ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଇଟାଲୀ ଗସ୍ତ ସମୟରେ ମେଲୋନିଙ୍କୁ ମେଲୋଡି ଟଫି ଭେଟିଦେଇଥିଲେ, ଯାହାକୁ ନେଇ ଏବେ ଚାରିଆଡ଼େ ଚର୍ଚ୍ଚା । ଇଣ୍ଟରନେଟ୍ରେ ଦୁଇ ପ୍ରଭାବଶାଳୀ ନେତାଙ୍କ ବନ୍ଧୁତ୍ୱପୂର୍ଣ୍ଣ ସମ୍ପର୍କକୁ ନେଇ ପ୍ରସିଦ୍ଧ ଥିବା ମେଲୋଡି ନାମକୁ ମନେ ପକାଇବା ପାଇଁ ଏହି ଉପହାର ଦିଆଯାଇଥିଲା । ପିଏମ ମୋଦି ମେଲୋନିଙ୍କୁ କେବଳ ଚକୋଲେଟ୍ ଦେଇନାହାନ୍ତି, ଏହାବାଦ ଅନ୍ୟ ଦୁଇଟି ସ୍ଵତନ୍ତ୍ର ଉପହାର ମଧ୍ୟ ଭେଟିଦେଇଛନ୍ତି । ନିକଟରେ ପ୍ରଧାନମନ୍ତ୍ରୀ ୫ଟି ଦେଶ ଗସ୍ତ କରିଥିଲେ ଓ ଶେଷରେ ଇଟାଲୀ ଯାଇଥିଲେ, ଯେଉଁଠି ସେ ଇଟାଲୀ ପ୍ରଧାନମନ୍ତ୍ରୀ ମେଲୋନିଙ୍କୁ ଭେଟିଛନ୍ତି ।
- ମେଲୋନିଙ୍କ ପାଇଁ ଖାସ୍ ଗିଫ୍ଟ
ପିଏମ ମୋଦି ଇଟାଲୀ ପିଏମ ମେଲୋନିଙ୍କୁ ରେଶମ ଶାଲ୍ ଗିଫ୍ଟ କରିଛନ୍ତି । ଏହି ଶାଲଟି ମଣିପୁରର ଶିରୁଇ କାଶୋଙ୍ଗ ଶିଖର ଏବଂ ଦୁର୍ଲଭ ଶିରୁଇ ଲିଲି ଫୁଲରୁ ପ୍ରେରିତ । ଏହି ଫୁଲର ପାଖୁଡ଼ାଗୁଡ଼ିକ ଗୋଲାପି ରଙ୍ଗର ହୋଇଥିବାବେଳେ ଏହି ଫୁଲର ସ୍ଵତନ୍ତ୍ରତା ହେଉଛି ଏହା କେବଳ ମଣିପୁରର ସେହି ନିର୍ଦ୍ଦିଷ୍ଟ ସ୍ଥାନରେ ଫୁଟିଥାଏ ।ଏହାସହିତ ମୋଦି ଜର୍ଜିଆ ମେଲୋନିଙ୍କ ଲାଗି ଆଉ ଏକ ଶାଲ୍ ନେଇଥିଲେ, ଯାହାକି ମୁଗା ରେଶମରୁ ତିଆରି । ଆସାମରେ 'ସ୍ଵର୍ଣ୍ଣ ରେଶମ' ନାଁରେ ପ୍ରସିଦ୍ଧ ଏହି ମୁଗା ରେଶମ ଶାଲଟି ପୂର୍ବୋତ୍ତର ଭାରତର ବ୍ରହ୍ମପୁତ୍ର ଘାଟିର ଏକ ଦୁର୍ଲଭ ତଥା ପାରମ୍ପରିକ ବସ୍ତ୍ର । ଏହା ନିଜର ପ୍ରାକୃତିକ ସୁନେଲି ରଙ୍ଗ ଓ ସୁନ୍ଦର ଡିଜାଇନ ପାଇଁ ବେଶ ପ୍ରସିଦ୍ଧ । ଏହାବ୍ୟତୀତ ପିଏମ ମୋଦି ଇଟାଲୀର ରାଷ୍ଟ୍ରପତି ସର୍ଜିଆ ମେଟାରେଲାଙ୍କୁ ପଣ୍ଡିତ ଭୀମସେନ ଯୋଶୀ ଓ ଏମ.ଏସ ସୁବୁଲକ୍ଷ୍ମୀଙ୍କ ସିଡିର ଭରପୂର ସଙ୍ଗମରମର ପଥରରେ ସୂକ୍ଷ୍ମ କାମ ହୋଇଥିବା ଏକ ସୁନ୍ଦର ବାକ୍ସ ଭେଟିଦେଇଥିଲେ ।
