Premanand Maharaj Reaction / ରସିକ୍ ଦୁଲାରୀ ମୃତ୍ୟୁ ପରେ ପ୍ରଥମ ଥର ମୁହଁ ଖୋଲିଲେ ପ୍ରେମାନନ୍ଦ ମହାରାଜ

ଲକ୍ଷ୍ନୌ: ବୃନ୍ଦାବନର ପ୍ରସିଦ୍ଧ ସନ୍ଥ ପ୍ରେମାନନ୍ଦ ମହାରାଜଙ୍କ ଶିଷ୍ୟ ରସିକ୍ ଦୁଲାରୀ ଶରଣଙ୍କ ମୃତ୍ୟୁ ପରେ ଆସିଲା ବାବାଙ୍କ ପ୍ରଥମ ପ୍ରତିକ୍ରିୟା । ୨୩ ମିନିଟ୍‌ର ଭିଡିଓରେ ଅନେକ କଥା କହିଛନ୍ତି ପ୍ରେମାନନ୍ଦ ମହାରାଜ । ସେ ସିଧାସଳଖ ରସିକ୍ ଦୁଲାରୀଙ୍କ ନାଁ ନେଇନାହାନ୍ତି, ବରଂ ପରୋକ୍ଷରେ ପ୍ରତିକୂଳ ପରିସ୍ଥିତିରେ କିପରି ଧୈର୍ଯ୍ୟ ରଖିବ ସେନେଇ କହିଛନ୍ତି । ଏହାସହିତ ନିନ୍ଦା, ଅପମାନ ଉପରେ ମଧ୍ୟ ସେ ଆଲୋଚନା କରିଛନ୍ତି ।

• ଭିଡିଓରେ କଣ କହିଲେ ପ୍ରେମାନନ୍ଦଜୀ

ପ୍ରବଚନ ବେଳେ ମହାରାଜ ପରୋକ୍ଷରେ ଅନେକ କଥା କହିଛନ୍ତି । ସେ ସିଧାସଳଖ ତାଙ୍କ ବିରୁଦ୍ଧରେ ହେଉଥିବା ବିବାଦ ଓ ଅଭିଯୋଗକୁ ଇସାରା କରିଛନ୍ତି । ପ୍ରେମାନନ୍ଦଜୀ କହିଛନ୍ତି ଯେ ଯେତେବେଳେ କୌଣସି ବ୍ୟକ୍ତି ସମ୍ପୂର୍ଣ୍ଣ ନିର୍ଦ୍ଦୋଷ ଓ ସମାଜ ତାକୁ ନିନ୍ଦା କରେ, ତା ଉପରେ ନାନା ପ୍ରକାରର ଅଭିଯୋଗ ଆସେ । ସେତେବେଳେ ପ୍ରକୃତରେ ଉକ୍ତ ବ୍ୟକ୍ତି ଉପରେ ଭଗବାନଙ୍କ କୃପା ଅଛି ବୋଲି ବୁଝିବା ଆବଶ୍ୟଖ । କଠିନ ଓ ସଙ୍କଟପୂର୍ଣ୍ଣ ସମୟରେ ଜଣେ ବ୍ୟକ୍ତିକୁ ନିଜର ଧୈର୍ଯ୍ୟ ହରାଇବା କଥା ନୁହେଁ, ବରଂ ନିଜର ସବୁକିଛି ଭଗବାନଙ୍କ ଚରଣରେ ଅର୍ପଣ କରିବା ଦରକାର ।

