ଅଶାନ୍ତ ହୋଇପଡ଼ିଛି ମଧ୍ୟପ୍ରାଚ୍ୟ । ଗୁଳି, ଗୋଳାବାରୁଦ, ମିସାଇଲ ମାଡରେ କମ୍ପୁଛି ପରିବେଶ । ଦୁଇ ଦେଶ ଭିତରେ ହେଉଛି ରକ୍ତପାତ । ନିରୀହ ଲୋକଙ୍କ ଜୀବନ ବି ଯାଉଛି । ଯୁଦ୍ଧ ପାଇଁ ବିଶ୍ଵ କିଛି ଗୋଷ୍ଠୀ ମଧ୍ୟରେ ବିଭାଜିତ ହୋଇଛି । ବିଭିନ୍ନ ଦେଶ ନିଜ ସ୍ଵାର୍ଥ୍ୟ ଦୃଷ୍ଟିରୁ ଅଲଗା ଅଲଗା ଦେଶକୁ ସମର୍ଥନ କରୁଛନ୍ତି । ଏହାରି ମଧ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସୋମବାର ମଧ୍ୟପ୍ରାଚ୍ୟ ଯୁଦ୍ଧ ସଂଘର୍ଷ ଭିତରେ ଭାରତର ଆଭିମୁଖ୍ୟକୁ ନେଇ ଆଲୋଚନା କରିଛନ୍ତି । ଏହି କଠିନ ପରିସ୍ଥିତିରେ ଭାରତ ପ୍ରଗତି, ବିକାଶ, ବିଶ୍ଵାସର ଦୃଢ ସଂକଳ୍ପ ନେ ଆଗକୁ ବଢୁଛି ବୋଲି ମୋଦି କହିଛନ୍ତି ।

'ଆମେ ଭାରତର ହିତ ସହିତ ଅଛୁ'

ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି ଯେ ସମ୍ପ୍ରତି ଯେତେବେଳେ ଦୁନିଆ କେତୋଟି ଗୋଷ୍ଠୀରେ ବାଣ୍ଟି ହୋଇଛି, ସେତେବେଳେ ଭାରତ ମଜଭୁତ ସ୍ଥିତିରେ ଅଛି । ଏହି ଯୁଦ୍ଧରେ ଭାରତ କାହା ସପକ୍ଷରେ ଅଛି ବୋଲି ଲୋକେ ପ୍ରଶ୍ନ କରୁଛନ୍ତି । ଦେଶ ଭାରତୀୟଙ୍କ ସହିତ ଓ ଭାରତର ହିତ ସହିତ ଅଛି ବୋଲି ମୋଦି କହିଛନ୍ତି । ଆମ ଦେଶ ଭାରତ ଶାନ୍ତି ସହିତ ସର୍ବଦା ରହିଛି ବୋଲି କହିଛନ୍ତି ପିଏମ ମୋଦି । ଭାରତ ଗତ ୨୩ ଦିନ ମଧ୍ୟରେ ନିଜର ସମ୍ପର୍କ ସ୍ଥାପନ କରିବା ଓ ସଙ୍କଟକୁ ପ୍ରତିବନ୍ଧକ କରିବାର କ୍ଷମତାକୁ ପ୍ରଦର୍ଶନ କରିଛି । ମୋଦି ବିରୋଧୀଙ୍କୁ ଟାର୍ଗେଟ କରି କହିଛନ୍ତି ଯେ ମଧ୍ୟପ୍ରାଚ୍ୟ ଯୁଦ୍ଧ ସଙ୍କଟ ମଧ୍ୟରେ କିଛି ରାଜନୈତିକ ଦଳ ନିଜର ସ୍ଵାର୍ଥ୍ୟ ବଜାୟ ରଖିବା ଲାଗି ଏହାର ଫାଇଦା ନେବାକୁ ଉଦ୍ୟମ କରୁଛନ୍ତି ।

 ଏଥିସହ ପଢ଼ନ୍ତୁ: ଇରାନର ବାଚସ୍ପତିଙ୍କ ସହ ଆମେରିକା ଆଲୋଚନା କରିଥିବା ଦାବିକୁ ଖଣ୍ଡନ କଲା ଇରାନ

ଏଠାରେ କହିରଖୁଛୁ କି, ମଧ୍ୟପ୍ରାଚ୍ୟ ଯୁଦ୍ଧରେ ଇରାନ-ଇସ୍ରାଏଲ-ଆମେରିକା ମଧ୍ୟରେ ସଂଘର୍ଷ ହେଉଛି । ଏହି ସମୟରେ ଭାରତ କୌଣସି ଗୋଟିଏ ପକ୍ଷକୁ ବାଛିନାହିଁ । ଏହା ବଦଳରେ ସର୍ବଦା ଶାନ୍ତି ଓ ମୈତ୍ରୀର ବାର୍ତ୍ତା ବାଣ୍ଟୁଥିବା ଦେଶ ଭାରତ ସନ୍ତୁଳନ ଓ ରଣନୈତିକ ନୀତି ଆପଣାଇଛି । ଭାରତ ଲାଗି ଏହା ଏକ ଜଟିଳ କୂଟନୈତିକ ସନ୍ତୁଳନ, କାରଣ ଇସ୍ରାଏଲ ଭାରତର ଏକ ପ୍ରମୁଖ ରଣନୈତିକ ସମର୍ଥକ ଥିବାବେଳେ ଇରାନ ସହିତ ଦେଶର ଐତିହାସିକ ସମ୍ପର୍କ ରହିଛି । ମୋଟାମୋଟି ଭାବେ କହିବାକୁ ଗଲେ, ଭାରତ କୌଣସି ଏକ ଗୋଷ୍ଠୀରେ ରହିବା ପରିବର୍ତ୍ତେ କ୍ଷେତ୍ରୀୟ ସ୍ଥିରତା, କୂଟନୈତିକ ସମାଧାନ ଓ ନିଜର ଆର୍ଥିକ ଏବଂ ନାଗରିକଙ୍କ ସୁରକ୍ଷା ଉପରେ ଧ୍ୟାନ ଦେଇଛି ।

ଅଧିକ ଖବର ପଢନ୍ତୁ...