- ନେଦରଲ୍ୟାଣ୍ଡ ରାଜାରାଣୀଙ୍କୁ ରାଜସ୍ଥାନୀ ଗିଫ୍ଟ
ପିଏମ ମୋଦି ନେଦରଲ୍ୟାଣ୍ଡର ରାଜା ଭିଲେମ ଆଲେକଜାଣ୍ଡର ଓ ରାଣୀ ମୌକ୍ସିମାଙ୍କୁ ନୀଳ ରଙ୍ଗର ଫୁଲକୁଣ୍ଡ ଓ ମିନାକାରୀ ଓ ଦୁଇଟି କାନଫୁଲ ଦେଇଛନ୍ତି । ଏଠାରେ କହିରଖୁଛୁ କି, ରାଜସ୍ଥାନର ଜୟପୁରର ବ୍ଲୁ ପଟରୀ ବା ଫୁଲକୁଣ୍ଡ ଏକ ପ୍ରସିଦ୍ଧ ଜିଆଇ ଟ୍ୟାଗ୍ ଥିବା କଳାଶୈଳୀ, ଯାହାକି ଜୀବନ୍ତ କୋବାଲ୍ଟ ନୀଳ, ଧଳା ରଙ୍ଗର ଡିଜାଇନ ପାଇଁ ଜଣାଶୁଣା । ସେପଟେ ମିନାକାରୀ ଓ କୁନ୍ଦନ କାନଫୁଲ ଭାରତୀୟ ଆଭୂଷଣ ଶିଳ୍ପର ଉତ୍କୃଷ୍ଟ ପରମ୍ପରାର ପ୍ରତୀକ, ଯାହାର ଉତ୍ପତ୍ତି ରାଜସ୍ଥାନର ରାଜାରାଜୁଡ଼ା କାରିଗରଙ୍କଠାରୁ ଉତ୍ପତ୍ତି ଲାଭ କରିଛି ।
- ନରୱେର ରାଣୀଙ୍କୁ ତାଳପତ୍ର ପଟ୍ଟଚିତ୍ର
ପ୍ରଧାନମନ୍ତ୍ରୀ ମୋଦି ନରୱେର ରାଣୀ ସୋନଜାଙ୍କୁ ତାଳପତ୍ର ପଟ୍ଟଚିତ୍ର ଉପହାର ପ୍ରଦାନ କରିଛନ୍ତି । ତାଳପତ୍ର ପଟ୍ଟଚିତ୍ର, ଯାହା ସ୍ଥାନୀୟ ଭାବେ 'ତାଳ ପଟ୍ଟଚିତ୍ର' ନାମରେ ଜଣାଶୁଣା । ଓଡ଼ିଶାର ସବୁଠାରୁ ପ୍ରାଚୀନ ଏବଂ ସୂକ୍ଷ୍ମ କଳାକୃତି ମଧ୍ୟରୁ ଅନ୍ୟତମ । କପଡ଼ା ଆଧାରିତ ଚିତ୍ରକଳା ପରି ନୁହେଁ, ଏହି ପରମ୍ପରାରେ ତାଳ ଗଛରୁ ଅଣାଯାଇଥିବା ଏବଂ ବିଶେଷ ଭାବେ ପ୍ରସ୍ତୁତ କରାଯାଇଥିବା ତାଳପତ୍ର ଉପରେ ସୂକ୍ଷ୍ମ ଚିତ୍ର ଖୋଦେଇ କରାଯାଇଥାଏ । ଏହାର ଅସାଧାରଣ ସୂକ୍ଷ୍ମତା ପାଇଁ ପ୍ରସିଦ୍ଧ ଏହି କଳାକୃତି ପ୍ରାୟତଃ ଭାଙ୍ଗି ହେଉଥିବା ପ୍ୟାନେଲ୍ କିମ୍ବା ସୂତା ଦ୍ୱାରା ଯୋଡ଼ା ଯାଇଥିବା ପଟି ଭାବରେ ପ୍ରସ୍ତୁତ କରାଯାଏ । ଯାହା କାହାଣୀ, ହସ୍ତାକ୍ଷର ଶିଳ୍ପ ଏବଂ ଶାସ୍ତ୍ରୀୟ ପ୍ରତୀକକୁ ଏକ ସୁନ୍ଦର କଳାତ୍ମକ ରୂପରେ ପ୍ରଦର୍ଶିତ କରିଥାଏ ।
- ଆଉ କାହାକୁ କେଉଁ ଗିଫ୍ଟ ଦେଲେ ମୋଦି ?
