Rohullah Mehdi Arrest / ବଲିଉଡ୍ ଅଭିନେତା ରୋହୁଲ୍ଲାହ ମେହଦି ଗିରଫ, ଫିଲ୍ମ ଷ୍ଟାଇଲ୍‌ରେ ଜାଲ ବିଛାଇ ଧରିଲା ପୋଲିସ

ମୁମ୍ବାଇ: ମାୟାନଗରୀ ମୁମ୍ବାଇରୁ ସାମ୍ନାକୁ ଆସିଛି ବଲିଉଡ୍‌ର ଡ୍ରଗ୍ସ କନେକ୍ସନ୍ । ଡ୍ରଗ୍ସ ମାମଲାରେ ଅଭିନେତା ରୋହୁଲ୍ଲାହ ମେହଦିଙ୍କୁ ଗିରଫ କରିଛି ମୁମ୍ବାଇ ପୋଲିସ । ମୀରା ରୋଡ୍‌ର କାଶିମୀରା ପୋଲିସ NDPS ମାମଲାରେ ଅଭିନେତା ରୋହୁଲ୍ଲାହଙ୍କୁ ଗିରଫ କରିଛି ।

ମାମଲାରେ ୨୮ ଗ୍ରାମ MD ଡ୍ରଗ୍ସ ଜବତ କରାଯାଇଥିବା ପୋଲିସ ସୂଚନା ଦେଇଛି । ଜବତ ଡ୍ରଗ୍ସର ଆନୁମାନିକ ବଜାର ମୂଲ୍ୟ ପ୍ରାୟ ୫ ଲକ୍ଷ ୬୦ ହଜାର ଟଙ୍କା ହେବ । ଏହି ମାମଲାରେ ପୋଲିସ ଦୁଇ ଜଣଙ୍କ ଅଭିଯୁକ୍ତଙ୍କୁ ଗିରଫ କରିଥିବା ଜଣାପଡ଼ିଛି ।

ଏଥିସହ ପଢ଼ନ୍ତୁ: ଖାଦ୍ୟ ଥାଳି ପାଇଁ ମାଡ଼ି ଆସୁଛି ସଙ୍କଟ! ୨୦୨୭ ପାଇଁ କ'ଣ ରହିଛି ଜେପିମୋର୍ଗାନ ପୂର୍ବାନୁମାନ? 

ପୋଲିସ ଅନୁସାରେ, ଡ୍ରଗ୍ସ ବିକ୍ରି ପାଇଁ Snapchat, WhatsApp ଓ ଅନ୍ୟ ସୋସିଆଲ୍ ମିଡିଆ ଆପ୍ ବ୍ୟବହାର ହେଉଥିବା ନେଇ ସୂଚନା ମିଳିଥିଲା । ଏହାପରେ ପୋଲିସ ଜଣେ ନକଲି ଗ୍ରାହକଙ୍କ ସହାୟତାରେ ଡ୍ରଗ୍ସ କିଣାବିକା ନେଟୱର୍କକୁ ଧରିବା ପାଇଁ ଯୋଜନା କରିଥିଲା ।

ଏହି ଅପରେସନ୍‌ରେ କାସିଫ ନାମକ ଜଣେ ବ୍ୟକ୍ତିଙ୍କୁ ଦହିସର ଚେକ୍ ନାକା ନିକଟ ଠାକୁର ମଲ୍ ପାଖରେ ଧରିଥିଲା । ତାଙ୍କ ପାଖରୁ ୨୮ ଗ୍ରାମ MD ଡ୍ରଗ୍ସ ଜବତ ହୋଇଥିବା ପୋଲିସ କହିଛି। ପଚରାଉଚରା ପରେ ରୋହୁଲ୍ଲାହ ମେହଦିଙ୍କ ନାମ ସାମ୍ନାକୁ ଆସିଥିଲା ।

ଏହାପରେ ପୋଲିସ ମଲାଡ୍‌ର ଏକ ଷ୍ଟୁଡିଓ ବାହାରେ ପହଞ୍ଚିଥିଲା । ସେଠାରେ ଶୁଟିଂ କରୁଥିବା ସମୟରେ ମେହଦିଙ୍କୁ ଗିରଫ କରାଯାଇଥିଲା । ଏହି ମାମଲାର FIR ନମ୍ବର ୪୩୭/୨୦୨୬ରେ ମେହଦିଙ୍କ ନାମ ମୁଖ୍ୟ ଅଭିଯୁକ୍ତ ଭାବେ ରହିଥିବା ପୋଲିସ କହିଛି ।

ଏଥିସହ ପଢ଼ନ୍ତୁ: ମୁମ୍ବାଇରେ ବଡ଼ ଅଘଟଣ; ୨୨ ଫୁଟ୍‌ର ଗଣେଶ ମୂର୍ତ୍ତି ଭାଙ୍ଗି ଯାଇ ୨ ଜଣଙ୍କ ମୃତ୍ୟୁ 

ପୋଲିସର ସୂଚନା ଅନୁସାରେ, ରୋହୁଲ୍ଲାହ ମେହଦି ଜମ୍ମୁ-କଶ୍ମୀରର ବଡ଼ଗାମ ଜିଲ୍ଲାର ବାସିନ୍ଦା ସେ ବର୍ତ୍ତମାନ ମୁମ୍ବାଇର ଗୋରେଗାଓଁ ଅଞ୍ଚଳରେ ରହୁଛନ୍ତି । ସେ ଶାହିଦ କପୁରଙ୍କ ଫିଲ୍ମ ‘ଦେବା’ରେ ମଧ୍ୟ କାମ କରିଛନ୍ତି । ଏହାଛଡ଼ା କିଛି ୱେବ୍ ସିରିଜ୍‌ରେ ମଧ୍ୟ ସେ ନଜର ଆସିଛନ୍ତି । ଗିରଫ ପରେ ମେହଦିଙ୍କୁ କୋର୍ଟରେ ହାଜର କରାଯାଇଥିଲା । କୋର୍ଟ ତାଙ୍କୁ ୫ ଦିନ ପାଇଁ ପୋଲିସ ହେପାଜତକୁ ପଠାଇଛନ୍ତି।

ଏବେ ପୋଲିସ ଡ୍ରଗ୍ସ ସପ୍ଲାଏର ନେଟୱର୍କର ତଦନ୍ତ କରୁଛି । ମେହଦି କାହାକୁ ଡ୍ରଗ୍ସ ଯୋଗାଉଥିଲେ କି ? ଏହି ନେଟୱର୍କରେ ଆଉ କେଉଁମାନେ ଅଛନ୍ତି ? ଫିଲ୍ମ ଇଣ୍ଡଷ୍ଟ୍ରି ସହ ଏହାର କୌଣସି ସମ୍ପର୍କ ଅଛି କି ନାହିଁ, ସେନେଇ ଯାଞ୍ଚ ଚାଲିଛି । ଏହି ମାମଲାରେ ବର୍ତ୍ତମାନ ଦୁଇ ଜଣଙ୍କୁ ଗିରଫ କରାଯାଇଛି ।