Namoh 108 Lotus Gift / 'ନମୋ ୧୦୮ ପଦ୍ମ' କଣ ? ଭିଏତନାମ ରାଷ୍ଟ୍ରପତିଙ୍କୁ ଭେଟି ଦେଲେ ମୋଦି

ଦିଲ୍ଲୀରେ ଭିଏତନାମ ରାଷ୍ଟ୍ରପତି ଟୋ ଲାମଙ୍କୁ ପ୍ରଧାନମନ୍ତ୍ରୀ ମୋଦିଙ୍କ ସ୍ଵତନ୍ତ୍ର ଉପହାର । ଭେଟିଦେଲେ 'ନମୋ ୧୦୮ ପଦ୍ମ' । ଏହି ବିରଳ ପ୍ରଜାତିର ପଦ୍ମକୁ ଲକ୍ଷ୍ନୌର ଜାତୀୟ ଉଦ୍ଭିଦ ଗବେଷଣା ପ୍ରତିଷ୍ଠାନ (NBRI)ର ବୈଜ୍ଞାନିକମାନଙ୍କ ଦ୍ୱାରା ବିକଶିତ କରାଯାଇଛି । ଭିଏତନାମ ରାଷ୍ଟ୍ରପତିଙ୍କୁ ଉପହାର ଦେବା ଲାଗି ଏହି ଫୁଟିଥିବା ପଦ୍ମକୁ ଏକ ଫାଇବର ବାକ୍ସରେ ପ୍ୟାକ୍ କରି ଲକ୍ଷ୍ନୌରୁ ଜାତୀୟ ରାଜଧାନୀକୁ ସଡ଼କ ପଥରେ ପଠାଯାଇଥିଲା । ଏହାସହିତ ଫୁଟିଥିବା ଫୁଲ ବହନ କରୁଥିବା ଦୁଇଟି ଜୀବନ୍ତ ଗଛ ଏବଂ ପଦ୍ମ ବୀଜ ଥିବା ଏକ 'ନମୋ କିଟ୍' ମଧ୍ୟ ଉପହାରରେ ଦିଆଯାଇଛି ।

• କଣ 'ନମୋ ୧୦୮ ପଦ୍ମ'ର ସ୍ଵତନ୍ତ୍ରତା ?

ଏହି ଅନନ୍ୟ ପଦ୍ମ ଏହାର ୧୦୮ ପାଖୁଡା ଏବଂ ବର୍ଷସାରା ଫୁଟିବା ପାଇଁ ଜଣାଶୁଣା । ରାଷ୍ଟ୍ରପତି ଟୋ ଲାମଙ୍କୁ ପ୍ରଦାନ କରାଯାଇଥିବା ଉପହାରରେ ଏକ ପିତ୍ତଳ ବୁଦ୍ଧ ମୂର୍ତ୍ତି ଏବଂ ଏକ ବନାରସୀ ରେଶମ ଶାଢ଼ୀ ସମେତ ପଦ୍ମ ବି ଥିଲା । NBRIର ସୂତ୍ର ଅନୁଯାୟୀ, ମାଟି ସହିତ ଦୁଇଟି ସ୍ୱତନ୍ତ୍ର ବାକ୍ସ ପ୍ରସ୍ତୁତ କରାଯାଇଥିଲା, ଯେଉଁଥିରେ ନମୋ ପଦ୍ମ ଫୁଟିଥିବା ଜୀବନ୍ତ ଗଛଗୁଡ଼ିକ ରହିଥିଲା । NBRIର ତିନି ଜଣ ବୈଜ୍ଞାନିକଙ୍କ ଦଳ ଦ୍ୱାରା ଏକ ଏୟାରକଣ୍ଡିସନଡ୍ SUVରେ ଗଛଗୁଡ଼ିକୁ ସଡ଼କ ପଥରେ ଦିଲ୍ଲୀ ପଠାଯାଇଥିଲା ।

ଏହି ବିରଳ ପଦ୍ମ ପ୍ରଜାତିକୁ ୨୦୨୩ ମସିହାରେ NBRIର ନିର୍ଦ୍ଦେଶକ ଏ.କେ. ଶସାନୀ ଏବଂ ତାଙ୍କ ଦଳ ଦ୍ୱାରା ବିକଶିତ କରାଯାଇଥିଲା । ଏହି ପ୍ରଜାତିର ପଦ୍ମ ଫୁଲ ୧୦ ଇଞ୍ଚ ବ୍ୟାସ ପର୍ଯ୍ୟନ୍ତ ବଢିଥାଏ । ଏହି ଫୁଲ ଉପରେ ପ୍ରତିଷ୍ଠାନ ଦ୍ଵାରା ଉତ୍କୃଷ୍ଟ ପ୍ରଯୁକ୍ତିବିଦ୍ୟା ପ୍ରୟୋଗ କରିବା ପରେ ଏହି ବିରଳ ପ୍ରଜାତିଟି ପ୍ରାୟ ସାରା ବର୍ଷ ଫୁଟିଥିଲା । ପୂର୍ବରୁ ଏହା ଋତୁକାଳୀନ ଥିଲା । ଏହି ପଦ୍ମ ଫୁଲଟି ପୋଖରୀ, ଟାଙ୍କି ଏବଂ ପାତ୍ରରେ ଚାଷ କରାଯାଇପାରିବ ।

• କାହିଁକି ଦିଆଯାଇଛି 'ନମୋ' ନାମ ?

