ପାକିସ୍ତାନରୁ ଭାରତ ଆସି ପ୍ରେମ ବିବାହ କରିଥିବା ସୀମା ହୈଦର ଫେବୃଆରୀ ୨୦୨୬ରେ ଷଷ୍ଠ ଥର ଲାଗି ମାଆ ହୋଇଥିଲେ । ତେବେ ଗୁରୁବାର ସୀମା ଓ ସ୍ଵାମୀ ସଚିନ ଉଭୟ ମିଶି ନବଜାତ ପୁଅର ନାମକରଣ କରିଛନ୍ତି । ସେମାନେ ନିଜ ପୁଅର ନାମ 'ଭାରତ' ରଖିଛନ୍ତି । ଉତ୍ତରପ୍ରଦେଶ ନୋଏଡା ସ୍ଥିତ ରବୁପୁରା ବାସଭବନରେ ଆୟୋଜିତ ନାମକରଣ ସମାରୋହରେ ଏହି ନାମକରଣ କରାଯାଇଛି । ସମ୍ପୂର୍ଣ୍ଣ ହିନ୍ଦୁ ପରମ୍ପରା ଅନୁଯାୟୀ ନାମକରଣ ହୋଇଥିବାବେଳେ ହିନ୍ଦୁ ଧର୍ମ ଗ୍ରହଣ କରି ସୀମା ବେଶ ଖୁସ୍ ଥିବା କହିଛନ୍ତି ।

• ପୁଅର ନାମକରଣକୁ ନେଇ କଣ କହିଲେ ସୀମା ?

ସୀମା ହୈଦର ନିଜ ପୁଅର ନାମକରଣକୁ ନେଇ କହିଛନ୍ତି, "ହିନ୍ଦୁ ଧର୍ମରେ ଘରେ ସନ୍ତାନ ଜନ୍ମ ହେଲେ ନାମକରଣ କରାଯାଏ । ଏହା ପୂର୍ବରୁ ଯେତେବେଳେ ମୀରା ଜନ୍ମ ହୋଇଥିଲା ସେତେବେଳେ ନାମକରଣର ଏପରି ଆୟୋଜନ କରିଥିଲି । ଆମ ହିନ୍ଦୁ ଧର୍ମ ଅତି ସୁନ୍ଦର । ହିନ୍ଦୁ ଧର୍ମରେ ହେଉଥିବା ଛୋଟ ଛୋଟ ପର୍ବପର୍ବାଣି ସମସ୍ତଙ୍କ ମଧ୍ୟରେ ଶ୍ରଦ୍ଧାଭାବକୁ ବୃଦ୍ଧି କରିଥାଏ । ଧର୍ମ ପରିବର୍ତ୍ତନକୁ ନେଇ ମୁଁ ପଶ୍ଚାତାପ କରୁନାହିଁ, ବରଂ ବେଶ ଖୁସି ଅଛି । ମୁଁ ହିନ୍ଦୁ ବୋଲି ନିଜେ ଗର୍ବ କରେ ।"

• କାହିଁକି ପୁଅ ନାଁ 'ଭାରତ' ରଖିଲେ ?

ସୀମା ଓ ସଚିନ ପୁଅ ନାଁ କାହିଁକି ଭାରତ ରଖିଲେ ବୋଲି ପ୍ରଶ୍ନରେ ସୀମା କହିଛନ୍ତି ଯେ ପଣ୍ଡିତ 'ଭ'ରେ କୌଣସି ନାମ ରଖିବାକୁ କହିଥିଲେ । ଏଣୁ ଭାରତ ଠାରୁ ଆଉ କୌଣସି ସୁନ୍ଦର ନାମ ନାହିଁ ଭାବି ଦମ୍ପତି ଏହି ନାମକୁ ବାଛିଥିବା କହିଛନ୍ତି । ପୁଅର ଏହି ନାମକୁ ନେଇ ପରିବାରରେ ସମସ୍ତେ ଖୁସିଥିବା ମଧ୍ୟ କହିଛନ୍ତି ସୀମା ।

ପଢନ୍ତୁ ଏହି ଖବର: ସୀମା ହାଇଦରଙ୍କ ପୁଅ 'ଭାରତୀୟ' ହେବ ନା...

