ଷ୍ଟାର କ୍ରିକେଟର ସ୍ମୃତି ମନ୍ଧାନା-ପଲାଶ ମୁଚ୍ଛାଲ ଏବେ ତାଙ୍କ ବିବାହକୁ ନେଇ ବେଶ୍‌ ଚର୍ଚ୍ଚାରେ ଅଛନ୍ତି । ନଭେମ୍ବର ୨୩ରେ ଉଭୟ ବିବାହ ବନ୍ଧନରେ ବାନ୍ଧି ହୋଇଥାନ୍ତେ । କିନ୍ତୁ ମେହେନ୍ଦୀ ଦିନ ରାତିରେ ହଠାତ୍‌ ସ୍ମୃତିଙ୍କ ପିତାଙ୍କ ଅସୁସ୍ଥତା ଯୋଗୁଁ ସେମାନଙ୍କ ବିବାହ ସ୍ଥଗିତ ରଖାଯାଇଥିଲା । ଏହି ସମୟରେ ପଲାଶ ମଧ୍ୟ ଅସୁସ୍ଥ ହୋଇପଡ଼ିଥିଲେ । ଯାହାଫଳରେ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା ।

ପଲାଶ ଏବଂ ସ୍ମୃତିଙ୍କ ବିବାହ ସ୍ଥଗିତ ହେବା ପରଠାରୁ ଏହାକୁ ନେଇ ସୋସିଆଲ ମିଡିଆରେ ଅନେକ ଗୁଜବ ସାମ୍ନାକୁ ଆସିଛି । ଏମିତିକି ପଲାଶ ସ୍ମୃତିଙ୍କୁ ଧୋକା ଦେଇଥିବା ଖବର ସାମ୍ନାକୁ ଆସିଥିଲା । ଏମିତିକି ଜଣେ ଯୁବତୀଙ୍କ ସହ ପଲାଶଙ୍କ ଚାଟିଂର ସ୍କ୍ରିନ୍‌ ସଟ୍‌ ମଧ୍ୟ ସୋସିଆଲ ମିଡିଆରେ ଭାଇରାଲ ହୋଇଥିଲା । ତେବେ ଏହି ଗୁଜବ ଉପରେ ଏପର୍ଯ୍ୟନ୍ତ ଏହି ଯୋଡି କୌଣସି ପ୍ରତିକ୍ରିୟା ଦେଇନାହାଁନ୍ତି । ପଲାଶଙ୍କ ଭଉଣୀ ପଲକ ଏବଂ ତାଙ୍କ ମାଆ ଇନଷ୍ଟାଗ୍ରାମରେ ପୋଷ୍ଟ ସେୟାର କରି ସ୍ପଷ୍ଟ କରିଛନ୍ତି ଯେ ସ୍ମୃତିଙ୍କ ପିତାଙ୍କ ଅସୁସ୍ଥତା ଯୋଗୁଁ ପଲାଶ ଏବଂ ସ୍ମୃତିଙ୍କ ବିବାହ ସ୍ଥଗିତ ରଖାଯାଇଛି ।

ଅଧିକ ପଢ଼ନ୍ତୁ: ବାରବାଟୀ ଟିକେଟ୍‌: ରାତିରୁ ଲଗାଇ ପାରିବେନି ଲାଇନ୍‌, ସକାଳ ୯ଟାରୁ ଆରମ୍ଭ ହେବ ଟିକେଟ୍‌ ବିକ୍ରି

ଏସବୁ ମଧ୍ୟରେ ଏବେ ପଲାଶଙ୍କ ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି । ଏହି ଭିଡିଓରେ ଦେଖିବାକୁ ମିଳୁଛି କି ପଲାଶ ପ୍ରେମାନନ୍ଦ ମହାରାଜଙ୍କ ଦରବାରରେ ବସିଛନ୍ତି । ପ୍ରେମାନନ୍ଦ ମହାରାଜଙ୍କ ଦରବାରରେ ପଲାଶଙ୍କୁ ଦେଖି ପ୍ରଶଂସକମାନେ ଦ୍ୱନ୍ଦ୍ୱରେ ପଡ଼ିଛନ୍ତି । ଏହି ଭିଡିଓ ଭାଇରାଲ ହେବା ପରେ କେତେକ ପଲାଶଙ୍କୁ ସମର୍ଥନ କରୁବେଳେ ଅନ୍ୟମାନେ ତାଙ୍କୁ ଟ୍ରୋଲ୍ କରୁଛନ୍ତି ।

