Software Engineer Death / ଋଣ, ବିବାଦରୁ ଅବସାଦ... ୪୩ ମହଲାରୁ ଡେଇଁ ଜୀବନ ହାରିଲେ ୨୮ ବର୍ଷର ସଫ୍ଟୱେର୍ ଇଞ୍ଜିନିୟର

ନୂଆଦିଲ୍ଲୀ: ବିବାହକୁ ୨ ବର୍ଷ, ଛୁଆଙ୍କୁ ୭ ମାସ । ଅତିଷ୍ଠ ହୋଇ ଜୀବନ ହାରିଦେଲେ ସଫ୍ଟେୱର୍ ଇଞ୍ଜିନିୟର୍ । ୪୩ ମହଲାରୁ ଡେଇଁ ୨୮ ବର୍ଷର ସଫ୍ଟେୱର୍ ଇଞ୍ଜିନିୟର୍ ଆତ୍ମହତ୍ୟା କରିଛନ୍ତି । ଦିଲ୍ଲୀ-ଏନସିଆର୍‌ର ସୁଉଚ୍ଚ ଅଟ୍ଟାଳିକ ସୁପରନୋଭାରେ ଏହି ଅଘଟଣ ଘଟିଛି ।

ସୂଚନା ଅନୁସାରେ, ଶନିବାର ଦ୍ଵି-ପ୍ରହରରେ ସଫ୍ଟୱେର ଇଞ୍ଜିନିୟର ସମ୍ଭବ ଜୈନ ୪୩ତମ ମହଲାରୁ ଡେଇଁ ଆତ୍ମହତ୍ୟା କରିଛନ୍ତି । ପୋଲିସ ତଦନ୍ତରୁ ଜଣାପଡ଼ିଛି ସମ୍ଭବ ଦୀର୍ଘ ଦିନ ହେଲା ଅବସାଦ (Depression)ରେ ଥିଲେ । ପାରିବାରିକ ବିବାଦ, ଛୁଆର ଚିକିତ୍ସା ଖର୍ଚ୍ଚ ଓ ଋଣ ଆଦିକୁ ନେଇ ସମ୍ଭବ ଚିନ୍ତିତ ଥିଲେ । ପୋଲିସ ଅନୁସାରେ, ଆତ୍ମହତ୍ୟା ପୂର୍ବରୁ ସମ୍ଭବ ନିଜ ମୋବାଇଲ୍ ଫୋନ୍‌ରେ ଏକ ଭିଡିଓ ମଧ୍ୟ ରେକର୍ଡ କରିଛନ୍ତି ।

ଏଥିସହ ପଢ଼ନ୍ତୁ: ବିମାନ ହାଇଜାକ୍ କିମ୍ବା କ୍ରାସ୍ କରିବାକୁ ଥିଲା ମାଷ୍ଟରପ୍ଲାନ୍; ସବୁ ସତ ମାନିଲା କୋ-ପାଇଲଟ୍ 

ସେକ୍ଟର-୧୨୬ ଥାନା ପ୍ରଭାରୀ ସୁମନେଶ କୁମାରଙ୍କ ଅନୁସାରେ, ପୋଲିସ ମାମଲାର ଯାଞ୍ଚ କରୁଛି । ପ୍ରାରମ୍ଭିକ ଯାଞ୍ଚ ଓ ଅଭିଭାବକଙ୍କୁ ପଚରାଉଚରାରୁ ଜଣାପଡ଼ିଛି ଯେ, ସମ୍ଭବ ୨୦୨୪ରେ ବିବାହ କରିଥିଲେ । ବର୍ଷ ୨୦୨୫ରେ ସମ୍ଭବର ପୁଅ ଜନ୍ମ ହୋଇଥିଲା । କିନ୍ତୁ ପୁଅ ୭ ମାସରେ ସମୟ ପୂର୍ବରୁ ଜନ୍ମ ନେଇଥିଲା ।

