Viral Girl Monalisa / ମହାକୁମ୍ଭ ମୋନାଲିସା ଘଟଣାରେ ନୂଆ ମୋଡ଼; ମୁସଲିମ ସ୍ଵାମୀ ଆଣିଲେ ବଡ଼ ଅଭିଯୋଗ

ମହାକୁମ୍ଭ ମେଳାର ଭାଇରାଲ ଗର୍ଲ ମୋନାଲିସା ଭୋସଲେଙ୍କ ବିବାହ ବିବାଦରେ ନୂଆ ମୋଡ଼ । କିଛି ଦିନ ପୂର୍ବରୁ ମୋନାଲିସା ନାବାଳିକା ବୋଲି ଜଣାପଡ଼ିଛି । ଏବେ ତାଙ୍କ ସ୍ୱାମୀ ଫରମାନ ବଡ଼ ଦାବି କରିଛନ୍ତି । ମୋନାଲିସା ତାଙ୍କୁ ଛାଡି ପଳାଇଥିବାବେଳେ ତାଙ୍କୁ ଖୋଜିବା ଲାଗି ସେ ରାଜସ୍ଥାନର ଆଜମେର ଆସିଥିବା କହିଛନ୍ତି । ଏପରି ଦାବି କରୁଥିବା ଫରମାନଙ୍କ ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି ।

• ଲୋକଙ୍କୁ ସାହାଯ୍ୟ ମାଗିଲେ ଫରମାନ

ଭିଡିଓରେ ଫରମାନ ଖାନ ରାଜସ୍ଥାନର ଆଜମେର ଏବଂ ପୁଷ୍କରରେ ଥିବାର ଦାବି କରିଛନ୍ତି । ମୋନାଲିସା ତାଙ୍କୁ ଛାଡ଼ି ପଳାଇଛନ୍ତି ଏବଂ ସେ ତାଙ୍କୁ ଖୋଜିବା ପାଇଁ ଏଠାକୁ ଆସିଥିବା କହିଛନ୍ତି । ଭିଡିଓରେ ଫରମାନ ସାହାଯ୍ୟ ପାଇଁ ନିବେଦନ କରୁଥିବାର ମଧ୍ୟ ଦେଖାଯାଉଛି । ଭିଡିଓଟି ଆସିବା ପରେ ଏବେ ମାମଲାରେ ଏକ ନୂତନ ମୋଡ଼ ଆସିଛି ।

• କେରଳରେ ଫରମାନଙ୍କୁ ବିବାହ କରିଥିଲେ ମୋନାଲିସା

ଭାଇରାଲ ଗର୍ଲ ମୋନାଲିସା ଭୋସଲେ ନିକଟରେ ଫରମାନ ଖାନଙ୍କୁ ବିବାହ କରିଥିଲେ । ଏହି ବିବାହ ସୋସିଆଲ ମିଡିଆରେ ସମାଲୋଚନାର ଶିକାର ହୋଇଥିଲା । କେହି ଏହାକୁ ଲଭ୍ ଜିହାଦ ବୋଲି କହିଥିଲେ । ଏହି ସମୟରେ ଜାତୀୟ ଅନୁସୂଚିତ ଜନଜାତି କମିଶନ (NCST) ତଦନ୍ତରୁ ଜଣାପଡିଛି ଯେ ମୋନାଲିସା ଜଣେ ନାବାଳିକା ଏବଂ ନାବାଳିକା ହୋଇ ଫରମାନ ତାଙ୍କୁ ବିବାହ କରିଥିବାରୁ ଏହି ଘଟଣା ଏବେ ଆହୁରି ବିବାଦୀୟ ହୋଇପଡ଼ିଛି । ଏହା ଜଣାପଡ଼ିବା ପରେ ଘୁମନ୍ତୁ ପାରଧି ସମ୍ପ୍ରଦାୟର ସଦସ୍ୟମାନେ ମଧ୍ୟ ପ୍ରଦେଶ ରାଜ୍ୟପାଳ ମଙ୍ଗୁଭାଇ ପଟେଲଙ୍କୁ ଏକ ସ୍ମାରକପତ୍ର ପ୍ରଦାନ କରିଛନ୍ତି, ଯେଉଁଥିରେ ମୋନାଲିସାଙ୍କ ବିବାହକୁ "ଅମାନ୍ୟ" ଘୋଷଣା କରିବାକୁ ଦାବି କରାଯାଇଛି ।

