ ବ୍ୟବହାର ପାଇଁ ₹୧ ଲକ୍ଷ ରୁ ₹୫ ଲକ୍ଷ ପର୍ଯ୍ୟନ୍ତ ସୁରକ୍ଷା ଜମା ଛାଡ କରିଛନ୍ତି, ଯାହା ଫଳରେ ଛୋଟ ଏବଂ ବଡ଼ ବ୍ୟବସାୟ ପାଇଁ PNG କିଣିବା ଅତ୍ୟନ୍ତ ସୁଲଭ ହୋଇଛି ।
IGL (ଇନ୍ଦ୍ରପ୍ରସ୍ଥ ଗ୍ୟାସ ଲିମିଟେଡ୍): ଯଦି କୌଣସି ଓଡ଼ିଆ ଦିଲ୍ଲୀ-ଏନସିଆର ଅଞ୍ଚଳରେ ରହୁଛନ୍ତି, ତେବେ ସେମାନେ ଏହି ଅଫରର ଲାଭ ଉଠାଇପାରିବେ । IGL ଚଳିତ ବର୍ଷ ମାର୍ଚ୍ଚ ୩୧ ତାରିଖ ପର୍ଯ୍ୟନ୍ତ ନୂତନ ସଂଯୋଗ ନେବା ଉପରେ ₹୫୦୦ ମୂଲ୍ୟର ମାଗଣା ଗ୍ୟାସ୍ ଦେଉଛି ।
MGL (ମହାନଗର ଗ୍ୟାସ୍ ଲିମିଟେଡ୍): ମୁମ୍ବାଇ ଏବଂ ଆଖପାଖ ଅଞ୍ଚଳର ଘରୋଇ ଗ୍ରାହକଙ୍କ ପାଇଁ ₹୫୦୦ ପଞ୍ଜିକରଣ ଶୁଳ୍କ ସମ୍ପୂର୍ଣ୍ଣ ଛାଡ଼ କରାଯାଇଛି ।

• PNG ଲାଭ ଏବଂ ନୂତନ ନିୟମ

ପିଏନଜି କେବଳ ସୁରକ୍ଷିତ ନୁହେଁ, ବରଂ LPG ତୁଳନାରେ ଶସ୍ତା ମଧ୍ୟ । ପିଏନଜି ବ୍ୟବହାର କଲେ ଗ୍ରାହକମାନେ ସିଲିଣ୍ଡର ସରିଯିବା କିମ୍ବା ଡେଲିଭରି ପାଇଁ ଅପେକ୍ଷା କରିବା ବିଷୟରେ କୌଣସି ଚିନ୍ତା କରିବାକୁ ପଡ଼ିବ ନାହିଁ । ବିଶେଷଜ୍ଞମାନେ ବିଶ୍ୱାସ କରନ୍ତି ଯେ ଏହି ସୁଇଚ୍ କେବଳ ଗ୍ରାହକଙ୍କ ପକେଟକୁ ସଞ୍ଚୟ କରିବ ନାହିଁ ବରଂ ଅନ୍ତର୍ଜାତୀୟ ଅସ୍ଥିରତା ସମୟରେ ଦେଶର ଶକ୍ତି ସୁରକ୍ଷାକୁ ମଧ୍ୟ ସୁଦୃଢ଼ ​​କରିବ ।

ତଥାପି ସରକାର ନିୟମରେ ଏକ ଗୁରୁତ୍ୱପୂର୍ଣ୍ଣ ପରିବର୍ତ୍ତନ କରିଛନ୍ତି । ଯଦି ଆପଣ ଆପଣଙ୍କ ଘରେ PNG ସଂଯୋଗ ସ୍ଥାପନ କରନ୍ତି, ତେବେ ଆପଣଙ୍କୁ ଆପଣଙ୍କର ପୁରୁଣା LPG ସଂଯୋଗକୁ ଫେରାଇ ଦେବାକୁ ପଡ଼ିବ ।

ଅଧିକ ଖବର ପଢନ୍ତୁ...