ପଲାଶ ମୁଚ୍ଛଲଙ୍କ ମାଆ ଅମିତା ମୁଚ୍ଛଲଙ୍କ ଏକ ବୟାନ ଏବେ ସାମ୍ନାକୁ ଆସିଛି । ଅମିତା କହିଛନ୍ତି ଯେ ସବୁକିଛି ଯୋଜନା ଅନୁଯାୟୀ ହେବ । ସେ ଏହା ମଧ୍ୟ କହିଛନ୍ତି ଯେ ପଲାଶ ସ୍ମୃତିଙ୍କ ପିତାଙ୍କ ସହିତ ବହୁତ ଘନିଷ୍ଠ ସମ୍ପର୍କ ରହିଛି । ଆଉ ତାଙ୍କ ସ୍ବାସ୍ଥ୍ୟାବସ୍ଥା ବିଗିଡ଼ିବାରୁ ବିବାହ ସ୍ଥଗିତ ରଖିବାକୁ ନିଷ୍ପତ୍ତି ନିଆଯାଇଛି ।

ଅମିତା ମୁଚ୍ଛଲ ଜାତୀୟ ଗଣମାଧ୍ୟମକୁ କହିଛନ୍ତି, "ହଳଦୀ ଉତ୍ସବ ପରଠାରୁ ଆମେ ପଲାଶଙ୍କୁ ବାହାରକୁ ଯିବାକୁ ଦେଇନାହୁଁ । ସେ ବହୁତ ଚାପଗ୍ରସ୍ତ ଏବଂ କାନ୍ଦୁଛନ୍ତି । ତାଙ୍କ ସ୍ୱାସ୍ଥ୍ୟ ମଧ୍ୟ ଖରାପ ହୋଇଛି । ତେଣୁ ତାଙ୍କୁ ଚାରି ଘଣ୍ଟା ପାଇଁ ହସ୍ପିଟାଲରେ ରଖିବାକୁ ପଡିଲା । ତାଙ୍କ ଉପରେ ଏକ IV ଡ୍ରିପ୍ ଲଗାଯାଇଥିଲା ଏବଂ ECG କରାଯାଇଥିଲା । ସବୁକିଛି ସ୍ୱାଭାବିକ ଆସିଥିଲା'' ।

ଅମିତା ମୁଚ୍ଛଲ କହିଛନ୍ତି ଯେ ସ୍ମୃତି ଏବଂ ପଲାଶ ଉଭୟ ପରିସ୍ଥିତିକୁ ନେଇ ଚିନ୍ତିତ ଅଛନ୍ତି । ପରିବାର ବିବାହ ପାଇଁ ସମ୍ପୂର୍ଣ୍ଣ ପ୍ରସ୍ତୁତ । ଅମିତା ଆହୁରି କହିଛନ୍ତି ଯେ ତାଙ୍କ ପୁଅ ଖୁବ୍ ଶୀଘ୍ର ବିବାହ କରି କନ୍ୟାକୁ ଘରକୁ ଆଣିବ ।

ଅମିତା ମୁଚ୍ଛଲ ଆହୁରି କହିଛନ୍ତି, "ସବୁକିଛି ଯୋଜନା ଅନୁଯାୟୀ ହେବ ଏବଂ ବିବାହ ଖୁବ୍ ଶୀଘ୍ର ହେବ । ପଳାଶଙ୍କର ସ୍ମୃତିଙ୍କ ବାପାଙ୍କ ସହିତ ବହୁତ ଘନିଷ୍ଠ ସମ୍ପର୍କ ଅଛି । ସେ ସ୍ମୃତିଙ୍କ ଅପେକ୍ଷା ତାଙ୍କ ବାପାଙ୍କ ନିକଟତର । ତେଣୁ ଯେତେବେଳେ ତାଙ୍କ ସ୍ୱାସ୍ଥ୍ୟ ଖରାପ ହେଲା ପଲାଶ ବିବାହ ସ୍ଥଗିତ ରଖିବାକୁ ନିଷ୍ପତ୍ତି ନେଇଥିଲେ । ଏବେ ସେ ସୁସ୍ଥ ହେଉଛନ୍ତି, ତେଣୁ ସବୁକିଛି ଠିକ୍ ହୋଇଯିବ।"