ଦୀର୍ଘ ଦିନର ବିବାଦ, ଆଲୋଚନା, ଘନ ଘନ ବୈଠକ ପରେ ଶେଷରେ କର୍ଣ୍ଣାଟକରେ କଂଗ୍ରେସ ସରକାର ମଙ୍ଗ ଧରିବାକୁ ଯାଉଛନ୍ତି ଡି.କେ ଶିବକୁମାର । ରାଜ୍ୟରେ କଂଗ୍ରେସର 'ସଙ୍କଟ ମୋଚକ' ସାଜିଥିବା ଶିବକୁମାର ଶନିବାର ବିଧାୟକ ଦଳ ନେତା ନିର୍ବାଚିତ ହୋଇଛନ୍ତି । ବିଧାନ ସୌଧରେ ବସିଥିବା ଗୁରୁତ୍ୱପୂର୍ଣ୍ଣ ବୈଠକରେ ସିଦ୍ଧାରାମୈୟା ନିଜେ ଶିବକୁମାରଙ୍କ ନାମ ପ୍ରସ୍ତାବିତ କରିଥିଲେ, ଯାହାକୁ ସମସ୍ତ ବିଧାୟକ ସମର୍ଥନ କରିଛନ୍ତି । ଏହା ପରେ ଆସନ୍ତା ଜୁନ୍ ୩ ତାରିଖରେ ସେ ନେବେ ମୁଖ୍ୟମନ୍ତ୍ରୀ ପଦର ଶପଥ । ହେଲେ ଏହା କ'ଣ କଂଗ୍ରେସ ପାଇଁ କର୍ଣ୍ଣାଟକ କନ୍ଦଳର ଅନ୍ତ ନା ଏଇଠୁ ଆରମ୍ଭ ହେବ ନୂଆ ଏକ ପଲିଟିକାଲ୍ ଫାଇଟ୍‌ । ଏହାକୁ ନେଇ ଏବେ ଚର୍ଚ୍ଚା ଜୋର୍ ଧରିଛି ।

କର୍ଣ୍ଣାଟକର ଏହି କ୍ଷମତା ପରିବର୍ତ୍ତନ ପରେ କଂଗ୍ରେସ ଭିତରେ ଏକ ବଡ଼ ଫାଟ ସୃଷ୍ଟି ହେବାର ଆଶଙ୍କା ଦେଖାଦେଇଛି । ଶିବକୁମାରଙ୍କୁ ମୁଖ୍ୟମନ୍ତ୍ରୀ କରି କଂଗ୍ରେସ ହାଇକମାଣ୍ଡ କର୍ଣ୍ଣାଟକର ବିବାଦକୁ କିଛି ସମୟ ପାଇଁ ଶାନ୍ତ କରି ଦେଇଥାଇପାରନ୍ତି, କିନ୍ତୁ ଦଳ ହାତରୁ ଏବେ ଭୋଟ୍ ବ୍ୟାଙ୍କ ଖସିଯିବାର ଭୟ ଦେଖା ଦେଲାଣି । ସିଦ୍ଧାରାମୈୟା ହେଉଛନ୍ତି କର୍ଣ୍ଣାଟକର ପଛୁଆ ବର୍ଗ, ସଂଖ୍ୟାଲଘୁ ଏବଂ ଦଳିତ ଗୋଷ୍ଠୀର ସବୁଠାରୁ ବଡ଼ ଚେହେରା । କର୍ଣ୍ଣାଟକରେ ଏହି ବର୍ଗର ଭୋଟ୍ ସେୟାର ପ୍ରାୟ ୩୯% ରୁ ଅଧିକ ।

ଅଧିକ ପଢ଼ନ୍ତୁ: ଡ୍ରେସ ଚିରିଲେ, ଅଣ୍ଡା ଫିଙ୍ଗିଲେ...ଶେଷରେ ହେଲମେଟ୍ ପିନ୍ଧି ବାହାରିଲେ ଅଭିଷେକ ବାନାର୍ଜୀ

ସିଦ୍ଧାରାମୈୟାଙ୍କ ଇସ୍ତଫା ଯୋଗୁଁ ତାଙ୍କ ଗାଁ ସିଦ୍ଧାରାମନହୁଣ୍ଡି ସମେତ ସାରା ରାଜ୍ୟରେ ଏହି ପଛୁଆ ବର୍ଗର ସମର୍ଥକଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି । ଡି.କେ. ଶିବକୁମାର ପ୍ରଭାବଶାଳୀ 'ଭୋକାଲିଗା' ସମୁଦାୟରୁ ଆସୁଛନ୍ତି । ତାଙ୍କୁ ସିଏମ୍ କରାଯିବା ପରେ ରାଜ୍ୟର ଅନ୍ୟତମ ବୃହତ୍ତମ ସମୁଦାୟ 'ଲିଙ୍ଗାୟତ' ମଧ୍ୟ ଅସନ୍ତୁଷ୍ଟ ହୋଇଛନ୍ତି । ସେପଟେ ସିଦ୍ଧାରାମୈୟା ରାଜ୍ୟସଭାକୁ ଯିବାକୁ ମନା କରିଦେଇଛନ୍ତି ଏବଂ କର୍ଣ୍ଣାଟକ ରାଜନୀତିରେ ସକ୍ରିୟ ରହିବେ ବୋଲି ସ୍ପଷ୍ଟ କରିଛନ୍ତି । ଏହାଦ୍ୱାରା ଦଳ ଭିତରେ ଦୁଇଟି ଶକ୍ତି କେନ୍ଦ୍ର ସୃଷ୍ଟି ହେବ, ଯାହା ଆଗାମୀ ୨୦୨୮ ବିଧାନସଭା ନିର୍ବାଚନରେ କଂଗ୍ରେସକୁ ଭାରି ପଡ଼ିପାରେ ବୋଲି ଚର୍ଚ୍ଚା ଜୋର୍ ଧରିଛି ।

ଦେଶରେ କଂଗ୍ରେସ ନିଜ ଅସ୍ତିତ୍ବ ବଞ୍ଚାଇବାକୁ ସଂଘର୍ଷ କରୁଛି । ଏମିତିରେ ଯେଉଁଠି ଟିକିଏ ବିଜୟ ପାଉଛି ସେଠି ଦେଖାଯାଉଛି କ୍ଷମତା କନ୍ଦଳ । କେରଳ, କର୍ଣ୍ଣାଟକରେ ଏହାକୁ ପୁରା ଦେଶ ଦେଖିଛି । ଏମିତିରେ ଆଗକୁ ଥିବା ନିର୍ବାଚନରେ ଦଳ ଅସନ୍ତୁଷ୍ଟଙ୍କୁ କେମିତି ମ୍ୟାନେଜ କରୁଛି ତାହା ଦେଖିବାକୁ ବାକି ରହିଲା ।