Nepal Survivor Story / ୨ ଦିନ, ଗୋଟିଏ ରାତି ମୃତ୍ୟୁ ସହ ସଂଗ୍ରାମ; ନେପାଳରୁ ଫେରିବା ପରେ ଛାତିଥର କାହାଣୀ ବଖାଣିଲେ

ନେପାଳ ପ୍ରଳୟଙ୍କାରୀ ବନ୍ୟା ଶହ ଶହ ଲୋକଙ୍କୁ ଦାଣ୍ଡରେ ଠିଆ କରିଛି । କାହାର ଘର ଭାସିଯାଇଛି । କାହାର ଆପଣା ଲୋକେ ହଜିଯାଇଛନ୍ତି । କିଏ ସୁଡ଼ଙ୍ଗ ତଳେ କିଟିକିଟି ଅନ୍ଧାର ଭିତରେ ଦିନରାତି କାଟିଛି । ପ୍ରକୃତିର ତାଣ୍ଡବ ଆଗରେ କିଏ ହାର ମାନି ଶେଷ ନିଶ୍ଵାସ ତ୍ୟାଗ କରିଛି ତ ଆଉ କିଏ ଚମତ୍କାର ଘଟିଲା ପରେ ଜୀବନ୍ତ ଫେରୁଛି । ଏଠି ବି ଏମିତି କିଛି ଘଟିଛି । ମୃତ୍ୟୁକୁ ମାତ୍ ଦେଇ ହିମାଚଳପ୍ରଦେଶର ଜଣେ ବ୍ୟକ୍ତି ଘରକୁ ଫେରିବା ପରେ ଛାତିଥରା କାହାଣୀ ବଖାଣିଛନ୍ତି ।

ହିମାଚଳ ପ୍ରଦେଶ ମଣ୍ଡି ଜିଲ୍ଲାର ସୁନ୍ଦରନଗର ଅଞ୍ଚଳର ଅଧିବାସୀ ୫୦ ବର୍ଷୀୟ ଜ୍ଞାନ ସିଂହ । ସେ ଗତ ୩୦ ବର୍ଷ ପରି ପାୱାର ପ୍ରୋଜେକ୍ଟରେ କାମ କରୁଛନ୍ତି । କିନ୍ତୁ ଗତ ୮ ମାସ ଧରି ସେ ନେପାଳର ବିଦ୍ୟୁତ ପ୍ରକଳ୍ପରେ ଜଣେ ଫୋରମ୍ୟାନ୍ ବା ସୁପରଭାଇଜର ଭାବେ କାମ କରୁଥିଲେ । ଅଗଷ୍ଟ ୨୬ ତାରିଖରେ ଯେତେବେଳେ ନେପାଳରେ ହଠାତ୍ ବନ୍ୟା ଆସିଥିଲା, ସେତେବେଳେ ଜ୍ଞାନ ପ୍ରକଳ୍ପର ପାୱାର ହାଉସରେ ନିଜର ଡ୍ୟୁଟି କରୁଥିଲେ ।

• ଛାତିଥର କାହାଣୀ ବଖାଣିଲେ

ବନ୍ୟା ପ୍ରଭାବିତ ଜ୍ଞାନ ସେହି କାଳ ରାତିକୁ ମନେ ପକାଇ କହିଥିଲେ, "ହଠାତ୍ ବନ୍ୟା ପାଣି ଆସିଥିଲା । ତା'ପରେ ଆମେ ସମସ୍ତେ ପାହାଡ଼ ଆଡ଼କୁ ଦୌଡ଼ିବାକୁ ଲାଗିଲୁ । ନେପାଳ ବାୟୁସେନା ବ୍ୟତୀତ ବଞ୍ଚିବାର ଆଉ କୌଣସି ଆଶା ନଜର ଆସୁନଥିଲା । ଗୋଟିଏ ରାତି, ଦୁଇ ଦିନ ମୃତ୍ୟୁ ସହ ସଂଗ୍ରାମ କଲୁ । ଏମିତି ଏକ ସମୟ ଆସିଥିଲା ଯେ ବଞ୍ଚିବାର କୌଣସି ରାସ୍ତା ନଜର ଆସୁନଥିଲା । ତଥାପି ଆମେ ସାହାସ ରଖିଥିଲୁ । ପରେ ନେପାଳ ସେନା ହେଲିକପ୍ଟର ସାହାଯ୍ୟରେ ଆମକୁ ଉଦ୍ଧାର କରିଥିଲା ।"

