Argus News - ଅବସରପ୍ରାପ୍ତ ବିଚାରପତିଙ୍କ ଝିଅର ଛାଡ଼ପତ୍ର; ଢୋଲ ବଜାଇ ଏମିତି କଲେ ସ୍ଵାଗତ

ବାଜୁଥିଲା ଢୋଲ । ସମସ୍ତେ ପିନ୍ଧିଥିଲେ ଏକ ନିଆରା ଟି-ସାର୍ଟ । ବେକରେ ଫୁଲ ମାଳ ପଡ଼ିଥିଲା ଓ ସମସ୍ତେ ପରସ୍ପରକୁ ମିଠା ଖୁଆଉଥିଲେ । ବିବାହ ବେଳେ ଯେମିତି ଝିଅକୁ ବିଦା କରିଥିଲେ, ଠିକ୍ ସେହିପରି ଛାଡ଼ପତ୍ର ପରେ ଝିଅକୁ ସ୍ଵାଗତ କରିଛନ୍ତି ବାପ ଘର ଲୋକେ । ତାକୁ ପର ନାରୀ ଭଳି ବ୍ୟବହାର କରିନାହାନ୍ତି, ବରଂ ଘରର ସେହି ଅବିବାହିତ ଝିଅ ପରି ପାଛୋଟି ନେଇଛନ୍ତି । ଏହି ଦୃଶ୍ୟ ସମାଜକୁ ଏକ ନିଆରା ବାର୍ତ୍ତା ଦେଉଥିବାବେଳେ ସୋସିଆଲ ମିଡିଆରେ ଖୁବ ଭାଇରାଲ ହେବାରେ ଲାଗିଛି ।

ମେରଠର ଶାସ୍ତ୍ରୀ ନଗରରୁ ଆସିଛି ଏହି ଦୃଶ୍ୟ । ଅବସରପ୍ରାପ୍ତ ବିଚାରପତି ନିଜ ଝିଅକୁ ଛାଡ଼ପତ୍ର ପରେ ଏପରି ଢଙ୍ଗରେ ସ୍ଵାଗତ କରିଛନ୍ତି । ଆଜି ବି ଯେଉଁ ସମାଜ ଜଣେ ଛାଡ଼ପତ୍ର ମହିଳାକୁ ସହଜରେ ଗ୍ରହଣ କରିନାହାନ୍ତି । ଆଜି ବି ଏମିତି କିଛି ପରିବାର ଅଛି, ଯିଏକି ଛାଡ଼ପତ୍ର ବଦଳରେ ବୁଝାମଣା କରି ସ୍ଵାମୀ ସହ ରହିବାକୁ ଝିଅକୁ ବାଧ୍ୟ କରନ୍ତି । ହେଲେ ଏଠାରେ ଅବସରପ୍ରାପ୍ତ ବିଚାରପତି ନିଜ ଝିଅକୁ ସମର୍ଥନ କରିବା ସହ ତାକୁ ଘରକୁ ନିଆରା ଢଙ୍ଗରେ ସ୍ଵାଗତ କରିଛନ୍ତି ।

• କଣ ପୂରା ଘଟଣା ?

ଉତ୍ତର ପ୍ରଦେଶ ମେରଠ ଶାସ୍ତ୍ରୀନଗରର ଅଧିବାସୀ ଅବସରପ୍ରାପ୍ତ ଜଣେ ବିଚାରପତି ନିଜ ଝିଅ ପ୍ରତୀକ୍ଷାର ୨୦୧୮ରେ ଶାହଜାହାଁପୁରର ମେଜର ଗୌରବ ଅଗ୍ନିହୋତ୍ରୀଙ୍କ ସହିତ ଧୁମଧାମରେ ବିବାହ କରିଥିଲେ । ବିବାହ ଉପରେ ଉଭୟଙ୍କ ଏକ ପୁଅ ମଧ୍ୟ ହୋଇଥିଲା । ବିବାହର ପ୍ରାରମ୍ଭରୁ ସବୁକିଛି ଠିକ୍ ଥିଲା, ହେଲେ ସମ୍ପର୍କ ପୁରୁଣା ହେବା ସାଙ୍ଗକୁ ଦମ୍ପତିଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଇଥିଲା । ଶାଶୂଘରର ନିର୍ଯାତନା ଓ ଦମ୍ପତିଙ୍କ ମଧ୍ୟରେ ପାଟିତୁଣ୍ଡ ସେମାନଙ୍କ ସମ୍ପର୍କକୁ ଦୁର୍ବଳ କରିଥିଲା । ପରିସ୍ଥିତି ଏପରି ହୋଇଥିଲା କି ଶେଷରେ ଘରୋଇ କଳି ଅଦାଲତରେ ପହଞ୍ଚିଥିଲା ।

