Carry Bag Charge / ଶପିଂ ପରେ ବ୍ୟାଗ୍ ପାଇଁ ୩୦ ଟଙ୍କା ନେଇଥିଲା ଶୋରୁମ୍, କୋର୍ଟ ଲଗାଇଲେ ୨୬ ହଜାର ଫାଇନ୍

ନୂଆଦିଲ୍ଲୀ: କ'ଣ ଶୋରୁମ୍‌ରେ ସପିଂ ବେଳେ ଆପଣଙ୍କୁ ମଧ୍ୟ ବ୍ୟାଗ୍ ପାଇଁ ଅତିରିକ୍ତ ଟଙ୍କା ମଗା ଯାଉଛି ? ତାହେଲେ ଆପଣ ଖାଉଟି ଅଦାଲତରର ଦ୍ଵାରସ୍ଥ ହୋଇ ଆପଣଙ୍କ ଅଧିକାରର ସୁରକ୍ଷା କରିପାରିବେ ।

ହରିୟାଣାରେ ଏଭଳି ଏକ ମାମଲାରେ ଖାଉଟି ଅଦାଲତଙ୍କ ରାୟ ଆସିଛି । କ୍ୟାରି ବ୍ୟାଗ୍ ପାଇଁ ଗ୍ରାହକଙ୍କ ଠାରୁ ଫ୍ୟାଶନ କମ୍ପାନୀ ରେଡ୍ ଟେପ୍ ୩୦ ଟଙ୍କା ନେଇିଲା । ଏହି ମାମଲାରେ ଖାଉଟି ଅଦାଲତ କମ୍ପାନୀକୁ ଦୋଷୀ ମାନିବା ସହ ୩୦ ଟଙ୍କା ଫେରାଇବା ଏଥିସହ ଗ୍ରାହକଙ୍କୁ ମୋଟ ୨୬ ହଜାର ଟଙ୍କା ଦେବାକୁ ନିର୍ଦ୍ଦେଶ ଦେଇଛନ୍ତି ।

ଏଥିସହ ପଢ଼ନ୍ତୁ: ଅପରେସନ୍ ସିନ୍ଦୂର ଉପରେ ଡୋଭାଲଙ୍କ ବଡ଼ ଖୁଲାସା ! 'ଭାରତର ସହନଶୀଳତାକୁ ଦୁର୍ବଳତା ଭାବନ୍ତୁ ନାହିଁ' 

ଏହି ମାମଲା ହେଉଛି ୨୦୨୫ ଅଗଷ୍ଟ ୩୧ ତାରିଖର । ଜଣେ ଗ୍ରାହକ ଗୁରୁଗ୍ରାମରେ ଥିବା ରେଡ୍ ଟେପ୍ ଶୋରୁମରୁ ସାମଗ୍ରୀ କଣିବା ପାଇଁ ଯାଇଥିଲେ । ସେଠାରୁ ୪ ହଜାର ୭୧୩ ଟଙ୍କାର ସାମଗ୍ରୀ କିଣିଥିଲେ ।

ସାମଗ୍ରୀ ବିଲ୍ ବେଲେ ଶୋରୁମ୍ ୩ଟି କ୍ୟାରି ବ୍ୟାଗ୍ ଲାଗି ଅଲଗା ଭାବେ ୩୦ ଟଙ୍କା ଅତିରିକ୍ତ ଭାବେ ନେଇଥିଲା । ଯାହା ପରେ ଗ୍ରାହକ ଜଣଙ୍କ ମାଗଣାରେ କ୍ୟାରି ବ୍ୟାଗ୍ ଦେବାକୁ ଦାବି କରିଥିଲେ । କାରଣ କିଣିଥିବା ସାମଗ୍ରୀ ହାତରେ ନେବା ସହଜ ନଥିଲା । କିନ୍ତୁ ଶୋରୁମ୍ କର୍ତ୍ତୃପକ୍ଷ ଶୁଣିନଥିଲେ ।

