Crime News / ପୁରୁଣା ବିବାଦରୁ ଠେଙ୍ଗାରେ ପିଟିପିଟି ନେଇଗଲେ ପୂର୍ବତନ ବିଧାୟକଙ୍କ ଜୀବନ

ନୂଆଦିଲ୍ଲୀ: ପୂର୍ବତନ ବିଧାୟକଙ୍କୁ ହତ୍ୟା । ପୁରୁଣା ବିବାଦରୁ ଗଡ଼ିଲା ମୁଣ୍ଡ । ରାଜସ୍ଥାନର ଭରତପୁର ଜିଲ୍ଲାରେ ପୁରୁଣା ବିବାଦକୁ ନେଇ ପୂର୍ବତନ ବିଧାୟକ ଅତର ସିଂହ ଭଡ଼ାନାଙ୍କୁ ଠେଙ୍ଗାରେ ପିଟିପିଟି ହତ୍ୟା କରାଯାଇଛି । ପଥର କ୍ରଶରକୁ ଅତର ସିଂହଙ୍କୁ ହତ୍ୟା କରା ଯାଇଥିବା ସୋମବାର ପୋଲିସ ସୂଚନା ଦେଇଛି ।

ସୂଚନା ଅନୁସାରେ, ଶନିବାର ରାତିରେ ଅତର ସିଂହ ଭୋଣ୍ଡା ଗାଁ ନିକଟରେ ଥିବା କ୍ରଶରକୁ ଯାଇଥିଲେ । କ୍ରଶରକୁ ଯାଇଥିବା ବେଳେ ଅତର ସିଂହ ଓ ତାଙ୍କ ସହଯୋଗୀ ଗଗନ ଶର୍ମାଙ୍କୁ ଗ୍ରାମବାସୀ ପଥର ଫିଙ୍ଗିବା ସହ ଠେଙ୍ଗାରେ ପିଟିଥିଲେ ।

ଏଥିସହ ପଢ଼ନ୍ତୁ: ନାଇଟି ପିନ୍ଧା ଚୋର; ଆମ୍ବୁଲାନ୍ସରେ ଆସି ଏଟିଏମ ଲୁଟିଲେ, ଦେଖନ୍ତୁ ଭିଡିଓ 

ଉଭୟଙ୍କୁ ଗୁରୁତର ଅବସ୍ଥାରେ ମେଡିକାଲ୍‌ରେ ଭର୍ତ୍ତି କରାଯାଇଥିଲା । ପରେ ଅତର ସିଂହଙ୍କୁ ଜୟପୁର ଏସଏମଏସ୍ ହସ୍ପିଟାଲ୍‌କୁ ରେଫର୍ କରାଯାଇଥିଲା । ଚିକିତ୍ସାଧିନ ଅବସ୍ଥାରେ ଅତର ସିଂହ ଆଖି ବୁଜିଛନ୍ତି । ଅତରଙ୍କ ସହଯୋଗୀ ଗଗନଙ୍କ ଚିକିତ୍ସା ଏବେ ଭରତପୁର ହସ୍ପିଟାଲ୍‌ରେ ଚାଲିଛି ।

ପୋଲିସ ଅନୁସାରେ, ଅତର ସିଂହ ଗାଁର କିଛି ଜମିକୁ ଅବୈଧ ଭାବେ ଅକ୍ତିଆର୍ କରି ବେଆଇନ୍ ପଥର କ୍ରଶର ଚଳାଇଥିବା ଗ୍ରାମବାସୀ ଅଭିଯୋଗ କରି ଆସୁଛନ୍ତି । ପ୍ରାୟ ବର୍ଷେ ହେଲା ଉକ୍ତ ପଥର କ୍ରଶର ବନ୍ଦ ରହିଥିବା ବେଳେ ଅତର ସିଂହ ତାହାକୁ ପୁଣି ଖୋଲିବାକୁ ପ୍ରୟାସ କରୁଥିଲେ ।

ପ୍ରତିବାଦରୁ ପିଟିପିଟି ହତ୍ୟା

ତେବେ ପ୍ରଥର କଶର ପୁଣି ଖୋଲାଯିବା ପ୍ରସ୍ତାବକୁ ବିରୋଧ କରି ଆସୁଥିଲେ ଗ୍ରାମବାସୀ । ଯାହାକୁ ନେଇ ଗ୍ରାମବାସୀ ୧୦ରୁ ୧୫ ଦିନ ହେଲା ଶାନ୍ତିପୂର୍ଣ୍ଣ ଭାବେ ପ୍ରତିବାଦ କରି ଆସୁଥିଲେ । ତେବେ ରବିବାର ସନ୍ଧ୍ୟାରେ ଅତର ସିଂହ ୪୦ରୁ ୫୦ ଲୋକଙ୍କୁ ନେଇ ଆସିବା ସହ ପଥର କ୍ରଶର ସାଇଟ୍‌ରୁ ଲୋକଙ୍କୁ ହଟାଇବାକୁ ପ୍ରୟାସ କରିବା ବେଳେ ମୁହାଁମୁହିଁ ସ୍ଥିତି ଉପୁଜିଥିଲା ।

ଉଭୟ ପକ୍ଷ, ଉଭୟ ପକ୍ଷଙ୍କ ଉପରେ ଆକ୍ରମଣ କରିଥିଲେ । ଯେଉଁଥିରେ ପୂର୍ବତନ ବିଧାୟକ ଅତର ସିଂହଙ୍କ ମୃତ୍ୟୁ ହୋଇଛି । ଏହି ଘଟଣା ପରେ ଗାଁରେ ଉତ୍ତେଜନା ଲାଗି ରହିଥିବାରୁ ଆଇନ୍ ଶୃଙ୍ଖଳା ରକ୍ଷା ଲାଗି ପୋଲିସ ଫୋର୍ସ ମୁତୟନ କରାଯାଇଛି । ଅତର ସିଂହଙ୍କ ମୃତଦେହ ବ୍ୟବଚ୍ଛେଦ ଲାଗି ପଠା ଯାଇଛି ।

ଏଥିସହ ପଢ଼ନ୍ତୁ: ମେଟ୍ରୋରେ ସିଟ୍‌କୁ ନେଇ ମହାଭାରତ; ଚାଲିଗଲା ଯାତ୍ରୀଙ୍କ ଜୀବନ 

ଅତର ସିଂହ କିଏ ?

ଭରତପୁରର ବୟାନା ଆସନରୁ ୨୦୦୩ରେ ଅତର ସିଂହ ବିଜେପି ଟିକେଟ୍‌ରେ ନର୍ବାଚନ ଲଢ଼ି ବିଜୟୀ ହୋଇଥିଲେ । ୨୦୦୩ରେ ବିଧାୟକ ହେବା ପରେ ବିଜେପି ଛାଡ଼ି କଂଗ୍ରେସରେ ସାମିଲ୍ ହୋଇଥିଲେ । ରାଜନୀତିରେ ସକ୍ରିୟ ରହିବା ସହ ଅତର ସିଂହ ଖଣି ଓ ପଥର କ୍ରଶର ବ୍ୟବସାୟ ସହ ଜଡ଼ିତ ଥିଲେ ।