ନୂଆଦିଲ୍ଲୀ: ମୋବାଇଲ୍ ରିଚାର୍ଜକୁ ନେଇ ପୁଣି ବିବାଦ ସୃଷ୍ଟି ହୋଇଛି । ବିଭିନ୍ନ ଟେଲିକମ୍ କମ୍ପାନୀଙ୍କ ପ୍ରିପେଡ୍ ପ୍ଲାନ୍‌କୁ ସଂସଦରେ ପ୍ରଶ୍ନ ଉଠାଇଛନ୍ତି ସାଂସଦ । ବର୍ଷକ ୧୨ ମାସ ହୋଇଥିବା ବେଳେ ୧୩ ଥର ରିଚାର୍ଜ କରିବାକୁ ପଡ଼ୁଛି । ସେହିଭଳି ଗୋଟିଏ ମାସ ୩୦ ଦିନ ହୋଇଥିବା ବେଳେ ରିଚାର୍ଜର ବୈଧତା ୨୮ ଦିନ ରହୁଛି । ରିଚାର୍ଜ ପ୍ଲାନର ବୈଧତା ସରୁ ସରୁ ବନ୍ଦ ହୋଇ ଯାଇଛି ଇନକମିଂ କଲ୍ ଆସିବା ।

ସାଧାରଣ ଜନତାଙ୍କ ପକେଟ୍‌କୁ ବାଧୁଥିବା ଟେଲିକମ୍ କମ୍ପାନୀଙ୍କ ମହଙ୍ଗା ରିଚାର୍ଜ ପ୍ଲାନ ପ୍ରସଙ୍ଗ ସଂସଦରେ ଉଠିଛି । ସଂସଦରେ ଏନେଇ ପ୍ରଶ୍ନ କରିଛନ୍ତି ଆମ୍ ଆଦମୀ ପାର୍ଟିର ରାଜ୍ୟସଭା ସାଂସଦ ରାଘବ ଚଢ଼ା । ଯାହା ଏବେ ପୁଣି ମୋବାଇଲ୍ ରିଚାର୍ଜ ବିବାଦକୁ ନୂଆ ରୂପ ଦେଇଛି ।

ଏଥିସହ ପଢ଼ନ୍ତୁ: ରାଜ୍ୟସଭା ନିର୍ବାଚନ ପୂର୍ବରୁ ବଡ଼ ଟ୍ବିଷ୍ଟ୍‌, ଶଙ୍ଖ ଛାଡ଼ି ପଦ୍ମ ଧରିଲେ ରବୀନ୍ଦ୍ର ଜେନା

ରାଘବ ଚଢ଼ା କହିଛନ୍ତି, "ଟେଲିକମ୍ କମ୍ପାନୀ ବର୍ତ୍ତମାନର ରିଚାର୍ଜ ବ୍ୟବସ୍ଥା ସାଧାରଣ ଲୋକଙ୍କୁ ଲୁଚିଛପି ଲୁଟିଲା ଭଳି । କାରଣ ବ୍ୟବହାରକାରୀଙ୍କୁ ବର୍ଷକୁ ୧୨ ମାସ ବଦଳରେ ୧୩ ଥର ମୋବାଇଲ୍ ରିଚାର୍ଜ କରିବାକୁ ପଡ଼ୁଛି ।"

ଭାରତରେ ଅଧିକାଂଶ ପ୍ରିପେଡ୍ ମୋବାଇଲ୍ ପ୍ଲାନର ବୈଧତା ୨୮ ଦିନ। ଯାହାର ଅର୍ଥ ଜଣେ ବ୍ଯବହାରକାରୀ ସିମ୍‌କୁ ସକ୍ରିୟ ରଖିବା ଲାଗି ୧୨ ଥର ନୁହେଁ ବରଂ ବର୍ଷକରେ ୧୩ ଥର ରିଚାର୍ଜ କରିବାକୁ ପଡ଼ୁଛି । ୨୮ ଦିନ ହିସାବରେ ଦେଖିଲେ ୨୮ ଗୁଣନ ୧୩ ହେଉଛି ୩୬୪ ଦିନ । ଅର୍ଥାତ୍ ବର୍ଷକ ଲାଗି ଅତିରିକ୍ତ ରିଚାର୍ଜ କରିବାକୁ ପଡ଼ୁଛି ।

