Israel PM Benjamin Netanyahu: ମଧ୍ୟପ୍ରାଚ୍ୟରେ ଜାରି ରହିଥିବା ଉତ୍ତେଜନା ମଧ୍ୟରେ, ଭାରତ ସହ ସମ୍ପର୍କକୁ ନେଇ ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ ଦେଇଥିବା ବୟାନ ଏବେ ଚର୍ଚ୍ଚାର ବିଷୟ ପାଲିଟିଛି। ଗତ ଗୁରୁବାର ୱେଷ୍ଟ ବ୍ୟାଙ୍କ ଠାରେ ଆୟୋଜିତ ଏକ ସମ୍ମିଳନୀରେ ଯୋଗ ଦେବା ଅବସରରେ ପ୍ରଧାନମନ୍ତ୍ରୀ ନେତାନ୍ୟାହୁ କହିଛନ୍ତି ଯେ ଇସ୍ରାଏଲ୍କୁ ବିଶ୍ୱର ଅନ୍ୟ କୌଣସି ଦେଶ ତୁଳନାରେ ଭାରତ ପକ୍ଷରୁ ଅତୁଟ ସମର୍ଥନ ମିଳୁଛି। ସେ ଭାରତରୁ ଇସ୍ରାଏଲକୁ ମିଳୁଥିବା ସମର୍ଥନ ବର୍ଣ୍ଣନା କରିବା ପାଇଁ "ପାଗଳ ପ୍ରେମ" ଶବ୍ଦ ମଧ୍ୟ ବ୍ୟବହାର କରିଛନ୍ତି।

ଭାରତରେ ଇସ୍ରାଏଲ ପ୍ରତି ଅପାର ପ୍ରେମ ଅଛି: ଇସ୍ରାଏଲ ପ୍ରଧାନମନ୍ତ୍ରୀ
ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ କହିଛନ୍ତି, "ସାରା ବିଶ୍ୱରେ ଆମ ବିରୋଧରେ ଷଡ଼ଯନ୍ତ୍ର ଚାଲିଛି। ଆମର ବୈଧତାକୁ ନଷ୍ଟ କରିବାକୁ ଚେଷ୍ଟା କରାଯାଉଛି। ହେଲେ ଭାରତ ହେଉଛି ଏକ୍ଷେତ୍ରରେ ବ୍ୟତିକ୍ରମ। ଭାରତରେ ଇସ୍ରାଏଲ ପ୍ରତି ଅପାର ପ୍ରେମ ରହିଛି। ଯାହାକୁ ପ୍ରକୃତରେ ପାଗଳ ପ୍ରେମ ମଧ୍ୟ କୁହାଯାଇ ପାରିବ। ସେ ଆହୁରି କହିଛନ୍ତି, "ମୁଁ ଭାବୁଛି ବିଶ୍ୱର ଅନ୍ୟ କୌଣସି ଦେଶ ତୁଳନାରେ ଭାରତରେ ମୋର ସର୍ବାଧିକ ଅନୁସରଣ ଅଛନ୍ତି।"

ଏହା ସହିତ ପଢନ୍ତୁ: ଚୋରି ମାଲ୍ ପାଇଁ କାହିଁକି ମୁହାଁମୁହିଁ ଇସ୍ରାଏଲ-ୟୁକ୍ରେନ; କ'ଣ ରହିଛି ପରଦା ପଛର କାହାଣୀ?

ମଧୁର ପର୍ଯ୍ୟାୟରେ ପହଞ୍ଚିଛି ଭାରତ-ଇସ୍ରାଏଲ ବନ୍ଧୁତା
ଇସ୍ରାଏଲ-ଭାରତ ମଧ୍ୟରେ ରହିଥିବା ବନ୍ଧୁତା ସର୍ବଜନବିଦିତ। ନରେନ୍ଦ୍ର ମୋଦି ଭାରତର ପ୍ରଧାନମନ୍ତ୍ରୀ ହେବା ପରଠାରୁ ଏହି ସମ୍ପର୍କ ଆହୁରି ମଜବୁତ ହୋଇଛି। ଇସ୍ରାଏଲୀ ପ୍ରଧାନମନ୍ତ୍ରୀ ନେତାନ୍ୟାହୁଙ୍କ ଏହି ବିବୃତ୍ତି ଉଭୟ ଦେଶ ମଧ୍ୟରେ ରହିଥିବା ମଜବୁତ ଦ୍ୱିପାକ୍ଷିକ ସମ୍ପର୍କକୁ ଦର୍ଶାଉଛି। ହେଲେ ତଥାପି ଭାରତରେ ଇରାନ ପ୍ରତି ମଧ୍ୟ ଦୃଢ଼ ସମର୍ଥନ ରହିଛି। ଗତ ମାସରେ ଆମେରିକା-ଇସ୍ରାଏଲ ଆକ୍ରମଣ ସମୟରେ, ଭାରତରେ ଇରାନବାସୀଙ୍କ ସମର୍ଥନର ଅନେକ ଘଟଣାକ୍ରମ ଦେଖିବାକୁ ମିଳିଥିଲା।

ଗାଜା ଦଖଲ ଅଭିଯାନକୁ ନେଇ କ'ଣ କହିଲେ ନେତାନ୍ୟାହୁ?
ୱେଷ୍ଟ ବ୍ୟାଙ୍କ ଠାରେ ଅନୁଷ୍ଠିତ ହୋଇଥିବା ଏହି ସମ୍ମିଳନୀରେ ନେତାନ୍ୟାହୁ ଗାଜା ଯୁଦ୍ଧ ସମ୍ପର୍କରେ ଏକ ପ୍ରମୁଖ ବୟାନ ଦେଇଛନ୍ତି। ଏନେଇ ପ୍ରଧାନମନ୍ତ୍ରୀ ନେତାନ୍ୟାହୁ କହିଛନ୍ତି ଯେ ଇସ୍ରାଏଲ ସେନା ଏବେ ଗାଜା ଷ୍ଟ୍ରିପ ଅଞ୍ଚଳର ୬୦ ପ୍ରତିଶତ ଅଂଶକୁ ନିୟନ୍ତ୍ରଣ କରୁଛି। ଆମର ପରବର୍ତ୍ତୀ ଲକ୍ଷ୍ୟ ହେଉଛି ଏହାକୁ ୭୦ ପ୍ରତିଶତକୁ ବୃଦ୍ଧି କରିବା। ଏହି କାର୍ଯ୍ୟକ୍ରମରେ ସାମିଲ ହୋଇଥିବା ଲୋକଙ୍କ ସହିତ ପ୍ରଧାନମନ୍ତ୍ରୀ ସମଗ୍ର ଗାଜା ଦଖଲ ସହିତ ଜଡିତ ସ୍ଲୋଗାନ ମଧ୍ୟ ଦେଇଥିଲେ। ଗାଜା ଷ୍ଟ୍ରିପ୍ ପାଇଁ ଇସ୍ରାଏଲ-ପାଲେଷ୍ଟାଇନ ମଧ୍ୟରେ ଏକ ଦୀର୍ଘକାଳୀନ ଯୁଦ୍ଧ ଜାରି ରହିଛି। ଏହି ଯୁଦ୍ଧରେ ଇସ୍ରାଏଲୀ ସେନା ଆକ୍ରମଣରେ ଏହି ଅଞ୍ଚଳକୁ ଶାସନ କରୁଥିବା ହମାସ ଆଥଙ୍କୀ ଗୋଷ୍ଠୀର ମେରୁଦଣ୍ଡ ଭାଙ୍ଗିଯାଇଛି।