Water mixed Petrol / ପେଟ୍ରୋଲ ବଦଳରେ ଟାଙ୍କିରେ ପାଣି; ଅଧା ବାଟ ଯାଇ ଧକେଇଲା ଗାଡି

ଲୋକମାନେ ପ୍ରତିଦିନ ଯେପରି ପେଟ୍ରୋଲ ପମ୍ପକୁ ଯାଇ ଗାଡ଼ି ଟାଙ୍କିରେ ତେଲ ପକାନ୍ତି, ସେମିତି ଆଜି ବି ପକେଇଥିଲେ । ହେଲେ ଅଧା ବାଟ ଯାଇ ଖରାପ ହୋଇଗଲା ଗାଡ଼ି । ଗୋଟିଏ କି ଦୁଇଟି ନୁହେଁ, ପ୍ରାୟ ୧୦ରୁ ଅଧିକ ଗାଡ଼ି ମାଲିକ ଅସୁବିଧାରେ ପଡ଼ିଛନ୍ତି । ଏହାପରେ ଗାଡ଼ି ମାଲିକମାନେ ପେଟ୍ରୋଲ ପମ୍ପରେ ପହଞ୍ଚି ହଙ୍ଗାମା କରିଥିଲେ । ପୋଲିସ ତଦନ୍ତରୁ ଜଣାପଡ଼ିଛି ଯେ ଗାଡ଼ିରେ ପେଟ୍ରୋଲ ବଦଳରେ ପାଣି ପୂରେଇଥିଲେ ପେଟ୍ରୋଲ ପମ୍ପ କର୍ମଚାରୀ । ଏହି ଘଟଣାଟି ଗ୍ରେଟର ନୋଏଡାର ବିଟା ୨ ଥାନା ଅଞ୍ଚଳର ଏକ ପେଟ୍ରୋଲ ପମ୍ପରେ ଘଟିଛି ।

• କେମିତି ଟାଙ୍କିକୁ ଗଲା ପାଣି ?

ଲୋକଙ୍କ କହିବାନୁସାରେ, କିଛି ଜଣ ନିଜ ଗାଡ଼ିରେ ପେଟ୍ରୋଲ ଭର୍ତ୍ତି କରି ବାହାରିଯାଇଥିଲେ । ହେଲେ ଗାଡ଼ିଟି କିଛି ଦୂର ଯିବା ପରେ ହଠାତ୍ ବନ୍ଦ ହୋଇଯାଇଥିଲା । ଏହାପରେ ଗାଡ଼ି ମାଲିକମାନେ ପେଟ୍ରୋଲ ପମ୍ପକୁ ଆସି କର୍ମଚାରୀ ଓ ମ୍ୟାନେଜରଙ୍କ ନିକଟରେ ଅଭିଯୋଗ କରିଥିଲେ । ତଦନ୍ତରୁ ଜଣାପଡ଼ିଛି ଯେ ପେଟ୍ରୋଲ ପମ୍ପର ଟାଙ୍କିରେ ଲିକେଜ୍ ଯୋଗୁଁ ତା ଭିତରେ ପାଣି ଚାଲିଯାଇଥିଲା ଏବଂ ସେହି ପାଣିକୁ ଗ୍ରାହକଙ୍କ ଗାଡ଼ି ଟାଙ୍କିରେ ଭର୍ତ୍ତି କରାଯାଇଥିଲା । ପେଟ୍ରୋଲ୍‌ ପମ୍ପରେ କାର୍ଯ୍ୟରତ IGL ଟେକ୍ନିସିଆନ୍ ସନ୍ଦୀପ କହିଛନ୍ତି ଯେ ଯେତେବେଳେ ଟ୍ୟାଙ୍କରଟି ପେଟ୍ରୋଲ୍‌ ନେଇ ଆସିଲା, ସେତେବେଳେ ବ୍ୟାକ୍ କରିବା ସମୟରେ ପାଣି ପାଇପ୍ ଭାଙ୍ଗିଯାଇଥିଲା ।

