Argus News - ସରକାର ଆଣିଲେ ନୂଆ ଆଇନ, ଏବେ ୫ ବର୍ଷ ନୁହେଁ...ମାତ୍ର ବର୍ଷେ ଚାକିରି କରିଥିଲେ ମିଳିବ ଗ୍ରାଚୁଇଟି

ଶୁକ୍ରବାର ସରକାର ଶ୍ରମ ଆଇନରେ ବଡ଼ ପରିବର୍ତ୍ତନ ଏବଂ ସଂସ୍କାର ଘୋଷଣା କରିଛନ୍ତି । ଏହା ଅଧୀନରେ କେନ୍ଦ୍ର ଶ୍ରମ ମନ୍ତ୍ରଣାଳୟ ୨୯ଟି ଶ୍ରମ ଆଇନକୁ ମାତ୍ର ୪ଟି କୋଡକୁ ହ୍ରାସ କରିଛି । ଶ୍ରମ ମନ୍ତ୍ରଣାଳୟ ଅନୁଯାୟୀ, ଏହି ନୂତନ କୋଡଗୁଡ଼ିକ ଦେଶର ସମସ୍ତ ଶ୍ରମିକଙ୍କ ପାଇଁ (ଅନୁଷ୍ଠାନିକ କ୍ଷେତ୍ରରେ କାମ କରୁଥିବା ଶ୍ରମିକ, ଗିଗ୍ କର୍ମଚାରୀ, ପ୍ରବାସୀ ଶ୍ରମିକ ଏବଂ ମହିଳା ସମେତ) ଉତ୍ତମ ମଜୁରୀ, ସାମାଜିକ ସୁରକ୍ଷା ଏବଂ ସ୍ୱାସ୍ଥ୍ୟସେବା ଗ୍ୟାରେଣ୍ଟି ଦେବ। ଶ୍ରମ ଆଇନ ସଂସ୍କାରରେ ଏକ ଗୁରୁତ୍ୱପୂର୍ଣ୍ଣ ପରିବର୍ତ୍ତନ ଗ୍ରାଚ୍ୟୁଇଟି ସହିତ ଜଡିତ । ଏହା ଅଧୀନରେ ବର୍ତ୍ତମାନ ଗୋଟିଏ ବର୍ଷ ସେବା ପରେ ମଧ୍ୟ ଗ୍ରାଚ୍ୟୁଇଟି ଲାଭ ପାଇପାରିବେ ।

ଶ୍ରମ ଆଇନରେ କାର୍ଯ୍ୟକାରୀ ହେଉଥିବା ସଂସ୍କାର ମଧ୍ୟରେ ଗ୍ରାଚ୍ୟୁଇଟି ନିୟମ ବିଶେଷ ଗୁରୁତ୍ୱପୂର୍ଣ୍ଣ । କାରଣ ଏପର୍ଯ୍ୟନ୍ତ ଯେକୌଣସି କମ୍ପାନୀରେ ପାଞ୍ଚ ବର୍ଷ କାର୍ଯ୍ୟ କରିବା ପରେ ସାଧାରଣତଃ ଗ୍ରାଚ୍ୟୁଇଟି ମିଳୁଥିଲା । କିନ୍ତୁ ସରକାର ଏବେ ସ୍ପଷ୍ଟ କରିଛନ୍ତି ଯେ Fixed-Term Employee (FTEs)ଙ୍କୁ ପାଞ୍ଚ ବର୍ଷ ଅପେକ୍ଷା କରିବାକୁ ପଡ଼ିବ ନାହିଁ ଏବଂ କେବଳ ଗୋଟିଏ ବର୍ଷ ଚାକିରି ପରେ ଗ୍ରାଚ୍ୟୁଇଟି ଲାଭ ପାଇଁ ଯୋଗ୍ୟ ହେବେ।
ନୂଆ ନିୟମ ସ୍ପଷ୍ଟ କରିଛି ଯେ Fixed-Term Employee ସ୍ଥାୟୀ କର୍ମଚାରୀଙ୍କ ଭଳି ସମସ୍ତ ସୁବିଧା ପାଇବେ । ଯେଉଁଥିରେ ଛୁଟି, ଚିକିତ୍ସା ସେବା ଏବଂ ସାମାଜିକ ସୁରକ୍ଷା ଅନ୍ତର୍ଭୁକ୍ତ । ସେମାନଙ୍କୁ ସ୍ଥାୟୀ କର୍ମଚାରୀଙ୍କ ପରି ସମାନ ଦରମା ଏବଂ ସୁରକ୍ଷାକୁ ପ୍ରୋତ୍ସାହିତ ମଧ୍ୟ କରାଯିବ । ସରକାରଙ୍କ ଲକ୍ଷ୍ୟ ହେଉଛି ଚୁକ୍ତିଭିତ୍ତିକ କାର୍ଯ୍ୟ ହ୍ରାସ କରିବା ଏବଂ ସିଧାସଳଖ ନିଯୁକ୍ତିକୁ ପ୍ରୋତ୍ସାହିତ କରିବା ।

