Argus News - 'ବିବାହ ପାଇଁ କେହି ଝିଅ ଦେଉନାହାନ୍ତି', ମଶା ଯୋଗୁଁ ଚିନ୍ତାରେ ପୂରା ଗାଁ

ଏମିତି ଏକ ଗାଁ ଯେଉଁଠି ମଶା କରିଦେଉନି ବାହାଘର । ଗାଁରେ ଏତେ ମାତ୍ରାରେ ମଶା ହୋଇଛନ୍ତି ଯେ, ସେଠାରେ ରହିବା ବି ମୁସ୍କିଲ ହୋଇପଡ଼ିଛି । ରାତି ହେବା ମାତ୍ରେ ଭଣ ଭଣ ହେଉଛନ୍ତି ମଶା । ଯେତେ କବାଟ କିଳିଲେ ବି ମଶା ପରି ଛୋଟ ପତଙ୍ଗଟିଏ ମଣିଷକୁ କଲବଲ କରୁଛି । ଏହି ଗାଁର ଏପରି ଅବସ୍ଥା ହୋଇଯାଇଛି ଯେ ଏଠି ଝିଅ ଦେବାକୁ ବି ଲୋକେ ଅମଙ୍ଗ ହେଲେଣି । ଫଳରେ ଅନେକ ଯୁବକଙ୍କ ବାହାଘର ହୋଇପାରୁନଥିବା ଜଣାପଡ଼ିଛି ।

• ସନ୍ଧ୍ୟା ହେଲେ ଫେରିଯାଆନ୍ତି ଅତିଥି

ସ୍ଥାନୀୟ ଲୋକଙ୍କ କହିବାନୁସାରେ, ଯେତେବେଳେ କେହି ଅତିଥି ଘରକୁ ଆସନ୍ତି, ସେମାନେ ସନ୍ଧ୍ୟା ହେବା ମାତ୍ରେ ଫେରିଯାଆନ୍ତି । ବାହାରୁ ଆସୁଥିବା ଲୋକେ ଗାଁରେ ଏତେ ମାତ୍ରାରେ ମଶା ଦେଖି ଅସ୍ତବ୍ୟସ୍ତ ହୋଇଯାଆନ୍ତି । ଏପରିକି ସନ୍ଧ୍ୟାରେ ଘରୁ ବାହାରିଲା ମାତ୍ରେ ମଶା ପାଟି, ନାକ ଓ କାନ ଭିତରେ ପଶିଯାଆନ୍ତି । ଏପରି ସମସ୍ୟା ଯୋଗୁଁ ଏହି ଗାଁରେ କେହି ଝିଅ ଦେବାକୁ ବି ମନା କରୁଛନ୍ତି । ଏହି କାରଣରୁ ଗ୍ରାମବାସୀ ବେଶ ଚିନ୍ତାରେ ଥିବା କହିଛନ୍ତି । ସେପଟେ ଗାଁ ହୋଇଥିବାରୁ ଏଠାରେ ବହୁ ପାଳିତ ପଶୁ ଅଛନ୍ତି । ମଶାରୁ ବର୍ତ୍ତିବା ଲାଗି ଗାଁ ଲୋକେ ପାଳିତ ପଶୁ ନିକଟରେ ମଶାଦାନି ରଖନ୍ତି । ମଶା କାମୁଡ଼ିବା ଯୋଗୁଁ ପାଳିତ ଗାଈ ରୋଗାଗ୍ରସ୍ତ ହୋଇଯାଉଥିବା ମଧ୍ୟ ଅଭିଯୋଗ ହେଉଛି ।

• କେଉଁଠି ଅଛି ଏହି ଗାଁ ?

ଗୁଜୁରାଟ ରାଜକୋଟ ବେଜା ଗାଁରେ ଏପରି ଅଜବ ତଥା ଗମ୍ଭୀର ସମସ୍ୟା ଉପୁଜିଛି । ଏହି ଗାଁର ଭୌଗୋଳିକ ସ୍ଥିତି ଏପରି ଯେ ଅଧା ଗାଁ ରାଜକୋଟ ମହାନଗର ନିଗମ ଅଞ୍ଚଳରେ ଆସୁଛି ଓ ଆଉ ଅଧା ଗାଁ RUDA (ରାଜକୋଟ ଅର୍ବାନ ଡେଭଲପମେଣ୍ଟ ଅଥୋରିଟି)ରେ ଆସିଥାଏ । ଗାଁରେ ଚାରିପାଖରେ ବହୁ ମାତ୍ରାରେ ପଙ୍କ ହେବା ଯୋଗୁଁ ଏପରି ସମସ୍ୟା ସୃଷ୍ଟି ହୋଇଥିବା ଗ୍ରାମବାସୀ ଅଭିଯୋଗ କରିଛନ୍ତି ।

ପଢନ୍ତୁ ଏହି ଖବର:  ସମସ୍ତଙ୍କୁ ଚମକାଇଦେଲେ ୮୯ ବର୍ଷୀୟ ବୃଦ୍ଧା; ୨୭ ମହଲାରୁ ତଳକୁ ଓହ୍ଲାଇଲେ

• ସ୍ଵତନ୍ତ୍ର ଟେକ୍ନୋଲୋଜିର ବ୍ୟବହାର କରୁଛି ପ୍ରଶାସନ

ରାଜକୋଟ ମହାନଗର ନିଗମ କମିଶନର କହିଛନ୍ତି ଯେ ପଙ୍କେ ଏତେ ଶୀଘ୍ର ବ୍ୟାପିଯାଏ ଯେ ମେସିନ୍ ସାହାଯ୍ୟରେ ବାହାର କରିବା ପରେ ମଧ୍ୟ ଏହା କିଛି ଦିନ ମଧ୍ୟରେ ପୁଣି ଦେଖାଯାଏ । ତେଣୁ ରାଜକୋଟ ନଗର ନିଗମ ଲକ୍ଷ୍ନୌ ନଗର ନିଗମ ସହିତ ଯୋଗାଯୋଗ କରିଛି । କାରଣ ଲକ୍ଷ୍ନୌର ଗୋମତୀ ନଦୀରୁ ଏହି ସମସ୍ୟାକୁ ସଫଳତାର ସହ ଦୂର କରିଛି ସେଠାକାର ପ୍ରଶାସନ । ସେଠାରେ ଟ୍ରାସ୍ ଆରେଷ୍ଟର ପ୍ରଯୁକ୍ତିବିଦ୍ୟା ସଫଳ ହୋଇଥିଲା । ଏବେ ରାଜକୋଟରେ ଏହି ସମସ୍ୟାର ସମାଧାନ ପାଇଁ ସମାନ ପ୍ରଯୁକ୍ତିବିଦ୍ୟା ବ୍ୟବହାର କରାଯିବ ।