• ବିବାହକୁ ଲଭ୍ ଜିହାଦ୍ କହିଲା ପରିବାର

ମାର୍ଚ୍ଚ ମାସରେ କେରଳର ଥିରୁଅନନ୍ତପୁରମରେ ମୋନାଲିସା ଏବଂ ଫରମାନ ଖାନ ହିନ୍ଦୁ ରୀତିନୀତି ଅନୁଯାୟୀ ବିବାହ କରିବା ପରେ, ମୋନାଲିସାଙ୍କ ପରିବାର ଏହି ବିବାହକୁ "ଲଭ୍ ଜିହାଦ" ବୋଲି କହିଥିଲେ ଏବଂ ସେ ଜଣେ ନାବାଳିକା ବୋଲି ଦାବି କରିଥିଲେ । ତଦନ୍ତ ପରେ ମଧ୍ୟପ୍ରଦେଶର ଖାରଗନ ପୋଲିସ ମୋନାଲିସାଙ୍କ ସ୍ୱାମୀଙ୍କ ବିରୋଧରେ POCSO ମାମଲା ରୁଜୁ କରିଛି । ଭାରତୀୟ ନ୍ୟାୟ ସଂହିତା ଏବଂ ଅନୁସୂଚିତ ଜାତି ଏବଂ ଜନଜାତି (ଅତ୍ୟାଚାର ନିବାରଣ) ଆଇନ ଅନୁଯାୟୀ ଅପରାଧିକ ଷଡ଼ଯନ୍ତ୍ର ଏବଂ ଅବୈଧ ବିବାହ ସହିତ ଜଡିତ ଧାରା ଅନୁଯାୟୀ ଫରହାନଙ୍କ ବିରୁଦ୍ଧରେ ମାମଲା ରୁଜୁ କରାଯାଇଛି ।

ପଢନ୍ତୁ ଏହି ଖବର: ବାହା ହେଲେ କୁମ୍ଭମେଳାର ଭାଇରାଲ ଗାର୍ଲ ମୋନାଲିସା: ପ୍ରେମିକ ଫରମାନ୍ ସହ ଥାନାରେ ଦ୍ୱାରସ୍ଥ ହେଲେ ମୋନାଲିସା

ଆନୁଷ୍ଠାନିକ ରିପୋର୍ଟ ଅନୁସାରେ, ମୋନାଲିସା ୨୦୦୯ ମସିହା ଡିସେମ୍ବର ୩୦ ତାରିଖରେ ଜନ୍ମ ଗ୍ରହଣ କରିଥିବାବେଳେ ବିବାହ ବେଳକୁ ତାଙ୍କୁ ୧୬ ବର୍ଷ ୨ ମାସ ଓ ୧୨ ଦିନ ହୋଇଥିଲା । ତାଙ୍କ ବିବାହ ଚଳିତ ବର୍ଷ ମାର୍ଚ୍ଚ ୧୧ ତାରିଖରେ ହୋଇଥିଲା । ପ୍ରୟାଗରାଜ କୁମ୍ଭମେଳା ସମୟରେ ଜଣେ କଣ୍ଟେଣ୍ଟ କ୍ରିଏଟରଙ୍କ ଦ୍ଵାରା ମୋନାଲିସା ଭାଇରାଲ ହୋଇଥିଲେ । ଏବେ ମୁସଲିମ ସମ୍ପ୍ରଦାୟର ଯୁବକଙ୍କୁ ବିବାହ କରିବା ଓ ନାବାଳିକା ବୋଲି ଜଣାପଡ଼ିବା ପରେ ସେ ଚର୍ଚ୍ଚାରେ ଅଛନ୍ତି ।