ପଦ୍ମର ଧାର୍ମିକ ମହତ୍ତ୍ୱ ଯୋଗୁଁ ଏହାକୁ 'ନମୋ' ନାମ ଦିଆଯାଇଥିଲା । ଏହି ଶବ୍ଦ 'ଓମ୍ ନମୋ ଭଗବତେ ବାସୁଦେବାୟ ନମଃ' ମନ୍ତ୍ରରୁ ଆସିଛି । ଏହି ଫୁଲରେ ଥିବା '୧୦୮' ସଂଖ୍ୟାଟି ଏହି ପ୍ରକାରର ପାଖୁଡ଼ା ସଂଖ୍ୟାକୁ ବୁଝାଏ ।

• ଭିଏତନାମର ଜାତୀୟ ଫୁଲ ପଦ୍ମ

ଭାରତ ପରି ପଦ୍ମ ମଧ୍ୟ ଭିଏତନାମର ଜାତୀୟ ଫୁଲ ଏବଂ ଏହା ଭିଏତନାମ ସଂସ୍କୃତି, ପବିତ୍ରତା, ସ୍ଥିରତା ଏବଂ ଆଧ୍ୟାତ୍ମିକ ଜାଗରଣର ପ୍ରତୀକ । ବୌଦ୍ଧ ଧର୍ମ ସହିତ ଘନିଷ୍ଠ ଭାବରେ ଜଡିତ । ଏହି ଫୁଲ ପଙ୍କରୁ ସୁନ୍ଦର ରୂପ ନେଇଥାଏ, ଯେଉଁଥିପାଇଁ ଏହା ପୂଜ୍ୟ ଓ ଗଭୀର ମହତ୍ତ୍ଵ ବଜାୟ ରଖେ ।

ପଢନ୍ତୁ ଏହି ଖବର: ବଦଳିଲା ଦେଶର ରାଜନୈତିକ ମାନଚିତ୍ର; ୭ରୁ ୨୨ ରାଜ୍ୟରେ ପହଞ୍ଚିଲା ପଦ୍ମ ଶିବିର

• ଉପହାରରେ ଆଉ କଣ ?

ଭିଏତନାମ ରାଷ୍ଟ୍ରପତିଙ୍କୁ ପଦ୍ମ ବ୍ୟତୀତ ପିତ୍ତଳ ବୁଦ୍ଧଙ୍କ ଧ୍ୟାନମୂଦ୍ରାର ପ୍ରତିମା ଭେଟି ଦିଆଯାଇଛି । ଏହି ମୂର୍ତ୍ତିଟି ଉତ୍ତର ପ୍ରଦେଶର ମୁରାଦାବାଦର କୁଶଳୀ କାରିଗରମାନେ ଗଢିଛନ୍ତି, ଯେଉଁମାନେ ପିତ୍ତଳ କାରିଗରୀ ପାଇଁ ବେଶ ଖ୍ୟାତି ଅର୍ଜନ କରିଛନ୍ତି । ଏହାବାଦ ଉପହାରରେ ସ୍ଵତନ୍ତ୍ର ଧରଣର ବାରଣାସୀର ରେଶମ କପଡ଼ା ମଧ୍ୟ ଭେଟି ଦିଆଯାଇଛି । ଏଥିରେ ଫୁଲର ଡିଜାଇନ ହୋଇଛି । ଏହାବାଦ ମହାରାଷ୍ଟ୍ର ରତ୍ନଗିରିର ବିଶେଷ ଧରଣର ଅଲଫାନ୍ସୋ ଆମ୍ଵ (ମିଠା ସ୍ଵାଦ ଓ ସୁନେଲି ରଙ୍ଗ ପାଇଁ ପ୍ରସିଦ୍ଧ), ସ୍ଵାସ୍ଥ୍ୟ ଉପଯୋଗୀ ମିଲେଟ୍ ବାର୍ ମଧ୍ୟ ଦିଆଯାଇଛି । ଭାରତ ଗସ୍ତ ସମୟରେ ଭିଏତନାମ ରାଷ୍ଟ୍ରପତିଙ୍କୁ ଭୋଜନରେ ବିହାରର ପ୍ରସିଦ୍ଧ ଖଜା, ଗୟା ଅନରସା ବା ଆରିସା ପିଠା, ମିଥିଲାର ମଖାନା ଓ ହାଜିପୁରର ମାଲଭୋଗ କଦଳୀ ପରଷା ଯାଇଥିଲା ।