ପଢନ୍ତୁ ଏହି ଖବର: ଚାକିରିରୁ ବିଦା ହେଲା ସ୍ତ୍ରୀ; ମାଲିକଙ୍କୁ ପିଟିଲେ ସ୍ଵାମୀ, ଭିଡିଓ ଭାଇରାଲ

ଶନିବାର ସନ୍ଧ୍ୟାରେ ବର୍ଷା ହେବା ପରେ ଏହି ପାଇପ୍‌ଗୁଡ଼ିକ ଦେଇ ପାଣି ପଶିଥିଲା ଯାହା ଫଳରେ ପେଟ୍ରୋଲରେ ପାଣି ମିଶିଯାଇଥିଲା । ବର୍ଷା ଯୋଗୁଁ ଶନିବାର ପାଇପ୍‌ଲାଇନ୍ ମରାମତି ହୋଇପାରିନଥିଲା । ପେଟ୍ରୋଲ ପମ୍ପର ଜଣେ ଗ୍ରାହକ କହିଛନ୍ତି ଯେ ସେ ତାଙ୍କ ବାଇକ୍‌ରେ ପେଟ୍ରୋଲ ଭର୍ତ୍ତି କରିଥିଲେ ଏବଂ ଗାଡ଼ି ଚଲାଇ ଯିବା ପରେ ବାଇକଟି ମଝିରେ ଅଟକିଗଲା । ଯେତେବେଳେ ସେ ଯାଞ୍ଚ କଲେ, ସେ ପେଟ୍ରୋଲ୍‌ରେ ପାଣି ମିଶ୍ରିତ ଦେଖିଲେ । ଏହି କଥା ଜଣାପଡ଼ିବା ପରେ ଗ୍ରାହକମାନେ ପେଟ୍ରୋଲ ପମ୍ପରେ ହଙ୍ଗାମା ଆରମ୍ଭ କରିଥିଲେ ।

• ପେଟ୍ରୋଲ ପମ୍ପରେ ଗଣ୍ଡଗୋଳ

ଯେତେବେଳେ ଗଣ୍ଡଗୋଳ ବଢିଥିଲା ସେତେବେଳେ ପୋଲିସକୁ ଖବର ଦିଆଯାଇଥିଲା । ପୋଲିସ ଘଟଣାସ୍ଥଳରେ ପହଞ୍ଚି ଲୋକଙ୍କୁ ବୁଝାସୁଝା କରି ଶାନ୍ତ କରାଇଥିଲା ଏବଂ ମାମଲାର ଯାଞ୍ଚ ଆରମ୍ଭ କରିଥିଲା । ଏହି ଅବହେଳା ଯୋଗୁଁ ୪ଟି କାର ଓ ୬ଟି ମୋଟରସାଇକେଲ ଖରାପ ହୋଇଯାଇଛି । ଏପରିକି କିଛି ଗାଡ଼ି ମାଲିକ ସେହି ପେଟ୍ରୋଲ ପମ୍ପରେ ମେକାନିକକୁ ଡାକି ଗାଡ଼ି ଠିକ୍ କରାଇଥିଲେ ।

ଯେଉଁମାନଙ୍କର ଗାଡ଼ି କ୍ଷତିଗ୍ରସ୍ତ ହୋଇଛି ସେମାନଙ୍କର ମରାମତି କରାଯାଉଛି ଏବଂ ଟାଙ୍କିରୁ ପାଣି ମଧ୍ୟ ନିଷ୍କାସନ କରାଯାଉଛି । ଏବେ ନୂତନ ଇନ୍ଧନ ପୁନଃପୂରଣ କରାଯିବ। ପାଣି ଯୋଗୁଁ ପ୍ରାୟ ୧୨,୦୦୦ ଲିଟର ଇନ୍ଧନ କ୍ଷତିଗ୍ରସ୍ତ ହୋଇଛି । ଜିଲ୍ଲା ଯୋଗାଣ ବିଭାଗର ଏକ ଦଳ ବର୍ତ୍ତମାନ ଘଟଣାର ତଦନ୍ତ ପାଇଁ ଘଟଣାସ୍ଥଳରେ ପହଞ୍ଚିଛି ।