Premanand Maharaj Disciple / ପ୍ରେମାନନ୍ଦ ମହାରାଜଙ୍କ ଶିଷ୍ୟ ମୃତ୍ୟୁ ଘଟଣା; ନୂଆ CCTV ଭିଡିଓ କହିଦେଲା ସତ

ବୃନ୍ଦାବନର ପ୍ରସିଦ୍ଧ ସନ୍ଥ ପ୍ରେମାନନ୍ଦ ମହାରାଜଙ୍କ ଶିଷ୍ୟ ରସିକ୍ ଦୁଲାରୀ ଓରଫ ଦୀପକ ଲୋଧିଙ୍କ ମୃତ୍ୟୁ ଘଟଣା । ଆସିଲା ଆଉ ଏକ ସିସିଟିଭି ଭିଡିଓ । ସାମ୍ନାକୁ ଆସିଥିବା ଏହି ନୂଆ ଭିଡିଓରେ ଦୀପକ ଲୋଧି ଆଶ୍ରମର ଛାତ ଉପରେ ନଜର ଆସିଲେ ଓ ଏହାପରେ ନିଜେ ଛାତରୁ ଡେଇଁ ପଡୁଥିବା ଦେଖିବାକୁ ମିଳିଛି । ଭିଡିଓରେ ସେ ଡେଇଁବା ପୂର୍ବରୁ ଚିନ୍ତାରେ ଥିବା ଦେଖିବାକୁ ମିଳିଛି । ଏହାପରେ ସେ ହଠାତ୍ ଛାତ ଉପରୁ ତଳକୁ ଡେଇଁ ପଡ଼ିଥିଲେ ।

ଏହି ଘଟଣା ଗତ ଶୁକ୍ରବାର (ସେପ୍ଟେମ୍ବର ୨୫) ସକାଳ ୧୦.୩୦ଟାର କୁହାଯାଉଛି । ପୋଲିସର କହିବାନୁସାରେ, ବୃନ୍ଦାବନର ବାରାହଘାଟ ରାସ୍ତା ନିକଟ ଗୁରୁକୃପା କୁଞ୍ଜ ଆଶ୍ରମରୁ ଦୀପକ ଲୋଧି ତଳକୁ ଡେଇଁ ପଡ଼ିଥିଲେ । ଏହାପରେ ତୁରନ୍ତ ତାଙ୍କୁ ଚିକିତ୍ସା ପାଇଁ ଏକ ଘରୋଇ ହସ୍ପିଟାଲକୁ ନିଆଯାଇଥିଲା, ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଏହାପରେ ତାଙ୍କ ମୃତଦେହକୁ ବ୍ୟବଚ୍ଛେଦ ପାଇଁ ପଠାଯାଇଥିଲା ।

• କାହିଁକି ଏପରି ନିଷ୍ପତ୍ତି ନେଲେ ପ୍ରେମାନନ୍ଦ ମହାରାଜଙ୍କ ଶିଷ୍ୟ ?

ତେବେ ଦୀପକ ଲୋଧି ଓରଫ ରସିକ୍ ଦୁଲାରୀ ଏପରି ନିଷ୍ପତ୍ତି କାହିଁକି ନେଲେ ତାକୁ ନେଇ ସମସ୍ତଙ୍କ ମନରେ ପ୍ରଶ୍ନ ଉଠିଛି । କାରଣ ପ୍ରେମାନନ୍ଦ ମହାରାଜଙ୍କ ଆଶ୍ରମକୁ ଅନେକ ଲୋକ ପରିଦର୍ଶନରେ ଯାଆନ୍ତି । ନିଜର ମନର ବ୍ୟଥା ପ୍ରେମାନନ୍ଦଙ୍କ ସାମ୍ନାରେ ପ୍ରକାଶ କରନ୍ତି । ଆଉ ସନ୍ଥ ପ୍ରେମାନନ୍ଦ ସେମାନଙ୍କୁ ଆଧ୍ୟାତ୍ମିକ ସହ ଯୋଡ଼ି ସେମାନଙ୍କ ମନରୁ ବ୍ୟଥାକୁ ଦୂରେଇବାର ରାସ୍ତା କୁହନ୍ତି । ଯେଉଁଠି ଆଶ୍ରମକୁ ଶହ ଶହ ଲୋକ ଜୀବନରେ ଶାନ୍ତି ପାଇଁ ପ୍ରେମାନନ୍ଦ ମହାରାଜଙ୍କ ପରାମର୍ଶ, କଥା ଶୁଣିବାକୁ ଆସନ୍ତି, ସେହି ଆଶ୍ରମରୁ ସନ୍ଥଙ୍କ ଶିଷ୍ୟଙ୍କ ମୃତ୍ୟୁ ସମସ୍ତଙ୍କ ମନରେ ଅନେକ ପ୍ରଶ୍ନବାଚୀ ସୃଷ୍ଟି କରିଛି।

