Argus News - ଆତ୍ମସମ୍ମାନ ପାଇଁ ୨୧ ବର୍ଷର ଆଇନଗତ ଲଢେଇ; ଶେଷରେ ମିଳିଲା ନ୍ୟାୟ

ମଧ୍ୟପ୍ରଦେଶ ହାଇକୋର୍ଟ ଏକ ଗୁରୁତ୍ଵପୂର୍ଣ୍ଣ ରାୟ ଶୁଣାଇଛନ୍ତି । ଦୀର୍ଘ ୨୧ ବର୍ଷ ଆଇନଗତ ଲଢେଇ ପରେ ଚାକିରିରୁ ବିଦା ହୋଇଥିବା ରେଳ କର୍ମଚାରୀ ନାରାୟଣ ନାୟର ନିଜ ଚାକିରି ଫେରିପାଇଛନ୍ତି । ତାଙ୍କୁ ମାତ୍ର ୧୦ ଟଙ୍କା ହେରଫେର ଅଭିଯୋଗରେ ଚାକିରିରୁ ବିଦା କରାଯାଇଥିଲା । ହେଲେ ନିଜ ଆତ୍ମସମ୍ମାନ ପାଇଁ କର୍ମଚାରୀ ଜଣକ ଆଇନଗତ ଲଢେଇ ଲଢିବା ପରେ ଶେଷରେ ନିର୍ଦ୍ଦୋଷ ବୋଲି ଜଣାପଡ଼ିଛି ।

• ୨୦୦୨ ମସିହାର ଘଟଣା

ଏହି ଘଟଣାଟି ୨୦୦୨ ମସିହା ଜାନୁଆରୀ ୪ ତାରିଖରେ ଘଟିଥିଲା । ସେତେବେଳେ ଶ୍ରୀଧାମ ରେଲୱେ ଷ୍ଟେସନର ଟିକଟ କାଉଣ୍ଟରରେ ନାୟର ଡ୍ୟୁଟିରେ ଥିଲେ । ସେତେବେଳେ ପ୍ରବଳ ଭିଡ଼ ଥିଲା ଓ ଲମ୍ବା ଲାଇନ ଲାଗିଥିଲା । ଠିକ୍ ଏହି ସମୟରେ ଜଣେ ଯାତ୍ରୀଙ୍କ ସହ ଭିଜିଲାନ୍ସ ଟିମ ସେଠାରେ ପହଞ୍ଚିଥିଲା । ଯାତ୍ରୀ ଜଣକ ଅଭିଯୋଗ କରିଥିଲେ ଯେ ନାୟର ୩୧ ଟଙ୍କା ଫେରାଇବା ବଦଳରେ ୨୧ ଟଙ୍କା ଫେରାଇଲେ ଓ ୧୦ ଟଙ୍କା ଠକି ରଖିଦେଲେ । ଏହି ଅଭିଯୋଗ ଆସିବା ପରେ ନାୟର ଗୋଟିଏ କଥା ବାରମ୍ବାର ଦୋହରାଇଥିଲେ ଯେ ଭିଡ଼ ଯୋଗୁଁ ଏପରି ହୋଇଥାଇପାରେ । ନାୟରଙ୍କ କଥା ନ ଶୁଣି ତାଙ୍କୁ ସେହି ମୁହୂର୍ତ୍ତରେ ଚାକିରିରୁ ବିଦା କରାଯାଇଥିଲା ।

ଭିଜିଲାନ୍ସ ଆହୁରି ଅଭିଯୋଗ କରିଥିଲା ଯେ ନାୟରଙ୍କ ନିକଟରେ ଟିକଟ ପଇସା ବ୍ୟତୀତ ଅତିରିକ୍ତ ଭାବେ ୪୫୦ ଟଙ୍କା ମିଳିଥିଲା । ତେବେ ନାୟରଙ୍କ କହିବାନୁସାରେ,ଏହି ଟଙ୍କା ତାଙ୍କର ବ୍ୟକ୍ତିଗତ ପଇସା ଥିଲା, ଯାହାକି ସେ ନିଜ ସ୍ତ୍ରୀଙ୍କ ପାଇଁ ଔଷଧ କିଣିବାକୁ ରଖିଥିଲେ । ତେବେ ନାୟରଙ୍କ ବିରୋଧରେ ଅଣାଯାଇଥିବା ଅଭିଯୋଗରେ ପ୍ରଥମେ ୭୭୮ ଟଙ୍କା ଅତିରିକ୍ତ ମିଳିଥିଲା ବୋଲି କୁହାଯାଇଥିଲା ଓ ପରେ ସେହି ସଂଖ୍ୟାକୁ ବଦଳାଇଯାଇଥିଲା । କିନ୍ତୁ ଏହି ଘଟଣାରେ ଚାକିରି ହରାଇବା ପରେ ନାୟର ଆଇନର ଆଶ୍ରୟ ନେଇଥିଲେ ।

