ଭୋପାଳ: ଭୟଙ୍କର ଦୁର୍ଘଟଣା । ଜୀବନ ବଞ୍ଚାଇବକୁ ଟ୍ରେନ୍‌ରୁ ଟ୍ରାକ୍‌କୁ ଡେଇଁଲେ, ପ୍ରାଣ ଚାଲିଗଲା । ନିଆଁରୁ ରକ୍ଷା ପାଇବାକୁ ଟ୍ରେନ୍‌ରୁ ଡେଇଁବା ମହଙ୍ଗା ପଡ଼ିଛି । ଟ୍ରେନ୍ ଟ୍ରାକ୍‌ରେ ୪ ଜଣଙ୍କ ମୃତ୍ୟୁ ହୋଇଛି । ଏହି ଦୁଖଃଦ ଅଘଟଣ ଘଟିଛି ମଧ୍ୟପ୍ରଦେଶର ମୁରୈନାରେ ।

ସୂଚନା ଅନୁସାରେ ରବିବାର ଅପରାହ୍ ୪ଟା ୧୫ ସମୟରେ ଉଦୟପୁର ଇଣ୍ଟରସିଟି ଏକ୍ସପ୍ରେସ୍‌ରେ ନିଆଁ ଲାଗିଥିବା ଗୁଜବ ହୋଇଥିଲା । ଯାହାକୁ ନେଇ ଯାତ୍ରୀ ଭୟଭୀତ ହୋଇ ପଡ଼ିଥିଲେ । ଟ୍ରେନ୍‌ରେ ନିଆଁ ଲାଗିଥିବା ଖବର ଶୁଣି ଅନେକ ଯାତ୍ରୀ ଟ୍ରାକ୍‌କୁ ଡେଇଁ ପଡ଼ିଥିଲେ ।

ଏଥିସହ ପଢ଼ନ୍ତୁ: କିଲର୍ ଟ୍ରକ; ପହିଲି ରଜରେ ଚାଲିଗଲା ୫ ଜଣଙ୍କ ଜୀବନ 

ସେହି ସମୟରେ ଉକ୍ତ ଟ୍ରାକ୍‌ରେ ଆସୁଥିବା ଅନ୍ୟ ଏକ ଟ୍ରେନ୍‌ ଯାତ୍ରୀଙ୍କୁ ଧକ୍କା ଦେଇଥିଲା । ଯେଉଁଥିରେ ୪ ଜଣଙ୍କର ମୃତ୍ୟୁ ହୋଇଛି । ମୃତକଙ୍କ ମଧ୍ୟରେ ୩ ଜଣ ମହିଳା ଓ ଅନ୍ୟ ଜଣେ ଛୁଆ ରହିଛି । ମୁରୈନା ହେତମପୁର ଷ୍ଟେସନରେ ଏହି ଦୁର୍ଘଟଣା ଘଟିଛି ।

ସୂଚନା ମିଳିବା ମାତ୍ରେ ପୋଲିସ ଓ ରେଲୱେ ପ୍ରଶାସନର ଅଧିକାରୀ ହେତମପୁର ଷ୍ଟେସନରେ ପହଞ୍ଚିଛନ୍ତି । ସରାୟ ଛୋଲା ଥାନା ଅଧିକାରୀ ୪ ଜଣଙ୍କର ମୃତ୍ୟୁ ହୋଇଥିବା ସୂଚନା ଦେଇଛନ୍ତି । ଉଦୟପୁର ଇଣ୍ଟରସିଟି ଏକ୍ସପ୍ରେସରେ ନିଆଁ ଲାଗିଥିବା ଗୁଜବରୁ ଏହି ଅଘଟଣ ଘଟିଥିବା କହିଛି ପୋଲିସ ।

ରେଲୱେ ଦେଲା ସୂଚନା

ଏହି ଦୁର୍ଘଟଣା ନେଇ ଉତ୍ତର ମଧ୍ୟ ରେଲୱେ ସୂଚନା ଜାରି କରିଛି । ରେଲୱେ ଅନୁସାରେ, ଅପରାହ୍ଣ ୪ଟା ୧୫ ପାଖାପାଖି ଝାନ୍‌ସୀ ମଣ୍ଡଳର ହେତମପୁର-ଧୌଲପୁରରେ ଉଦୟପୁର ଇଣ୍ଟରସିଟି (୧୯୬୬୫)ର ଜେନେରାଲ୍ କୋଚ୍‌ରେ ଚେନ୍ ପୁଲିଂ କରାଯିବାରୁ ଗାଡ଼ି ଅଟକିଥିଲା ।

ଇଣ୍ଟରସିଟି ଏକ୍ସପ୍ରେସ୍ ଅଟକିବା କ୍ଷଣି କିଛି ଯାତ୍ରୀ ଟ୍ରେନ୍‌ରୁ ଓହ୍ଲାଇ ରେଳ ଧାରଣା ପାର୍ ହେଉଥିଲେ । ସେହି ସମୟରେ ଉକ୍ତ ଟ୍ରାକ୍‌ରେ ଫିରୋଜପୁର-ସିୱନି ପାତାଳକୋଟ୍ ଏକ୍ସପ୍ରେସ୍ (୨୦୪୨୪) ଆସୁଥିଲା । ଯେଉଁଥିରେ କିଛି ଯାତ୍ରୀଙ୍କ ମୃତାହତ ନେଇ ସୂଚନା ମିଳିଛି ।

ଏଥିସହ ପଢ଼ନ୍ତୁ: ଏୟାରବେସ୍‌ରେ ଭାରତୀୟ ବାୟୁ ସେନା ବିମାନ ୨ ଖଣ୍ଡ; ୫ ଯବାନଙ୍କ ମୃତ୍ୟୁ 

ଏହି ଅଘଟଣ ପରେ ରେଲୱେ ପ୍ରଶାସନ, ରେଲୱେ ସୁରକ୍ଷା ବଳ, ସରକାରୀ ରେଲୱେ ପୋଲିସ ଓ ସ୍ଥାନୀୟ ପ୍ରଶାସନର ଅଧିକାରୀ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲେ । ପ୍ରଭାବିତ ଯାତ୍ରୀଙ୍କୁ ସହାୟତା ପ୍ରଦାନ କରାଯାଇଛି । କିଭଳି ଏବଂ କେଉଁ ପରିସ୍ଥିତିରେ ଅଘଟଣ ଘଟିଲା ତାର ଛାନଭିନ୍ ଆରମ୍ଭ କରିଛି ରେଲୱେ ।