November 1 Rule Changes / ଆଜିଠୁ ଦେଶରେ ଲାଗୁ ହେଲା ୫ଟି ବଡ଼ ପରିବର୍ତ୍ତନ, ସାଧାରଣ ଲୋକଙ୍କଠାରୁ ବ୍ୟବସାୟୀ ହେବେ ପ୍ରଭାବିତ

ଆରମ୍ଭ ହୋଇଛି ନଭେମ୍ବର ମାସ । ଏହି ମାସ ଆରମ୍ଭରୁ ଦେଶରେ ଲାଗୁ ହୋଇଛି ଅନେକ ବଡ଼ ପରିବର୍ତ୍ତନ । ଏହି ନିୟମଗୁଡ଼ିକର ପ୍ରଭାବ ଦେଶର କୋଟି କୋଟି ଲୋକଙ୍କ ଉପରେ ପଡ଼ିବାକୁ ଯାଉଛି । ମୋବାଇଲ୍ ଫୋନ୍ ବ୍ୟବହାରକାରୀଙ୍କଠାରୁ ଆରମ୍ଭ କରି ଜିଏସଟି ଦେଉଥିବା ବ୍ୟବସାୟୀ ଏବଂ ଜାତୀୟ ରାଜପଥରେ ଯାତାୟାତ କରୁଥିବା ଗାଡ଼ି ଚାଳକଙ୍କ ପର୍ଯ୍ୟନ୍ତ ଏହି ପରିବର୍ତ୍ତନର ପ୍ରଭାବ ଅନୁଭବ କରିବେ ।

ପ୍ରଥମ ପରିବର୍ତ୍ତନ – ୧୫୦୦ ଟଙ୍କାରେ ନୂଆ ଟୋଲ୍ ପାସ୍

ଟୋଲ୍ ପ୍ଲାଜା ନିକଟରେ ରହୁଥିବା ଲୋକଙ୍କ ପାଇଁ ଆସିବ ନୂଆ ଟୋଲ୍ ପାସ୍ । ନଭେମ୍ବର ୧ରୁ ଏହି ନୂଆ ନିୟମ ଲାଗୁ ହେବାକୁ ଯାଉଛି । ଏହି ବାର୍ଷିକ ପାସ୍ ପାଇଁ ୧୫୦୦ ଟଙ୍କା ଦେବାକୁ ପଡ଼ିବ । ଟୋଲ୍ ପ୍ଲାଜାର ୨୦ କିଲୋମିଟର ପରିଧି ମଧ୍ୟରେ ରହୁଥିବା ବ୍ୟକ୍ତିଗତ ଗାଡ଼ି ମାଲିକମାନେ ଏହି ପାସ୍‌ର ସୁବିଧା ପାଇପାରିବେ । ଏହାଦ୍ୱାରା ନିୟମିତ ଟୋଲ୍ ଦେଇ ଯାତାୟାତ କରୁଥିବା ଲୋକଙ୍କୁ ଆଶ୍ୱସ୍ତି ମିଳିପାରେ ।

ଦ୍ବିତୀୟ ପରିବର୍ତ୍ତନ – ଦିଲ୍ଲୀରେ ପୁରୁଣା ଗାଡ଼ି ଚଳାଚଳ ଉପରେ କଟକଣା

ଦିଲ୍ଲୀରେ ପ୍ରଦୂଷଣ ରୋକିବା ପାଇଁ ନଭେମ୍ବର ୧ରୁ ଅନ୍ୟ ରାଜ୍ୟରେ ପଞ୍ଜୀକୃତ ପୁରୁଣା ନନ୍-BS6 ଗାଡ଼ିର ପ୍ରବେଶ ଉପରେ କଟକଣା ଲାଗୁ ହେବ । ଏହି ନିୟମ ଶୀତକାଳୀନ ପ୍ରଦୂଷଣ ନିୟନ୍ତ୍ରଣ ଯୋଜନା ଅନୁସାରେ ଲାଗୁ ହେବାକୁ ଯାଉଛି । ସୂଚନା ଅନୁସାରେ, ଏହି କଟକଣା ଜାନୁଆରୀ ୩୧, ୨୦୨୬ ପର୍ଯ୍ୟନ୍ତ ରହିବ ବୋଲି ଉଲ୍ଲେଖ ରହିଛି ।

