ଭାରତରେ ସଡ଼କ ଦୁର୍ଘଟଣା ଏକ ଗୁରୁତର ସମସ୍ୟା ପାଲଟିଛି । ଏହା ଉଭୟ ସରକାର ଓ ସମାଜ ପାଇଁ ଚିନ୍ତର କାରଣ ପାଲଟିଛି । ସଡ଼କ ପରିବହନ ଏବଂ ରାଜପଥ ମନ୍ତ୍ରଣାଳୟ ୨୦୨୪ ମସିହାରେ ଭାରତରେ ସଡ଼କ ଦୁର୍ଘଟଣା ଉପରେ ଏକ ରିପୋର୍ଟ ପ୍ରକାଶ କରିଛି । ରିପୋର୍ଟ ଅନୁସାରେ, ୨୦୨୪ ମସିହାରେ ଦେଶରେ ପ୍ରାୟ ୪.୮୮ ଲକ୍ଷ ସଡ଼କ ଦୁର୍ଘଟଣା ହୋଇଥିବା ବେଳେ ୧.୭୭ ଲକ୍ଷରୁ ଅଧିକ ଲୋକଙ୍କ ମୃତ୍ୟୁ ଘଟିଛି । ଯାହା ୨୦୨୩ ତୁଳନାରେ ୧.୪୮ ପ୍ରତିଶତ ବୃଦ୍ଧି ପାଇଛି ।

ନ୍ୟୁଜ୍ ଏଜେନ୍ସୀ PTI ଅନୁସାରେ, ଭାରତରେ ସଡ଼କ ଦୁର୍ଘଟଣା ୨୦୨୪ ରିପୋର୍ଟରେ କୁହାଯାଇଛି ଯେ ୨୦୨୪ ମସିହାରେ ଦେଶର ସମସ୍ତ ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳରେ ମୋଟ ୪ ଲକ୍ଷ ୮୭ ହଜାର ୭୦୭ ସଡ଼କ ଦୁର୍ଘଟଣା ଘଟିଛି । ଏହି ସମସ୍ତ ମାମଲା ପୋଲିସ ବିଭାଗ ଦ୍ୱାରା ପଞ୍ଜୀକୃତ ହୋଇଥିଲା ।

ଏହି ଦୁର୍ଘଟଣାଗୁଡ଼ିକରେ ୧ ଲକ୍ଷ ୭୭ ହଜାର ୧୭୫ ଜଣଙ୍କ ମୃତ୍ୟୁ ଏବଂ ୪ ଲକ୍ଷ ୭୧ ହଜାର ୪୪୧ ଜଣ ଆହତ ହୋଇଛନ୍ତି । ଏହାର ଅର୍ଥ ହେଉଛି ଦେଶରେ ପ୍ରତି ଘଣ୍ଟାରେ ହାରାହାରି ୫୬ଟି ଦୁର୍ଘଟଣା ଘଟୁଛି ଏବଂ ୨୦ ଜଣଙ୍କ ମୃତ୍ୟୁ ହେଉଛି ।

ଏହି ରିପୋର୍ଟ ଦେଶର ବିଭିନ୍ନ ରାଜ୍ୟରେ ଦୁର୍ଘଟଣା ପରିସ୍ଥିତିର ଗମ୍ଭୀରତାକୁ ପ୍ରକାଶ କରୁଛି । ୨୦୨୪ ମସିହାରେ ସଡ଼କ ଦୁର୍ଘଟଣା ମୃତ୍ୟୁ ତାଲିକାରେ ତାମିଲନାଡୁ ଶୀର୍ଷରେ ରହିଥିଲା । ତାମିଲନାଡ଼ୁରେ ସର୍ବାଧିକ ୬୭ ହଜାର ୫୨୬ ସଡ଼କ ଦୁର୍ଘଟଣା ରେକର୍ଡ ହୋଇଥିଲା । ସେହିପରି ଉତ୍ତରପ୍ରଦେଶରେ ମଧ୍ୟ ସର୍ବାଧିକ ୨୪ ହଜାର ୧୧୮ ଜଣ ସଡ଼କ ଦୁର୍ଘଟଣାରେ ମୃତ୍ୟୁବରଣ କରିଥିଲେ ।

ଅଧିକ ପଢ଼ନ୍ତୁ: ଆଉ ମନଇଚ୍ଛା କିଣି ପାରିବେନି ପେଟ୍ରୋଲ୍-ଡିଜେଲ୍; ଧାର୍ଯ୍ୟ ହେଲା ସୀମା

ରିପୋର୍ଟ ଅନୁଯାୟୀ, ଏକ୍ସପ୍ରେସୱେ ସମେତ ଜାତୀୟ ରାଜପଥ (NH)ରେ ମୋଟ ୧୫୦,୯୫୮ ଦୁର୍ଘଟଣା ଘଟିଛି । ସେହିପରି ରାଜ୍ୟ ରାଜପଥରେ ୧୦୩,୫୩୮ ଦୁର୍ଘଟଣା ରେକର୍ଡ କରାଯାଇଥିଲା, ଯେତେବେଳେ ଅନ୍ୟ ରାସ୍ତାରେ ୨୩୩,୨୧୧ ଦୁର୍ଘଟଣା ଘଟିଥିଲା ।

ଏଥିମଧ୍ୟରୁ ଜାତୀୟ ରାଜପଥରେ ୬୪,୭୭୨ (୩୬.୬%), ରାଜ୍ୟ ରାଜପଥରେ ୩୯,୨୭୭ (୨୨.୨%) ଏବଂ ଅନ୍ୟାନ୍ୟ ରାସ୍ତାରେ ୭୩,୧୨୬ (୪୧.୩%) ଜଣଙ୍କ ମୃତ୍ୟୁ ଘଟିଛି । ବର୍ଷକ ମଧ୍ୟରେ ରିପୋର୍ଟ ହୋଇଥିବା ୧୬୪,୩୭୮ଟି ମାରାତ୍ମକ ଦୁର୍ଘଟଣା ମଧ୍ୟରୁ ୫୯,୦୪୩ (୩୫.୯%) ଜାତୀୟ ରାଜପଥରେ, ୩୬,୩୯୨ (୨୨.୧%) ରାଜ୍ୟ ରାଜପଥରେ ଏବଂ ୬୮,୯୪୩ (୪୧.୯%) ଅନ୍ୟାନ୍ୟ ରାସ୍ତାରେ ଘଟିଛି ।

ମନ୍ତ୍ରଣାଳୟର ରିପୋର୍ଟରେ ଏହା ମଧ୍ୟ ସ୍ପଷ୍ଟ ଭାବରେ ଉଲ୍ଲେଖ ଅଛି ଯେ ଦୁଇଚକିଆ ଯାନ ଚାଳକ ଏବଂ ପଦଯାତ୍ରୀଙ୍କ ଜୀବନ ସର୍ବାଧିକ ବିପଦରେ ଅଛି । ଦୁର୍ଘଟଣାରେ ମୃତ୍ୟୁବରଣ କରିଥିବା ଲୋକଙ୍କ ମଧ୍ୟରୁ ବାଇକ୍ ଏବଂ ସ୍କୁଟର ଆରୋହୀଙ୍କ ଅଂଶ ସବୁଠାରୁ ଅଧିକ (୪୬.୨%) ଥିଲା ।