• ଆତ୍ମସମ୍ମାନ ପାଇଁ ୨୧ ବର୍ଷର ଆଇନଗତ ଲଢେଇ

ଏହି ଅଭିଯୋଗ ନାୟରଙ୍କୁ ବେଶ ଆଘାତ ଦେଇଥିଲା, କାରଣ ଏହା ତାଙ୍କ ଆତ୍ମସମ୍ମାନର କଥା ଥିଲା । ଏଣୁ ସେ ବିନା ଥକି ୨୧ ବର୍ଷ ଧରି ଆଇନଗତ ଲଢେଇ ଲଢିଥିଲେ । ଶେଷରେ ୨୦୨୬ରେ ରାୟ ନାୟରଙ୍କ ସପକ୍ଷରେ ଥିଲା । ମଧ୍ୟପ୍ରଦେଶ ହାଇକୋର୍ଟ କହିଛନ୍ତି ଯେ ନାୟର ୧୦ ଟଙ୍କା ନେଇଛନ୍ତି ବୋଲି ସେପରି କୌଣସି ଠୋସ ପ୍ରମାଣ ନାହିଁ ଏବଂ ଅଭିଯୋଗ ଆଣିଥିବା ଯାତ୍ରୀ ଜଣକ ଭିଜିଲାନ୍ସ ଟିମର ଥିଲେ । ଏଣୁ କୌଣସି ସାଧାରଣ ଯାତ୍ରୀ ଅଭିଯୋଗ କରିନଥିବାରୁ ସେତେବେଳେ ନାୟରଙ୍କ ବିରୋଧରେ ନିଆଯାଇଥିବା କାର୍ଯ୍ୟାନୁଷ୍ଠାନ ଉଚିତ ନଥିଲା ।

ପଢନ୍ତୁ ଏହି ଖବର:  ସମୟ ବଦଳିଛି, ଘରକାମରେ ନିଜ ପତ୍ନୀଙ୍କୁ ସାହାଯ୍ୟ କରିବାକୁ ପଡ଼ିବ: ସୁପ୍ରିମକୋର୍ଟ

• ଫେରିପାଇଲେ ଚାକିରି

ଏହି ଘଟଣାରେ ହାଇକୋର୍ଟ ରେଳ ବିଭାଗର ଆବେଦନକୁ ଖାରଜ କରିଦେଇଛନ୍ତି । କୋର୍ଟ କହିଥିଲେ ଯେ କୌଣସି ଛୋଟ ଘଟଣା ପାଇଁ ଚାକିରିରୁ ବହିଷ୍କାର କରିବା 'କଠୋର ଏବଂ ଅସଙ୍ଗତ' ଦଣ୍ଡ । ଏବେ ନାରାୟଣ ନାୟରଙ୍କ ସପକ୍ଷରେ ରାୟ ଆସିଛି ସତ, ହେଲେ ଏହା ତାଙ୍କ ପାଇଁ କଠୋର ଥିଲା । କାରଣ ୨୧ ବର୍ଷ ଧରି ସେ ନିଜ ସଚ୍ଚୋଟତାର ପ୍ରମାଣ ଦେଇ ଆସୁଥିଲେ । ମାତ୍ର ୧୦ ଟଙ୍କା ପାଇଁ ଚାକିରି ହରାଇଲେ ଓ ଦୁଇ ଦଶନ୍ଧି ଧରି ଆଇନଗତ ଲଢେଇ ଲଢିଲେ ।