ଅଧିକ ପଢ଼ନ୍ତୁ: 'ଭାରତ ମାଟିରୁ ମୂଳପୋଛ ହେବ ନକ୍ସଲବାଦ'; BSF ପ୍ରତିଷ୍ଠା ଦିବସରେ ଶତ୍ରୁ ରାଷ୍ଟ୍ରକୁ ଅମିତ ଶାହଙ୍କ ଚେତାବନୀ

ଗ୍ରାଚୁଇଟି କ'ଣ ?

ଗ୍ରାଚୁଇଟି ମୂଳତଃ ଏକ କମ୍ପାନୀ ଦ୍ୱାରା କର୍ମଚାରୀମାନଙ୍କୁ ସେମାନଙ୍କ କାମ ବଦଳରେ ଦିଆଯାଇଥିବା ଏକ ଉପହାର । ପୂର୍ବରୁ, ଏହା ପାଞ୍ଚ ବର୍ଷ ଚାକିରି ପରେ ପ୍ରଦାନ କରାଯାଉଥିଲା, କିନ୍ତୁ ଏବେ ଏହା ଏକ ବର୍ଷ ପରେ ମିଳିବ । ଚର୍ଚ୍ଚା ହେଉଥିଲା ସରକାର ଗ୍ରାଚ୍ୟୁଇଟି ପାଇଁ ଯୋଗ୍ୟତା ସୀମାକୁ ପାଞ୍ଚ ବର୍ଷରୁ ତିନି ବର୍ଷକୁ ହ୍ରାସ କରିପାରନ୍ତି । କିନ୍ତୁ ସରକାରଙ୍କ ପକ୍ଷରୁ କର୍ମଚାରୀମାନଙ୍କୁ ଏକ ବଡ଼ ଉପହାର ଦେଇ ଏହାକୁ ସର୍ବନିମ୍ନ ମାତ୍ର ଗୋଟିଏ ବର୍ଷକୁ ହ୍ରାସ କରାଯାଇଛି ।

ସୂଚନା ଅନୁସାରେ, ସରକାର ୨୦୨୦ରେ ନୂତନ ଶ୍ରମ ସଂହିତା ବିଲ୍ ପାସ କରିଥିଲେ, କିନ୍ତୁ ପାଞ୍ଚ ବର୍ଷ ଧରି କାର୍ଯ୍ୟକାରୀ ହୋଇ ପାରି ନଥିଲା। ଏହା ସମସ୍ତ ଶ୍ରମିକଙ୍କ ପାଇଁ ସର୍ବନିମ୍ନ ମଜୁରି ସୁନିଶ୍ଚିତ କରିବ। ଯୁବକମାନଙ୍କୁ ନିଯୁକ୍ତି ପତ୍ର ସୁନିଶ୍ଚିତ କରିବ। ମହିଳାମାନଙ୍କୁ ସମାନ ଦରମା ଏବଂ ସମ୍ମାନ ସୁନିଶ୍ଚିତ କରିବ। ଏହା ୪୦ କୋଟି ଶ୍ରମିକଙ୍କ ପାଇଁ ସାମାଜିକ ସୁରକ୍ଷା ସୁନିଶ୍ଚିତ କରିବ । ସେହିପରି ୪୦ ବର୍ଷରୁ ଅଧିକ ବୟସର ଶ୍ରମିକମାନେ ମାଗଣା ବାର୍ଷିକ ସ୍ୱାସ୍ଥ୍ୟ ପରୀକ୍ଷା ପାଇବେ। ବିପଦପୂର୍ଣ୍ଣ କ୍ଷେତ୍ରରେ କାର୍ଯ୍ୟରତ ଶ୍ରମିକମାନେ ୧୦୦% ସ୍ୱାସ୍ଥ୍ୟ ସୁରକ୍ଷା ପାଇବେ।