• ନିନ୍ଦା ଓ ଅପମାନକୁ ନେଇ ଏମିତି କହିଲେ

ପ୍ରେମାନନ୍ଦ ମହାରାଜ ବୃନ୍ଦାବନରେ ଚାଲୁଥିବା ଆରୋପ ପ୍ରତ୍ୟାରୋପ ମଧ୍ୟରେ କହିଛନ୍ତି, "ଅପମାନ ଓ ନିନ୍ଦା ବାସ୍ତବରେ କୌଣସି ଖରାପ ଜିନିଷ ନୁହେଁ, ବରଂ ଏହା ଈଶ୍ଵରଙ୍କ ଦ୍ଵାରା ନିଜ ଭକ୍ତମାନଙ୍କୁ ଦିଆଯାଉଥିବା ଫୁଲ । ମୀରା ବାଈ ଓ ଭକ୍ତ ପ୍ରହ୍ଲାଦଙ୍କୁ ମଧ୍ୟ ସମାଜର ଲାଞ୍ଛନା ଶୁଣିବାକୁ ପଡ଼ିଥିଲା । ନିଜ ଭିତରେ ଥିବା ଅସହନୀୟ କଷ୍ଟ ଓ ଅପମାନକୁ ସହ୍ୟ କରିବାକୁ ପଡ଼ିଥିଲା । ସେ ଏ ସବୁ ଭଗବାନଙ୍କ ଇଚ୍ଛା ଭାବି ସହ୍ୟ କରିଥିଲେ ।"

• ମିଥ୍ୟା ଓ କ୍ରୋଧରୁ ଦୂରେଇ ରହିବାକୁ ଦେଲେ ଚେତାବନୀ

ବୃନ୍ଦାବନରେ ଚାଲିଥିବା ଏହି ପୂରା ଘଟଣାକ୍ରମରେ ସେ ନିଜ ଭକ୍ତ ଓ ଶିଷ୍ୟମାନଙ୍କୁ ବିଶେଷ ଚେତାବନୀ ଦେଇ କହିଛନ୍ତି, "ଯେତେବେଳେ ଚାରିଆଡେ ବିପଦ ଓ ବିବାଦର ମାହୋଲ ଥାଏ, ସେତେବେଳେ ଜଣେ ବ୍ୟକ୍ତି କେବେହେଲେ ମିଛର ସହାୟତା ନେବା ଉଚିତ ନୁହେଁ କିମ୍ବା କୌଣସି ଦ୍ଵିତୀୟ ବ୍ୟକ୍ତିର ନିନ୍ଦା କରିବା ଠିକ୍ ନୁହେଁ । ମନରେ ଈର୍ଷା ରଖିବା ପରିବର୍ତ୍ତେ ଉକ୍ତ ବ୍ୟକ୍ତିଙ୍କୁ କ୍ଷମା କରିଦେବା ଉଚିତ । କାରଣ ଭଗବାନ ସତର ନିଷ୍ପତ୍ତି ନିଅନ୍ତି ।"

ପଢନ୍ତୁ ଏହି ଖବର: ପ୍ରେମାନନ୍ଦ ମହାରାଜଙ୍କ ଆଶ୍ରମରୁ ନାବାଳକ ନିଖୋଜ ! ଧାରଣାରେ ବସିଲେ ପରିବାର ଲୋକେ

ଏଠାରେ କହିରଖୁଛୁ କି, ପ୍ରେମାନନ୍ଦ ମହାରାଜଙ୍କ ଶିଷ୍ୟ ରସିକ୍ ଦୁଲାରୀଙ୍କ ମୃତଦେହ ସନ୍ଦିଗ୍ଧ ଅବସ୍ଥାରେ ମିଳିଥିଲା । ଏହାପରେ ତାଙ୍କ ପରିବାର ଏହାକୁ ସାଧାରଣ ମୃତ୍ୟୁ ନୁହେଁ, ବରଂ ଏହା ପଛରେ ଅନ୍ୟ କୌଣସି କାରଣ ଥିବା ଅଭିଯୋଗ କରିଥିଲେ । ଏହାସହିତ ମୃତ୍ୟୁର ପ୍ରକୃତ କାରଣ ପାଇଁ ସଠିକ୍ ତଦନ୍ତର ଆବଶ୍ୟକ ବୋଲି କହିଥିଲେ । ତେବେ ହଠାତ୍ ରସିକ୍‌ଙ୍କ ମୃତ୍ୟୁ କେଉଁ ପରିସ୍ଥିତିରେ ହେଲା ସେ ନେଇ ଲୋକଙ୍କ ମନରେ ଅନେକ ପ୍ରଶ୍ନ ଅଛି । ତେବେ ଏହି ଘଟଣାରେ ପୋଲିସ ତଦନ୍ତ କରୁଛି । ଏଯାବତ୍ ମୃତ୍ୟୁର କାରଣ ଜଣାପଡ଼ିନାହିଁ ।