ଏହି ପ୍ରସଙ୍ଗକୁ ରାଘବ ଚଢା ସଂସଦରେ ଉଠାଇଛନ୍ତି । ସେ କହିଛନ୍ତି, "ଯଦି ପ୍ଲାନ ସତରେ ମାସିକ ତାହେଲେ ବୈଧତା ୩୦ କିମ୍ବା ୩୧ ଦିନ ହେବା କଥା । ପ୍ଲାନ ଗୁଡ଼ିକ ୨୮ ଦିନର ହୋଇଥିବାରୁ ବ୍ୟବହାରକାରୀ ପ୍ରତିବର୍ଷ ଗୋଟିଏ ଅତିରିକ୍ତ ରିଚାର୍ଜ କରୁଛନ୍ତି । ଫଳରେ କମ୍ପାନୀ ଗୁଡ଼ିକ ଅଧିକ ଫାଇଦା ପାଉଛନ୍ତି ।"

ଏଥିସହ ପଢ଼ନ୍ତୁ: ୟୁପି ପରେ ଆସାମରେ ଗଡ଼ିବ ସାଇକେଲ; କାହାର ବଢିବ ଅସୁବିଧା?

ରିଚାର୍ଜ ସରିଲେ କଲ୍ ଆସିବା ବନ୍ଦ

ରାଘବ ଚଢ଼ା ଆଉ ଏକ ଗୁରୁତ୍ଵପୂର୍ଣ୍ଣ ପ୍ରସଙ୍ଗ ଉଠାଇଛନ୍ତି । କହିଛନ୍ତି, "ଯଦି କୌଣସି ବ୍ୟବହାରକାରୀଙ୍କ ରିଚାର୍ଜ ସରି ଯାଉଛି ତ ଆଉଟ୍ ଗୋଇଙ୍ଗ୍ କଲ୍ ବନ୍ଦ ହେବା ବୁଝା ପଡ଼ୁଛି । କିନ୍ତୁ ଅନେକ ସମୟରେ କମ୍ପାନୀଗୁ଼ଡ଼ିକ ଇନକମିଂ କଲ୍ ଆସିବା ମଧ୍ୟ ବନ୍ଦ କରି ଦେଉଛନ୍ତି । ଯାହାକି ଲୋକଙ୍କ ପାଇଁ ସମସ୍ୟା ସୃଷ୍ଟି କରୁଛି । ଲୋକଙ୍କ ମୋବାଇଲ୍‌କୁ ଓଟିପି ଆସୁନି, ହଇରାଣ ହେବାକୁ ପଡ଼ୁଛି ।"

ସଂସଦରେ ପ୍ରିପେଡ୍ ମୋବାଇଲ୍ ରିଚାର୍ଜ ପ୍ରସଙ୍ଗ ଉଠିବା ପରେ ସୋସିଆଲ୍ ମିଡିଆରେ ପୁଣି ଥରେ ଚର୍ଚ୍ଚା, ବିତର୍କ ଆରମ୍ଭ ହୋଇଛି । ଅନେକ ଲୋକ ଏହାକୁ ଟେଲିକମ୍ କମ୍ପାନୀଙ୍କ ରଣନୀତି କହୁଛନ୍ତି । ଆଉ କେତକଙ୍କ ଅନୁସାରେ, ବିଲିଂ ବ୍ୟବସ୍ଥା ଅନୁସାରେ ଏହି ମଡେଲ୍‌କୁ ଆପଣାଯାଇଛି ।