Argus News - ବାପା ସହ ହେଲା ଗଣ୍ଡଗୋଳ; ପୁଅ ଉପରେ ରାଗ ଶୁଝାଇଲା ଅଭିଯୁକ୍ତ

କ୍ରୋଧର ବଶବର୍ତ୍ତୀ ହୋଇ ଭୁଲିଗଲା ମଣିଷ ପଣିଆ । ଅଜ୍ଞାନୀ ସାଜିଲା ଏ ବୁଦ୍ଧିମାନ ମଣିଷ । ପ୍ରତିଶୋଧ ନିଆଁରେ ଜଳି କୋମଳମତୀ ଶିଶୁକୁ ବି ଛାଡ଼ିଲାନି । ଏ ଦୁନିଆକୁ ବୁଝିନଥିବା କୋମଳୀମତୀ ଶିଶୁ କଲା ଆଘାତ । ହିଂସା, ରାଗରୁଷା ଜାଣିନଥିବା ଶିଶୁକୁ ଦେଲା ଦଣ୍ଡ । ଏ ଖବର ସମସ୍ତଙ୍କୁ ବ୍ୟଥିତ କରିଛି । ବାପା ସହ ଗଣ୍ଡଗୋଳ ହେବା ପରେ ୪ ବର୍ଷର କୁନିପୁଅକୁ ଘୋଷାଡ଼ି ମାଡ଼ ମାରିଛି ଦୁର୍ବୃତ୍ତ ।

ମହାରାଷ୍ଟ୍ରର ଭାସାଇ (ମୁମ୍ବାଇ ସଂଲଗ୍ନ ଏକ ଅଞ୍ଚଳ)ରେ ଘଟିଛି ଏହି ଘଟଣା । ଅଭିଯୁକ୍ତ ଜଣେ ବ୍ୟକ୍ତିଙ୍କ ସହ ଝଗଡ଼ା କରିବା ପରେ ତାଙ୍କ ୪ ବର୍ଷର ପୁଅକୁ ତଳେ ପକାଇ ଦେଇଥିଲେ ଏବଂ କୁନିପୁଅର ମୁଣ୍ଡକୁ ଲୁହା ରଡ୍ ରେ ପିଟି ଦେଇଥିଲେ । ଏକ ଛୋଟ କଥାକୁ ନେଇ ହୋଇଥିବା ଝଗଡ଼ା ପରବର୍ତ୍ତୀ ସମୟରେ ପ୍ରତିଶୋଧପରାୟଣ ଏବଂ ଭୟଙ୍କର ରୂପ ନେଇଥିଲା । ଏହି ନୃଶଂସ ଘଟଣାଟି ଏକ ହାଉସିଂ ସୋସାଇଟିରେ ଘଟିଥିବାବେଳେ ପୂରା ଘଟଣା ସିସିଟିଭିରେ କଏଦ ହୋଇଛି ।

• ସଭିଙ୍କୁ ବ୍ୟଥିତ କରୁଛି ଏହି ଖବର

ଭିଡିଓରେ ଦେଖାଯାଉଛି ଯେ ଭିଗ୍ନେଶ ନାମକ ବାଳକଟି ହଳଦିଆ ଟି-ସାର୍ଟ ପିନ୍ଧି ଏକ ପାର୍କିଂ ହୋଇଥିବା ଅଟୋରିକ୍ସାରେ ବସି ଅନ୍ୟ ପିଲାମାନଙ୍କ ସହିତ ଖେଳୁଛି । ଅଭିଯୁକ୍ତ ବ୍ୟକ୍ତି ସନ୍ଦୀପ ପାୱାରର ଏକ ସାମାନ୍ୟ କଥାକୁ ନେଇ ଭିଗ୍ନେଶର ବାପା ସହ ଝଗଡ଼ା ହୋଇଥିଲା । ସେ ପ୍ରତିଶୋଧ ନେବା ଲାଗି ଭିଗ୍ନେଶ ପାଖକୁ ଯାଇ ପ୍ରଥମେ ତାର ଗୋଡ଼କୁ ଟାଣି ଗାଡ଼ିରୁ ବାହାରକୁ ଟାଣି ଆଣିଥିଲା ।

ପଢନ୍ତୁ ଏହି ଖବର: ସହିପାରିଲେନି ସ୍ଵାମୀଙ୍କ ମୃତ୍ୟୁ ଦୁଃଖ; ୧୭ ମହଲାରୁ ଡେଇଁଲେ ମହିଳା

ସିସିଟିଭିରେ ନୀଳ ସାର୍ଟ ଏବଂ କଳା ପ୍ୟାଣ୍ଟ ପିନ୍ଧିଥିବା ବ୍ୟକ୍ତି ତଥା ଅଭିଯୁକ୍ତ ପାୱାର ଭିଗ୍ନେଶ ଘୋଷାଡ଼ି ଆଣି ଥରେ ତଳେ ପକାଇ ଦେଇଥିଲା । ଏହାପରେ ଏକ ଲୁହା ରଡରେ କୁନିପୁଅର ମୁଣ୍ଡକୁ ବାଡ଼ାଇଥିଲା । ଏତିକିରେ ତାର ମନ ବୁଝିନଥିଲା ଯେ ପୁଅର ବାପାଙ୍କ ସହ ହୋଇଥିବା ଝଗଡ଼ାର ପ୍ରତିଶୋଧ ନେବା ପାଇଁ କୁନିପୁଅକୁ ପୁଣି ତଳେ ପକାଇ ଦେଇଥିଲା ।

• ହସ୍ପିଟାଲରେ ଚିକିତ୍ସିତ ହେଉଛି ଭିଗ୍ନେଶ

ପୁଅଟିକୁ ତୁରନ୍ତ ମୀରା ରୋଡର ଏକ ହସ୍ପିଟାଲକୁ ନିଆଯାଇଥିଲା, ଯେଉଁଠାରେ ସେ ବର୍ତ୍ତମାନ ଆଇସିୟୁରେ ଭର୍ତ୍ତି ହୋଇଛି । ଅଧିକାରୀମାନେ କହିଛନ୍ତି ଯେ ତାର ଅବସ୍ଥା ସଙ୍କଟାପନ୍ନ ରହିଛି । ଅନ୍ୟପଟେ ସ୍ଥାନୀୟ ପୋଲିସ ଅଧିକାରୀମାନେ କହିଛନ୍ତି ଯେ ଘଟଣାକୁ ତଦନ୍ତ କରିବା ପରେ ଅଭିଯୁକ୍ତକୁ ପରେ ଗିରଫ କରାଯାଇଥିଲା ଏବଂ ତା' ବିରୁଦ୍ଧରେ ବିଭିନ୍ନ ଧାରା ଅନୁଯାୟୀ ମାମଲା ରୁଜୁ କରାଯାଇଛି । ଏହି ଘଟଣା ଅଞ୍ଚଳରେ ବ୍ୟାପକ ଉତ୍ତେଜନା ସୃଷ୍ଟି କରିଥିଲା ଏବଂ ବାସିନ୍ଦାମାନେ ଅଭିଯୁକ୍ତର ଏପରି ମାନସିକତାକୁ ନେଇ ଚିନ୍ତା ପ୍ରକଟ କରିଛନ୍ତି ।