• ପାକିସ୍ତାନ ଫେରିବାକୁ ଚାହାଁନ୍ତି କି ସୀମା ?

ସୀମା ହୈଦର ଗଣମାଧ୍ୟମକୁ ପ୍ରତିକ୍ରିୟା ଦେବା ପରେ ଭାରତର ବେଶ ପ୍ରଶଂସା କରିଛନ୍ତି । ଯେତେବେଳେ ଭାରତର ମ୍ୟାଚ୍ ହୁଏ, ସେତେବେଳେ ସେ ଭାରତର ବିଜୟ ପାଇଁ ପ୍ରାର୍ଥନା କରିଥାନ୍ତି । ଯେତେବେଳେ ଭାରତ ମ୍ୟାଚ୍ ଜିତେ, ସେତେବେଳେ ତାଙ୍କୁ ଗର୍ବ ଅନୁଭବ ହୁଏ ବୋଲି କହିଛନ୍ତି ସୀମା । ଭାରତର ମ୍ୟାଚରେ ବିଜୟ ପରେ ପୁରା ପରିବାର ଏହି ବିଜୟକୁ ପାଳନ କରିଥାଏ । ରବୁପୁରାରେ ବିଭିନ୍ନ ଧର୍ମର ଲୋକ ବାସ କରନ୍ତି, ସେମାନେ ତାଙ୍କୁ ବୋହୀ ମାନନ୍ତି ଓ ଶ୍ରଦ୍ଧା କରନ୍ତି । ଏଣୁ ସୀମା କେବେ ହେଲେ ପାକିସ୍ତାନ ଫେରିବାକୁ ଚାହୁଁନଥିବା କହିଛନ୍ତି ।

• ୪ ଛୁଆଙ୍କ ସହ ଭାରତ ଆସିଥିଲେ ସୀମା

ଏଠାରେ କହିରଖୁଛୁ କି, ସୀମାଙ୍କ ପୂର୍ବ ସ୍ଵାମୀଙ୍କଠାରୁ ୪ଟି ସନ୍ତାନ ଥିଲେ । ୨୦୨୩ରେ ସେ ଛୁଆଙ୍କ ସହିତ ନେପାଳ ଦେଇ ଭାରତ ପଳାଇ ଆସିବା ପରେ ସଚିନଙ୍କୁ ବିବାହ କରିଥିଲେ ଓ ତାଙ୍କ ଠାରୁ ଦୁଇଟି ସନ୍ତାନର ମାଆ ହୋଇଛନ୍ତି । ସଚିନଙ୍କ ସହିତ ସୀମାଙ୍କ ପରିଚୟ PUBG ଗେମ୍ ଖେଳିବା ସମୟରେ ହୋଇଥିଲା । ସୀମା ଯେତେବେଳେ ସଚିନଙ୍କୁ ବିବାହ କରିବା ପାଇଁ ପାକିସ୍ତାନ ଛାଡ଼ି ପଳାଇ ଆସିଥିଲେ, ସେତେବେଳେ ସଚିନ ତାଙ୍କୁ ଏକ ଭଡ଼ା ଘରେ ରଖିଥିଲେ । ଏହି ଦମ୍ପତି ଏହା ମଧ୍ୟ ଦାବି କରନ୍ତି ଯେ ଏମାନେ ୨୦୨୩ରେ କାଠମାଣ୍ଡୁର ଏକ ମନ୍ଦିରରେ ବିବାହ କରିଥିଲେ । ପାକିସ୍ତାନରୁ ପଳାଇ ଆସିଥିବା ସୀମାଙ୍କୁ ନେଇ ସେତେବେଳେ ଗଣମାଧ୍ୟମରେ ବେଶ ଚର୍ଚ୍ଚା ହୋଇଥିଲା । ସମସ୍ତେ ତାଙ୍କୁ ପାକିସ୍ତାନର ଗୁପ୍ତଚର ବୋଲି କହୁଥିଲେ । ହେଲେ ଶେଷରେ ସୀମା ସଚିନଙ୍କୁ ବିବାହ କରି ହିନ୍ଦୁ ଧର୍ମ ଗ୍ରହଣ କରି ଭାରତରେ ରହୁଛନ୍ତି ।