ପଢନ୍ତୁ ଏହି ଖବର: ଚାକିରିରୁ ବିଦା ହେଲା ସ୍ତ୍ରୀ; ମାଲିକଙ୍କୁ ପିଟିଲେ ସ୍ଵାମୀ, ଭିଡିଓ ଭାଇରାଲ

ବହୁ ବର୍ଷ ଧରି ଏହି ମାମଲା ବିଚାରଧୀନ ରହିବା ପରେ ଶେଷରେ ୨୦୨୬ ଏପ୍ରିଲ ୪ ତାରିଖରେ ଅଦାଲତ ଛାଡ଼ପତ୍ର ପାଇଁ ଅନୁମତି ଦେଇଥିଲେ । ସାଧାରଣତଃ ଛାଡ଼ପତ୍ର ପରେ ଝିଅ ଘର ଚିନ୍ତାରେ ପଡ଼ିଯାଆନ୍ତି, କିନ୍ତୁ ଅବସରପ୍ରାପ୍ତ ବିଚାରପତି ଜଣକ ନିଜ ଝିଅର ଦୁଃଖର ସମୟରେ ତା ସହ ରହିଛନ୍ତି । ସେ ଝିଅକୁ ସମ୍ମାନର ସହ ପୁଣି ଘରେ ସ୍ଵାଗତ କରିଛନ୍ତି । ଯେତେବେଳେ ପ୍ରତୀକ୍ଷା ବାପ ଘରେ ପହଞ୍ଚିଥିଲେ, ସେତେବେଳେ ପୂର୍ବରୁ ଉପସ୍ଥିତ ଢୋଲବାଲା ବାଜା ବଜାଇଥିଲେ । ପ୍ରତୀକ୍ଷାଙ୍କ ପିତା ଏକ ଭିନ୍ନ ସାର୍ଟ ପିନ୍ଧିଥିଲେ, ଯେଉଁଥିରେ 'ଆଇ ଲଭ୍ ମାଇଁ ବିଟିୟା' ବା 'ମୁଁ ମୋ ଝିଅକୁ ଭଲ ପାଏ' ବୋଲି ଲେଖାଥିଲା ।

• ଭାବବିହ୍ଵଳ ଦେଖଣାହାରୀ

ଏହି ଦୃଶ୍ୟ ଉପସ୍ଥିତ ଲୋକଙ୍କୁ ଭାବବିହ୍ଵଳ କରିଥିଲା ସତ କିନ୍ତୁ ସମାଜକୁ ଏକ ଦୃଢ ବାର୍ତ୍ତା ଦେଇଥିଲା । ଅବସରପ୍ରାପ୍ତ ବିଚାରପତି ଜଣକ କହିଥିଲେ ଯେ ଝିଅ କେବେ ହେଲେ ପରିବାର ପାଇଁ ବୋଝ ନୁହେଁ, ବରଂ ପରିବାରର ଏକ ଅଭିନ୍ନ ଅଂଶ । ସେ ସମାଜକୁ ଏକ ସନ୍ଦେଶ ଦେଇଥିଲେ ଯେ ଝିଅ କେବେ ପୁଅଠୁ କମ ନୁହେଁ । ଯଦି ସେ ବିବାହରେ ଖୁସି ନାହିଁ, ତେବେ ଜୋରଜବରଦସ୍ତ ସେଠାରେ ତାକୁ ରହିବାକୁ ବାଧ୍ୟ କରିବା ଉଚିତ ନୁହେଁ ବୋଲି ସେ କହିଛନ୍ତି । ପ୍ରତୀକ୍ଷା ପ୍ରାୟ ୬ ବର୍ଷ ଧରି ନିର୍ଯାତିତ ହେବା ପରେ ଏବେ ସେ ମୁକ୍ତ ବୋଲି କହିଛନ୍ତି ତାଙ୍କ ପିତା ।