• ଛାନଭିନ୍ କରୁଛି ପୋଲିସ

ଦୀପକ ଲୋଧିଙ୍କ ପରିବାର ପକ୍ଷରୁ ଅଭିଯୋଗ ଆସିବା ପରେ ପୋଲିସ ମାମଲା ରୁଜୁ କରି ତଦନ୍ତ ଜାରି ରଖିଛି । ସିସିଟିଭିରେ ସେ ନିଜେ ଛାତରୁ ଡେଉଁଥିବା ନଜର ଆସିଥିବାବେଳେ ପରିବାର ଲୋକେ ଏହାକୁ ଅସ୍ଵୀକାର କରିଛନ୍ତି । ଏତେ କମ ବୟସରେ ଦୀପକଙ୍କ ଏପରି ପଦକ୍ଷେପର ପ୍ରକୃତ କାରଣ କଣ ଖୋଜିବା ଲାଗି ସେମାନଙ୍କ ଆଇନର ଦ୍ଵାରସ୍ଥ ହୋଇଛନ୍ତି । ଡିଏସପି ସନ୍ଦୀପ କୁମାରଙ୍କ କହିବାନୁସାରେ, ରସିକ୍ ଦୁଲାରୀଙ୍କ ପ୍ରକୃତ ନାମ ଦୀପକ ଲୋଧି ଥିଲା । ପ୍ରାରମ୍ଭିକ ତଦନ୍ତରୁ ଆତ୍ମହତ୍ୟା ପରି ଲାଗୁଥିବା ପୋଲିସ କହିଛି । ହେଲେ ସମସ୍ତ ଦିଗକୁ ଦୃଷ୍ଟିରେ ରଖି ତଦନ୍ତ ପ୍ରକ୍ରିୟା ଆଗକୁ ବଢୁଛି । ଘଟଣା ପୂର୍ବରୁ ଦୀପକଙ୍କ ଆଖପାଖରେ ଥିବା ଲୋକଙ୍କୁ ପଚରାଉଚରା କରାଯାଉଛି । ତାଙ୍କ ମାନସିକ ସ୍ଥିତି କିପରି ଥିଲା ସେନେଇ ମଧ୍ୟ ତଥ୍ୟ ସଂଗ୍ରହ କରୁଛି ପୋଲିସ ।

• କଣ କହୁଛି ବ୍ୟବଚ୍ଛେଦ ରିପୋର୍ଟ ?

ଦୀପକ ଲୋଧିଙ୍କ ଶବ ବ୍ୟବଚ୍ଛେଦ ରିପୋର୍ଟରୁ ଅତ୍ୟଧିକ ରକ୍ତସ୍ରାବ ମୃତ୍ୟୁର କାରଣ ବୋଲି କୁହାଯାଉଛି । ଏହାବ୍ୟତୀତ ଦୀପକଙ୍କ ରୁମରୁ ପୋଲିସକୁ ଏକ ଗ୍ରାଇଣ୍ଡର ମିଳିଛି । ପୋଲିସର କହିବାନୁସାରେ ଦୀପକଙ୍କ ପ୍ରାଇଭେଟ୍ ପାର୍ଟରେ ଆଘାତ ଲାଗିଥିବା ଜଣାପଡ଼ିଛି । ଏହା କେଉଁ ପରିସ୍ଥିତିରେ ହେଲା ସେନେଇ ପୋଲିସ ଯାଞ୍ଚ କରୁଛି । କାରଣ ଗ୍ରାଇଣ୍ଡରେ ମଧ୍ୟ ରକ୍ତଦାଗ ରହିଛି । ବର୍ତ୍ତମାନ ଏହାକୁ ଆତ୍ମହତ୍ୟା ବୋଲି କୁହାଯାଉଛି, ତଥାପି ପୂରା ଘଟଣାର ଯାଞ୍ଚ ପରେ ପ୍ରକୃତ କାରଣ ଜଣାପଡ଼ିବ ବୋଲି ପୋଲିସ କହିଛି ।