ପ୍ରଧାନମନ୍ତ୍ରୀ ମୋଦି ସଂଯୁକ୍ତ ଆରବ ଏମିରେଟ୍ସ, ନେଦରଲ୍ୟାଣ୍ଡସ, ସ୍ୱିଡେନ, ନରୱେ ଏବଂ ଇଟାଲୀ ସମେତ ୫ଟି ଦେଶର ଗସ୍ତ ସମାପ୍ତ ସ୍ବଦେଶ ଫେରିଛନ୍ତି । ଏହି ଗସ୍ତ ଅବସରରେ ସଂଯୁକ୍ତ ଆରବ ଏମିରେଟ୍ସ ରାଷ୍ଟ୍ରପତିଙ୍କୁ 'ଟ୍ରି ଅଫ୍ ଲାଇଫ୍' ବିଶିଷ୍ଟ ଏକ 'ରୋଗନ୍ ପେଣ୍ଟିଂ', କେଶର ଆମ୍ବ ଏବଂ ମେଘାଳୟର ସପୁରୀ ଉପହାର ଦେଇଛନ୍ତି ମୋଦି । ଆଇସଲ୍ୟାଣ୍ଡର ପ୍ରଧାନମନ୍ତ୍ରୀଙ୍କୁ ତେନଜିଙ୍ଗ ନୋର୍ଗେ ବ୍ୟବହାର କରିଥିବା ବରଫ କୁରାଢ଼ୀର ଏକ ପ୍ରତିକୃତି ଉପହାର ଦେଇଛନ୍ତି। ଡେନମାର୍କର ପ୍ରଧାନମନ୍ତ୍ରୀଙ୍କୁ ଏକ 'ବିଦ୍ରି ସିଲଭର ୱାର୍କ ଭାସ୍' ବା ରୂପା କାରୁକାର୍ଯ୍ୟ ବିଶିଷ୍ଟ ଫୁଲଦାନୀ ଉପହାର ଦେଇଛନ୍ତି ।
ପଢନ୍ତୁ ଏହି ଖବର: ନରୱେରେ ଝଲସିଲା ଓଡ଼ିଶାର ସୂକ୍ଷ୍ମ କାରୁକାର୍ଯ୍ୟ, ରାଣୀ ସୋନଜାଙ୍କୁ ଓଡ଼ିଶାର ତାଳପତ୍ର ପଟ୍ଟଚିତ୍ରସେହିପରି ଫିନଲ୍ୟାଣ୍ଡର ପ୍ରଧାନମନ୍ତ୍ରୀଙ୍କୁ ଏକ 'କମଲ ତଲାଇ ପିଚୱାଇ ପେଣ୍ଟିଂ' ଉପହାର ଦେଇଛନ୍ତି। ସ୍ୱିଡେନର ରାଜକୁମାରୀ ଏବଂ ପ୍ରଧାନମନ୍ତ୍ରୀଙ୍କୁ ଏକ 'ଗୋଣ୍ଡ ପେଣ୍ଟିଂ' ଏବଂ ନିଜ ଦ୍ୱାରା ଲିଖିତ ପୁସ୍ତକ 'Convenient Action: Continuity for Change' ଉପହାର ଦେଇଛନ୍ତି । ନରୱେର ପ୍ରଧାନମନ୍ତ୍ରୀଙ୍କୁ ଏକ 'ପ୍ରେସଡ୍ ଅର୍ଚ୍ଚିଡ୍ ପେଣ୍ଟିଂ' ଏବଂ ଅର୍ଚ୍ଚିଡ୍ ପେପରୱେଟ୍ ଉପହାର ଦେଇଛନ୍ତି । ନରୱେର କ୍ରାଉନ୍ ପ୍ରିନ୍ସଙ୍କୁ ସୂର୍ଯ୍ୟ ଏବଂ ଚନ୍ଦ୍ର ପ୍ରତୀକ ବିଶିଷ୍ଟ ଏକ 'କଲମକାରୀ ପେଣ୍ଟିଂ' ଉପହାର ଦେଇଛନ୍ତି ପିଏମ ମୋଦି । ନେଦରଲ୍ୟାଣ୍ଡର ପ୍ରଧାନମନ୍ତ୍ରୀଙ୍କୁ ମାଛ ପ୍ରତୀକ ବିଶିଷ୍ଟ ଏକ 'ମଧୁବନୀ ପେଣ୍ଟିଂ' ଉପହାର ଦେଇଛନ୍ତି ।