• ୧୦୦ ଲୋକଙ୍କ ସହ ଫସିଥିଲେ

ଜ୍ଞାନ ସିଂହ କହିଥିଲେ ଯେ ସେ ଯେଉଁଠି ଫସିଯାଇଥିଲେ, ସେଠାରେ ଆଉ ୧୦୦ ଜଣ ଲୋକ ଥିଲେ । କେବଳ ଜଣକୁ ଛାଡ଼ି ବାକି ସମସ୍ତଙ୍କୁ ଉଦ୍ଧାର କରାଯାଇଛି । ହେଲେ ସେହି ଯୁବକ ଜଣକ ଏବେ ବି ପ୍ରୋଜେକ୍ଟରେ ଫସି ରହିଛନ୍ତି । ସେ କହିଛନ୍ତି ଯେ ତାଙ୍କ ପ୍ରକଳ୍ପରେ କାମ କରୁଥିବା ୯୮ ଜଣ ଲୋକ ଏବେ ବି ନିଖୋଜ ଅଛନ୍ତି । ଏହି ପ୍ରକଳ୍ପରେ ତାଙ୍କ ସହିତ ହିମାଚଳରୁ ଆଉ ୪ ଜଣ କାମ କରୁଥିଲେ । ସମସ୍ତଙ୍କ ମଧ୍ଯରୁ ୩ ଜଣ ସୁରକ୍ଷିତ ଭାବେ ଫେରିଆସିଛନ୍ତି । ଏବେ ଉନା ଜିଲ୍ଲାର ଜଣେ ଯୁବକ ନିଖୋଜ ଅଛନ୍ତି ।

ପଢନ୍ତୁ ଏହି ଖବର: ଏବେ ବି ସରିନି ଜୀବନର ଆଶା; ନେପାଳ ପ୍ରଳୟଙ୍କରୀ ବନ୍ୟାର ୯ ଦିନ ପରେ ଚମତ୍କାର

• ସୁରକ୍ଷିତ ଭାବେ ଘରେ ପହଞ୍ଚିଲେ

ଜ୍ଞାନ ସିଂହଙ୍କ ପତ୍ନୀ କଲାୱତୀ କହିଛନ୍ତି ଯେ ବନ୍ୟା ଖବର ଶୁଣିବା ପରେ ସେ ନିଜ ସ୍ଵାମୀଙ୍କ ସହିତ କୌଣସି ଯୋଗାଯୋଗ କରିପାରୁନଥିଲେ । ଏଥିଲାଗି ସେ ଭୟଭୀତ ହୋଇପଡ଼ିଥିଲେ । ମାତ୍ର ଦ୍ଵିତୀୟ ଦିନ ତାଙ୍କ ସ୍ଵାମୀ ଫୋନ କରିଥିଲେ ଓ ଏହାପରେ ସେ ଦୀର୍ଘ ନିଶ୍ଵାସ ନେଇଥିଲେ । ସ୍ଵାମୀ ସୁରକ୍ଷିତ ଭାବେ ଫେରିଆସିବା ପରେ କଲାୱତୀ ଦେବାଦେବୀଙ୍କୁ କୋଟି କୋଟି ଧନ୍ୟବାଦ ଜଣାଇଛନ୍ତି । ଏପରି ପ୍ରକୃତିର ତାଣ୍ଡବରୁ ଜୀବିତ ଫେରିବା ଭଗବାନଙ୍କ ଆଶୀର୍ବାଦ ଛଡ଼ା ଆଉ କିଛି ନୁହେଁ ବୋଲି ସେ କହିଛନ୍ତି ।