• ସରିଛି ଅନ୍ତିମ ସଂସ୍କାର

ଦୀପକ ଲୋଧିଙ୍କ ଅନ୍ତିମ ସଂସ୍କାର ବୃନ୍ଦାବନରେ ହୋଇସାରିଛି । କିନ୍ତୁ ଗୋଟିଏ ପରେ ଗୋଟିଏ ଆସୁଥିବା ସିସିଟିଭି ଫୁଟେଜକୁ ନେଇ ବୁଢିଆଣୀ ସୂତା ପରି ମାମଲାଟି ଛନ୍ଦି ହୋଇଚାଲିଛି । ଏହା ଆତ୍ମହତ୍ୟା ନା ଆଉ କିଛି ? ଗ୍ରାଇଣ୍ଡରରେ ରକ୍ତଦାଗ କେଉଁଠୁ ଆସିଲା ? ଦୀପକ ଲୋଧିଙ୍କ ପ୍ରାଇଭେଟ୍ ପାର୍ଟରେ ଆଘାତ କେମିତି ଲାଗିଲା ? ଦୀପକ ଲୋଧିଙ୍କ ମାନସିକ ସ୍ଥିତି କିପରି ଥିଲା ? ସେ ସବୁକୁ ନେଇ ପୋଲିସ ଯାଞ୍ଚ କରୁଛି ।

ପଢନ୍ତୁ ଏହି ଖବର: ପ୍ରେମରେ ବିଫଳ ପରେ ୭୨ ବର୍ଷୀୟ ବୃଦ୍ଧର ଏସିଡ୍ ଆଟାକ୍‌ରେ ଯୁବତୀ ଗୁରୁତର

• କାହିଁକି ଘର ଛାଡ଼ିଥିଲେ ଦୀପକ ଲୋଧି ?

ମଧ୍ୟପ୍ରଦେଶ ଜବଲପୁରର ବାସିନ୍ଦା ଦୀପକ ଲୋଧି (ଯିଏ ପରବର୍ତ୍ତୀ ସମୟରେ ବୃନ୍ଦାବନରେ 'ରସିକ ଦୁଲାରୀ ଶରଣ' ନାମରେ ଜଣାଶୁଣା ଥିଲେ) ପିଲାଦିନରୁ ହିଁ ଆଧ୍ୟାତ୍ମିକତା ପ୍ରତି ଗଭୀର ଆକୃଷ୍ଟ ଥିଲେ । ନିଜର ଗ୍ରାଜୁଏସନ ବା ସ୍ନାତକ ପଢ଼ା ଶେଷ କରିବା ପରେ ସେ ଘର ସଂସାର ତ୍ୟାଗ କରି ପ୍ରଥମେ ନର୍ମଦା ପରିକ୍ରମାରେ ବାହାରିଥିଲେ । ଏହାପରେ ପ୍ରାୟ ଦୁଇ ବର୍ଷ ତଳେ ରାଧା ଅଷ୍ଟମୀ ଅବସରରେ ସେ ବୃନ୍ଦାବନ ଚାଲିଯାଇଥିଲେ ଏବଂ ସେଠାରେ ବିଶିଷ୍ଟ ସନ୍ଥ ପ୍ରେମାନନ୍ଦ ଜୀ ମହାରାଜଙ୍କଠାରୁ ଦୀକ୍ଷା ଗ୍ରହଣ କରି ଆଶ୍ରମରେ ସେବା କାର୍ଯ୍ୟରେ ନିଜକୁ ନିୟୋଜିତ କରିଥିଲେ । ସଂସାର ବନ୍ଧନରୁ ମୁକ୍ତ ହୋଇ ଭଗବତ ଭକ୍ତି ଓ ସାଧନାରେ ସମୟ ଅତିବାହିତ କରିବା ପାଇଁ ସେ ଘର ଛାଡ଼ିଥିଲେ ।