ଛୁଆ ସମୟ ପୂର୍ବରୁ ଜନ୍ମ ହେବା କାରଣରୁ ଦୀର୍ଘ ସମୟ ପର୍ଯ୍ୟନ୍ତ ଚିକିତ୍ସା ଆବଶ୍ୟକ ହୋଇଥିଲା । ପରିବାର ଅନୁସାରେ, ଛୁଆର ଚିକିତ୍ସା ପାଇଁ ପ୍ରାୟ ୪୦ ଲକ୍ଷ ଟଙ୍କା ଖର୍ଚ୍ଚ କରିଥିଲେ ସମ୍ଭବ । ଏବେବି ଛୁଆର ଚିକିତ୍ସାରେ ଲକ୍ଷାଧିକ ଟଙ୍କା ଖର୍ଚ୍ଚ ହେଉଛି ।

ପୋଲିସ ଅନୁସାରେ, ଛୁଆ ଜନ୍ମ ହେବା ପରେ ସମ୍ଭବ ଓ ତାଙ୍କ ପତ୍ନୀଙ୍କ ମଧ୍ୟରେ ବିବାଦ ଉପୁଜିଥିଲା । ଯାହା ପରେ ପତ୍ନୀ କୋର୍ଟଙ୍କ ଦ୍ଵାରସ୍ଥ ହୋଇ ଛାଡ଼ପତ୍ର ଦାବି କରିଥିଲେ । ଉଭୟ ପକ୍ଷ ମଧ୍ୟରେ ସେଟଲମେଣ୍ଟ ବି ହୋଇଥିଲା । ୧୫ ଲକ୍ଷ ଟଙ୍କାରେ କଥା ଛିଡ଼ିଥିଲା ।

ଏଥିସହ ପଢ଼ନ୍ତୁ: ଫିଲ୍ମ ପରି ଉଡ଼ିକି ପଡ଼ିଲେ; କାର ଧକ୍କାରେ ବୃଦ୍ଧ ଦମ୍ପତି ଗୁରୁତର, ଦେଖନ୍ତୁ ଭିଡିଓ 

ପତ୍ନୀ ୧ କୋଟି ଟଙ୍କା ଦାବି କରିଥିବା ବେଳେ ୧୫ ଲକ୍ଷ ଟଙ୍କାରେ ସେଟଲମେଣ୍ଟ ହୋଇଥିଲା । ପରିବାର ଅନୁସାରେ, ସମ୍ଭବ ପ୍ରଥମ କିସ୍ତିରେ ୭ ଲକ୍ଷ ଟଙ୍କା ପତ୍ନୀଙ୍କୁ ଦେଇଥିଲେ । ଦ୍ଵିତୀୟ କିସ୍ତିରେ ଆଉ ସାଢ଼େ ୭ ଲକ୍ଷ ଟଙ୍କା ଦେବାକୁ ବାକି ଅଛି ।

ଏହାଛଡ଼ା ସମ୍ଭବ ଉପରେ ଏକାଧିକ ଋଣ ରହିଛି । ଏବେ ସମ୍ଭବଙ୍କ ଅସୁସ୍ଥ ପୁଅ ତାଙ୍କ ସହ ଥିବାବେଳେ ଘର ଲୋକେ ଦେଖାଶୁଣା କରୁଛନ୍ତି । ଆତ୍ମହତ୍ୟା ପୂର୍ବରୁ ସମ୍ଭବ ତାଙ୍କ ବାପାଙ୍କୁ ମେସେଜ କରି ଅବସାଦ ଓ ଆତ୍ମହତ୍ୟା କଥା ୪ ଦିନ ତଳେ କହିଥିବା ପୋଲିସ ଜାଣିବାକୁ ପାଇଛି । ସମସ୍ତ ଦିଗରୁ ଏବେ ପୋଲିସ ଛାନଭିନ୍ ଜାରି ରଖିଛି ।