ତୃତୀୟ ପରିବର୍ତ୍ତନ – ମଦ କିଣିବା ପାଇଁ ଡିଜିଟାଲ୍ ପେମେଣ୍ଟ ବାଧ୍ୟତାମୂଳକ

ତାମିଲନାଡୁରେ ମଦ କିଣିବାର ପେମେଣ୍ଟ ନିୟମରେ ବଡ଼ ପରିବର୍ତ୍ତନ ହେବାକୁ ଯାଉଛି । ତାମିଲନାଡୁ ଷ୍ଟେଟ୍ ମାର୍କେଟିଂ କର୍ପୋରେସନ୍ ବା TASMAC ନୂଆ ନିଷ୍ପତ୍ତି ନେଇଛି । ନଭେମ୍ବର ୧ରୁ ୧୦୦୦ ଟଙ୍କାରୁ ଅଧିକ ଦାମ୍‌ର ମଦ ବୋତଲ କିଣିଲେ ଡିଜିଟାଲ୍ ପେମେଣ୍ଟ କରିବା ବାଧ୍ୟତାମୂଳକ ହେବ । ଅର୍ଥାତ୍ ୧୦୦୦ ଟଙ୍କାରୁ ଅଧିକ ମୂଲ୍ୟର ମଦ କିଣିବା ସମୟରେ ଗ୍ରାହକମାନେ ଆଉ ନଗଦ ଟଙ୍କା ଦେଇପାରିବେ ନାହିଁ। ଡିଜିଟାଲ୍ ମାଧ୍ୟମରେ ପେମେଣ୍ଟ କରିବାକୁ ପଡ଼ିବ ।

ଏଥି ସହ ପଢନ୍ତୁ:  ଆଜିଠୁ ବଢ଼ିଲା LPG ସିଲିଣ୍ଡର ଦର, ଜାଣନ୍ତୁ କେତେ ଟଙ୍କା ମହଙ୍ଗା ହେଲା

ଚତୁର୍ଥ ପରିବର୍ତ୍ତନ – GST ରିଟର୍ଣ୍ଣ ନିୟମରେ ପରିବର୍ତ୍ତନ

ନଭେମ୍ବର ୧ରୁ ଜିଏସ୍‌ଟି କ୍ଷେତ୍ରରେ ମଧ୍ୟ କିଛି ନୂଆ ବ୍ୟବସ୍ଥା ଆସିବା ନେଇ ରିପୋର୍ଟ ପ୍ରକାଶ ପାଇଛି । ଏହାଦ୍ୱାରା ଛୋଟ ବ୍ୟବସାୟୀ ଓ ବ୍ୟବସାୟ କରୁଥିବା ଲୋକଙ୍କୁ ଆଶ୍ୱସ୍ତି ମିଳିପାରେ । ଟ୍ୟାକ୍ସ ରିଫଣ୍ଡ ପାଇବାରେ ବିଳମ୍ବ କମାଇବା ଏବଂ ଦସ୍ତାବିଜ୍‌ପତ୍ର କାମର ବୋଝ ହ୍ରାସ କରିବା ପାଇଁ କିଛି କ୍ଷେତ୍ରରେ ଅଟୋମେଟିକ୍ ରିଫଣ୍ଡ ଅନୁମୋଦନ ବ୍ୟବସ୍ଥା ଆଣିବାର ଯୋଜନା ରହିଛି। ଏହା ସହିତ ବାର୍ଷିକ ୫ କୋଟି ଟଙ୍କାରୁ କମ୍ କାରବାର କରୁଥିବା ଏବଂ ସିଧାସଳଖ ଗ୍ରାହକଙ୍କୁ ସାମଗ୍ରୀ ବା ସେବା ଯୋଗାଉଥିବା ବ୍ୟବସାୟୀଙ୍କ ପାଇଁ ନୂଆ ରିଟର୍ଣ୍ଣ ବ୍ୟବସ୍ଥା ଆସିପାରେ ।

ପଞ୍ଚମ ପରିବର୍ତ୍ତନ – ମୋବାଇଲ୍‌ରେ ଅଜଣା କଲ୍ କରୁଥିବା ବ୍ୟକ୍ତିଙ୍କ ନାଁ ଦେଖାଯିବ

ମୋବାଇଲ୍ ଫୋନ୍ ବ୍ୟବହାରକାରୀଙ୍କ ପାଇଁ ମଧ୍ୟ ନଭେମ୍ବର ୧ରୁ ଏକ ନୂଆ ନିୟମ ଲାଗୁ ହେବାକୁ ଯାଉଛି । ଦୂରସଞ୍ଚାର ବିଭାଗ ବା DoT ପକ୍ଷରୁ କଲିଂ ନେମ୍ ପ୍ରେଜେଣ୍ଟେସନ୍ (CNAP) ବ୍ୟବସ୍ଥା ଲାଗୁ କରିବାକୁ ନିର୍ଦ୍ଦେଶ ଦିଆଯାଇଛି। ଏହା ଲାଗୁ ହେଲେ ଅଜଣା ନମ୍ବରରୁ କଲ୍ ଆସିବା ସମୟରେ ମୋବାଇଲ୍ ସ୍କ୍ରିନ୍‌ରେ କଲ୍ କରୁଥିବା ବ୍ୟକ୍ତିଙ୍କ ନାମ ଦେଖାଯାଇପାରିବ । ଏଥିପାଇଁ ଆଉ କେବଳ Truecaller ଭଳି ଆପ୍ ଉପରେ ନିର୍ଭର କରିବାକୁ ପଡ଼ିବ ନାହିଁ। ଟେଲିକମ୍ ସେବା ପ୍ରଦାନକାରୀ କମ୍ପାନୀମାନଙ୍କୁ ୧ ନଭେମ୍ବର ୨୦୨୬ରୁ ଏହି ବ୍ୟବସ୍ଥା ଲାଗୁ କରିବା ପାଇଁ ନିର୍ଦ୍ଦେଶ ରହିଛି ।