ଖାଉଟି ଅଦାଲତ ଗଲେ ଗ୍ରାହକ

ଯାହାପରେ ଗ୍ରାହକ ଜଣଙ୍କ କ୍ୟାରି ବ୍ୟାଗ୍ ପାଇଁ ଟଙ୍କା ଆଦାୟକୁ ଭୁଲ୍ ଦର୍ଶାଇ ଖାଉଟି ଅଦାଲତର ଦ୍ଵାରସ୍ଥ ହୋଇଥିଲେ । ଗ୍ରାହକ କହିଥିଲେ, ସାମଗ୍ରୀ କିଣିବା ପରେ ବ୍ୟାଗ୍ ଦେବା ଦୋକାନର ଦାୟିତ୍ଵ ହେବା ଦରକାର । କୋର୍ଟ ମଧ୍ୟ ଏହି ମାମଲାରେ ପୁରୁଣା ମାମଲାର ଉଦାହରଣ ଦେଇ ଶୋରୁମ୍ କ୍ୟାରି ବ୍ୟାଗ୍ ପାଇଁ ଟଙ୍କା ନେବା ଉପରେ ପ୍ରଶ୍ନ ଉଠାଇଥିଲେ ।

କୋର୍ଟ କହିଥିଲେ, ଗ୍ରାହକଙ୍କୁ କ୍ୟାରି ବ୍ୟାଗ ଦେବା ନାଁରେ ଶୋରୁମ୍ ନିୟମିତ ଟଙ୍କା ନେଇ ପାରିବ ନାହିଁ । ଏପରିକି ଗ୍ରାହକଙ୍କ ନିକଟରେ ସାମଗ୍ରୀ ପହଞ୍ଚିବା ପାଇଁ ପ୍ୟାକେଜିଂ ଶୋରୁମ୍‌ର ଦାୟିତ୍ଵ ହେବା ଦରକାର ବୋଲି କୋର୍ଟ କହିଛନ୍ତି ।

ଏଥିସହ ପଢ଼ନ୍ତୁ: ୧୫ ଅଗଷ୍ଟ ପୂର୍ବରୁ ଦିଲ୍ଲୀକୁ ବୋମା ଧମକ; ଆଲର୍ଟରେ ସୁରକ୍ଷାକର୍ମୀ 

୨୬ ହଜାର ଟଙ୍କା ଜରିମାନା

ମାମଲାରେ କୋର୍ଟ, ରେଡ୍ ଟେପ୍‌କୁ ୩୦ ଟଙ୍କା ଫେରାଇବା ଲାଗି ନିର୍ଦ୍ଦେଶ ଦେଇଛନ୍ତି । ଏହି ଟଙ୍କାକୁ ୨୦୨୫ ଅଗଷ୍ଟ ୩୧ରୁ ଫେରସ୍ତ ତାରିଖ ପର୍ଯ୍ୟନ୍ତ ବାର୍ଷିକ ୯ ପ୍ରତିଶତ ସୁଧ ସହ ଦେବାକୁ କୁହାଯାଇଛି । ଏଥିସହ ଗ୍ରାହକଙ୍କୁ ମାନସିକ ଯନ୍ତ୍ରଣା ପାଇଁ ୧୫ ହଜାର ଓ ମାମଲାର ଖର୍ଚ୍ଚ ପାଇଁ ଆଉ ୧୧ ହଜାର ଟଙ୍କା ଦେବାକୁ ଶୋ ରୁମ୍‌କୁ ନିର୍ଦ୍ଦେଶ ଦେଇଛନ୍ତି କୋର୍ଟ । ଏଭଳି ଭାବେ ମୋଟ ୨୬ ହଜାର ଟଙ୍କା ୪୫ ଦିନ ମଧ୍ୟରେ ଦେବାକୁ ଶୋରୁମ୍‌କୁ ନିର୍ଦ୍ଦେଶ ରହିଛି ।