Acid Attack By Old Man / ପ୍ରେମରେ ବିଫଳ ପରେ ୭୨ ବର୍ଷୀୟ ବୃଦ୍ଧର ଏସିଡ୍ ଆଟାକ୍‌ରେ ଯୁବତୀ ଗୁରୁତର

ଭୁବନେଶ୍ଵର: ଏକତରଫା ପ୍ରେମର କରୁଣ ପରିଣତି । ୭୨ ବର୍ଷୀୟ ବୃଦ୍ଧଙ୍କ ଏସିଡ୍ ଆଟାକ୍‌ରେ ଯୁବତୀ ଗୁରୁତର । ପ୍ରେମରେ ବିଫଳ ହୋଇ ଯୁବତୀଙ୍କୁ ଏସିଡ୍ ପିଆଇବା ଅଭିଯୋଗ । ମୁହଁରେ ମଧ୍ୟ ଏସିଡ୍ ଫିଙ୍ଗିଥିବା ଅଭିଯୋଗ ହୋଇଛି । ଅଭିଯୁକ୍ତ ବୃଦ୍ଧ ବସନ୍ତ ଅଶ୍ୱିନୀ ଚୌଧୁରୀକୁ ଗିରଫ କରିଛି ପୋଲିସ । ପ୍ରେମରେ ବିଫଳ ପରେ ପ୍ରତିଶୋଧର ଭୟଙ୍କର ରୂପ ଦେଖିବାକୁ ମିଳିଛି ଭୁବନେଶ୍ୱର ଖାରବେଳ ନଗର ଅଞ୍ଚଳରେ । ଅଭିଯୁକ୍ତ ହେଉଛି ୭୨ ବର୍ଷୀୟ ବସନ୍ତ ଅଶ୍ୱିନୀ ଚୌଧୁରୀ ।

ପୋଲିସର ସୂଚନା ଅନୁସାରେ, ଖାରବେଳ ନଗର ୟୁନିଟ୍-୩ର ଏକ ଆଶ୍ରୟସ୍ଥଳୀରେ ପୀଡ଼ିତା ତାଙ୍କ ଦୃଷ୍ଟିହୀନ ବାପାଙ୍କ ସହ ପ୍ରାୟ ୪ରୁ ୫ ବର୍ଷ ହେବ ରହିଆସୁଥିଲେ । ସେଠାରେ ଯୁବତୀ ଜଣକ କେୟାରଟେକର ଭାବେ କାମ କରୁଥିଲେ । ଗତ ଅଗଷ୍ଟ ୩୦ ତାରିଖ ରାତି ପ୍ରାୟ ୧ଟା । ଯୁବତୀ ନିଜ ରୁମରେ ଶୋଇଥିବା ବେଳେ କାନ୍ଥ ଡେଇଁ ରୁମ୍ ଭିତରେ ପଶିଥିଲା ଅଭିଯୁକ୍ତ ବସନ୍ତ ।

• ଜୋରଜବରଦସ୍ତ ପିଆଇଥିଲା ଏସିଡ୍

ଅଭିଯୋଗ ଅନୁସାରେ, ହଠାତ୍ ଯୁବତୀଙ୍କ ବେକ ଚିପି ଧରିବା ସହ ଜୋରଜବରଦସ୍ତ ତାଙ୍କୁ ଏକ ରାସାୟନିକ ପଦାର୍ଥ ପିଆଇ ହତ୍ୟା କରିବାକୁ ଉଦ୍ୟମ କରିଥିଲା । ଯୁବତୀ ଜଣକ ପ୍ରତିରୋଧ କରିବାରୁ ତାଙ୍କ ମୁହଁକୁ ଏସିଡ୍ ଫିଙ୍ଗିଥିବା ଅଭିଯୋଗ ହୋଇଛି । ଫଳରେ ତାଙ୍କ ମୁହଁ ପୋଡ଼ି ଯାଇଥିଲା । ଯୁବତୀଙ୍କ ଚିତ୍କାର ଶୁଣି ତାଙ୍କ ବାପା ଏବଂ ଅନ୍ୟ ଅନ୍ତେବାସୀମାନେ ତାଙ୍କୁ ଉଦ୍ଧାର କରି ସମ୍ ହସ୍ପିଟାଲ୍ ଆଇସିୟୁରେ ଭର୍ତ୍ତି କରିଥିଲେ । ଅନ୍ୟପଟେ ଘଟଣା ପରେ ବସନ୍ତ ନିଜର ଦୁଇ ହାତର ଶିରା ଓ ବେକ କାଟିବା ସହ ଏସିଡ୍ ପିଇ ଆତ୍ମହତ୍ୟା ଉଦ୍ୟମ କରିଥିଲା । ତାକୁ ଗୁରୁତର ଅବସ୍ଥାରେ କଟକ ଏସସିବି ମେଡିକାଲରେ ଭର୍ତ୍ତି କରାଯାଇଥିଲା ।

ପଢନ୍ତୁ ଏହି ଖବର: ଆଉ ଗୋଟେ ପ୍ଲେଟ୍ ଛୋଲେ ଭଟୁରେ ଧରାଇଦେଲା ପରକୀୟା ପ୍ରୀତି; ଏମିତି ଧରିଲେ ସ୍ତ୍ରୀ

• ଏକତରଫା ପ୍ରେମ କରୁଥିଲା ବୃଦ୍ଧ

ପୋଲିସର ତଦନ୍ତ ଅନୁସାରେ, ଅଭିଯୁକ୍ତ ଯୁବତୀଙ୍କୁ ଏକତରଫା ପ୍ରେମ କରୁଥିଲା । ଯୁବତୀଙ୍କ ବିବାହ ଅନ୍ୟତ୍ର ଠିକ୍ ହୋଇଯିବା ପରେ ସେ ପ୍ରତିଶୋଧ ପରାୟଣ ହୋଇଥିବା ପୋଲିସ କହିଛି । ମେଡିକାଲରୁ ସୁସ୍ଥ ହୋଇ ଡିସଚାର୍ଜ ହେବା ପରେ ଅଭିଯୁକ୍ତକୁ ଥାନାକୁ ଆଣି ପଚରାଉଚରା କରିଥିଲା ଖାରବେଳ ନଗର ପୋଲିସ । ସଂଗୃହୀତ ପ୍ରମାଣ ଏବଂ ସାଇଣ୍ଟିଫିକ୍ ଟିମ୍ ରିପୋର୍ଟ ଆଧାରରେ ବସନ୍ତ ଅଶ୍ୱିନୀ ଚୌଧୁରୀକୁ ଗିରଫ କରାଯାଇ କୋର୍ଟ ଚାଲାଣ କରାଯାଇଛି । ଅଭିଯୁକ୍ତ ବୃଦ୍ଧକୁ କଠୋର ଦଣ୍ଡ ଦେବାକୁ ପରିବାର ଲୋକେ ଦାବି କରିଛନ୍ତି ।