କରୁର୍ ଦଳାଚକଟା ମାମଲାରେ ବିଚାର କରି ଏକ ଗୁରୁତ୍ବପୂର୍ଣ୍ଣ ନିର୍ଦ୍ଦେଶ ଦେଇଛନ୍ତି ମାଡ୍ରାସ ହାଇକୋର୍ଟ । ରାଜ୍ୟ ଏବଂ ଜାତୀୟ ରାଜପଥରେ ସମସ୍ତ ରାଜନୈତିକ ରାଲି, ରୋଡ୍ ଶୋ ଏବଂ ଅନ୍ୟାନ୍ୟ ସାର୍ବଜନୀନ କାର୍ଯ୍ୟକ୍ରମକୁ ନିଷିଦ୍ଧ କରିଛନ୍ତି ମାଡ୍ରାସ ହାଇକୋର୍ଟ । ଏହି ପ୍ରକାରର କାର୍ଯ୍ୟକ୍ରମ ପାଇଁ ଯେ ପର୍ଯ୍ୟନ୍ତ ଏକ ସ୍ବତନ୍ତ୍ର SOP ତିଆରି ନ ହୋଇଛି ସ ପର୍ଯ୍ୟନ୍ତ ଏହି ନିଷେଧ ବଳବତ୍ତର ରହିବ ବୋଲି କୋର୍ଟ ପକ୍ଷରୁ କୁହାଯାଇଛି ।
TVK ନେତା ବିଜୟଙ୍କ ରାଲି ସମୟରେ କରୁରରେ ଘଟିଥିବା ଦଳାଚକଟା ଭଳି ଘଟଣା ରୋକିବା ପାଇଁ ଏକ ସ୍ବତନ୍ତ୍ର SOP ତିଆରି କରିବାକୁ ନିର୍ଦ୍ଦେଶ ଦେବା ପାଇଁ ମାଡ୍ରାସ୍ ହାଇକୋର୍ଟରେ ୪ଟି ଜନସ୍ବାର୍ଥ ମାମଲା ଦାୟର ହୋଇଥିଲା । ଆଉ ଏହି ଜନସ୍ବାର୍ଥ ମାମଲାର ଶୁଣାଣି କରି ହାଇକୋର୍ଟ ଏଭଳି ନିର୍ଦ୍ଦେଶ ଦେଇଛନ୍ତି ।

କେତେ ଦିନ ପର୍ଯ୍ୟନ୍ତ ରାଲି କରାଯିବ ନାହିଁ ?

କରୁର ଦଳାଚକଟା ମାମଲାରେ କୋର୍ଟଙ୍କ ନିର୍ଦ୍ଦେଶ ପରେ, ରାଜ୍ୟ ସରକାର କୋର୍ଟଙ୍କୁ ଆଶ୍ୱାସନା ଦେଇଛନ୍ତି ଯେ ରାଲି ପାଇଁ SOP ନ ଆସିବା ପର୍ଯ୍ୟନ୍ତ ରାଜ୍ୟ ଏବଂ ଜାତୀୟ ରାଜପଥରେ କୌଣସି ସମାବେଶକୁ ଅନୁମତି ଦିଆଯିବ ନାହିଁ। ତଥାପି, ପୂର୍ବ-ନିର୍ଦ୍ଧାରିତ ସ୍ଥାନରେ ରାଲି କିମ୍ବା ସମାବେଶ କରାଯାଇପାରିବ।

ଅଧିକ ପଢ଼ନ୍ତୁ: ଟ୍ରଫି ଚୋରଙ୍କୁ ପାକିସ୍ତାନରେ ସମ୍ମାନ ! ମୋହସିନ୍ ନକଭିଙ୍କୁ ମିଳିବ ଗୋଲ୍ଡ ମେଡାଲ

ପୋଲିସକୁ ଭର୍ତ୍ସନା

ବିଚାରପତି ସେନ୍ଥିଲକୁମାର ସାମ୍ପ୍ରତିକ କରୁର ଦଳାଚକଟା ପାଇଁ ତାମିଲନାଡୁ ପୋଲିସକୁ କଡ଼ା ସମାଲୋଚନା କରିଛନ୍ତି। କୋର୍ଟ ପୋଲିସକୁ ଭର୍ତ୍ସନା କରିଛନ୍ତି ଏବଂ ପଚାରିଛନ୍ତି ଯେ ଘଟଣା ସମ୍ପର୍କରେ ମାମଲା ପଞ୍ଜିକୃତ ହୋଇଛି କି ନାହିଁ। ସେ ପୋଲିସକୁ ପ୍ରଶ୍ନ କରି କହିଥିଲେ, "ଏହି ଦଳାଚକଟା ସମ୍ପର୍କରେ କାହିଁକି ମାମଲା ରୁଜୁ କରାଯାଇନାହିଁ? ଯଦିଓ କୌଣସି ଅଭିଯୋଗ ଦାଖଲ ହୋଇନାହିଁ ତଥାପି ପୋଲିସକୁ ମାମଲା ରୁଜୁ କରିବାକୁ ପଡିବ।"

SITକୁ ଦାୟିତ୍ୱ ଦିଆଯାଇଛି

କରୁର ଦଳାଚକଟା ମାମଲାର ତଦନ୍ତ ପାଇଁ କୋର୍ଟ ଏକ SIT ଗଠନ କରିଛନ୍ତି। ଏହି ଦଳର ନେତୃତ୍ୱ ଇନ୍ସପେକ୍ଟର ଜେନେରାଲ ଆସ୍ରା ଗର୍ଗ ନେବେ। କୋର୍ଟ କରୁର ପୋଲିସକୁ ମାମଲା ସହିତ ଜଡିତ ସମସ୍ତ କାଗଜପତ୍ର ତୁରନ୍ତ SIT କୁ ହସ୍ତାନ୍ତର କରିବାକୁ ନିର୍ଦ୍ଦେଶ ଦେଇଛନ୍ତି।

ପୀଡିତଙ୍କ ପ୍ରତି ସମବେଦନା ପ୍ରକାଶ କରିଛନ୍ତି

ପିଟିସନର ଶୁଣାଣି କରିବା ସମୟରେ, ଜଷ୍ଟିସ ସେନ୍ଥିଲକୁମାର ଦଳାଚକଟାରେ ଆହତ ହୋଇଥିବା ପୀଡିତଙ୍କ ପ୍ରତି ସମବେଦନା ପ୍ରକାଶ କରିଛନ୍ତି। ଜଷ୍ଟିସ କହିଛନ୍ତି ଯେ ଘଟଣାର ଭିଡିଓ ଦେଖିବା ଯନ୍ତ୍ରଣାଦାୟକ ଥିଲା। ।

ସୂଚନା ଅନୁସାରେ, ଟିଭିକେ ନେତା ବିଜୟ ସେପ୍ଟେମ୍ବର ୨୭ ତାରିଖରେ କରୁରରେ ଏକ ନିର୍ବାଚନ ପ୍ରଚାର ରାଲି କରିଥିଲେ। ରାଲିଟି ହଠାତ୍ ଏକ ଭୟଙ୍କର ଦୁର୍ଘଟଣାରେ ପରିଣତ ହୋଇଥିଲା । ଦଳାଚକଟା ଫଳରେ ୪୧ ଜଣଙ୍କର ମୃତ୍ୟୁ ହୋଇଥିଲା ଏବଂ ଅନେକ ଆହତ ହୋଇଥିଲେ । ଆହତମାନଙ୍କୁ ତୁରନ୍ତ ଡାକ୍ତରଖାନାରେ ଭର୍ତ୍ତି କରାଯାଇଥିଲା।