ସୁପ୍ରିମକୋର୍ଟଙ୍କ ଆର୍ଟିଫିସିଆଲ ଇଣ୍ଟେଲିଜେନ୍ସ କମିଟି ଦ୍ଵାରା 'ଆର୍ଟିଫିସିଆଲ ଇଣ୍ଟେଲିଜେନ୍ସ ୟୁଜେସ୍ ଅଫ କୋର୍ଟ ୨୦୨୬' ନାମ ଏକ ଚିଠା ଜାରି କରାଯାଇଛି । ଯେଉଁଥିରେ ନ୍ୟାୟିକ ପ୍ରକ୍ରିୟାକୁ ଦ୍ରୁତ ଓ ପ୍ରଭାବଶାଳୀ କରିବା ପାଇଁ ହେବ AIର ବ୍ୟବହାର ନେଇ ଉଲ୍ଲେଖ ରହିଛି । ଏହି ଚିଠା ଉପରେ ଆସନ୍ତୁ ଜୁନ ୨୦ ତାରିଖ ସୁଦ୍ଧା ଦେଶର ସମସ୍ତ ଓକିଲ, ସାଧାରଣ ଜନତା, ନ୍ୟାୟିକ ଅଧିକାରୀ ଓ ଆଇନ ବିଶେଷଜ୍ଞମାନେ ମତାମତ ରଖିବାକୁ କୁହାଯାଇଛି । ଫଳରେ ବିବାଦକୁ ଏଡ଼ାଇ ଏହାକୁ ଲାଗୁ କରାଯାଇପାରିବ ।

ଚିଠାରେ କୁହାଯାଇଛି ଯେ, ଦେଶର ସମସ୍ତ କୋର୍ଟରେ ନ୍ୟାୟିକ ପ୍ରକ୍ରିୟାକୁ ଦ୍ରୁତ ଓ ପ୍ରଭାବଶାଳୀ କରିବା ଲାଗି କୃତ୍ରିମ ବୁଦ୍ଧିମତା ବା ଏଆଇର ବ୍ୟବହାର କରିବାକୁ ନିଷ୍ପତ୍ତି ନିଆଯାଇଛି । ମାମଲା ପରିଚାଳନା, କଜ ଲିଷ୍ଟ ପ୍ରସ୍ତୁତ କରିବା, ଶୁଣାଣିର ତାରିଖ ଧାର୍ଯ୍ୟ କରିବା ଏବଂ ମାମଲାଗୁଡ଼ିକର ପ୍ରାଥମିକତା ସ୍ଥିର କରିବାରେ ସହାୟତା ମିଳିବ । କୋର୍ଟଙ୍କ କାମ ଯେପରିକି ଟ୍ରାନ୍ସକ୍ରିପସନ (ରେକର୍ଡ ଭିଡିଓ କିମ୍ବା ଅଡିଓକୁ ସ୍କ୍ରିପ୍ଟରେ ପରିଣତ କରିବା), ନିଷ୍ପତ୍ତି ଓ ମାମଲାଗୁଡ଼ିକର ଅନୁବାଦ, ଆଇନ ଗବେଷଣା, ଯାଞ୍ଚ ପ୍ରକ୍ରିୟା ଓ ପ୍ରଶାସନିକ କାର୍ଯ୍ୟଗୁଡ଼ିକରେ ଏଆଇର ସାହାଯ୍ୟ ନିଆଯାଇପାରିବ ।

• ଭବିଷ୍ୟବାଣୀ କରିପାରିବନି AI

ସୁପ୍ରିମକୋର୍ଟ ଏହି ଚିଠାରେ ସ୍ପଷ୍ଟ କରିଛନ୍ତି ଯେ ଏଆଇ କୌଣସି ମାମଲାର ଫଳାଫଳର ଭବିଷ୍ୟବାଣୀ କରିପାରିବ ନାହିଁ କିମ୍ବା ବିଚାରପତିଙ୍କ ଭୂମିକା ଗ୍ରହଣ କରିବ । ସମସ୍ତ ମାମଲାର ଚୂଡ଼ାନ୍ତ ନିଷ୍ପତ୍ତି ନେବାର ଅଧିକାର କେବଳ ବିଚାରପତିଙ୍କ ନିକଟରେ ରହିବ । କେବଳ ନ୍ୟାୟିକ ପ୍ରକ୍ରିୟାକୁ ଦ୍ରୁତ କରିବା ଲାଗି ଏଆଇର ବ୍ୟବହାର କରାଯିବ ।

• କୋର୍ଟରେ କଣ କରିବ ଏଆଇ ?

ଚିଠାରେ କୁହାଯାଇଛି ଯେ କୋର୍ଟରେ ଆର୍ଟିଫିସିଆଲ ଇଣ୍ଟେଲିଜେନ୍ସ କେବଳ ସହାୟକ ଭାବରେ କାମ କରିବ । ଏଆଇ ଦ୍ଵାରା ଲେଖାଯାଇଥିବା କୌଣସି କଣ୍ଟେଣ୍ଟ, ପରାମର୍ଶ, ଅନୁବାଦ ଓ ଟ୍ରାନ୍ସକ୍ରିପସନର ଭେରିଫିକେସନ କରାଯିବା ପରେ ହିଁ ଏହାର ବ୍ୟବହାର କରାଯିବ, ଯାହାଦ୍ଵାରା କୌଣସି ଭୁଲକୁ ଏଡ଼ାଯାଇପାରିବ ।

ପଢନ୍ତୁ ଏହି ଖବର: ହାଇକୋର୍ଟକୁ ସୁପ୍ରିମକୋର୍ଟଙ୍କ କଡ଼ା ନିର୍ଦ୍ଦେଶ; ୩ମାସ ଭିତରେ ଶୁଣାଅ ସଂରକ୍ଷିତ ରାୟ

• ଏହି କାମ କରିବନି AI

ସୁପ୍ରିମକୋର୍ଟ ସ୍ପଷ୍ଟ କରିଛନ୍ତି ଯେ ଏଆଇର ବ୍ୟବହାରରେ କିଛି ପ୍ରତିବନ୍ଧକ ମଧ୍ୟ ଲଗାଯାଇଛି । ଯେପରିକି ଜାମିନ ମିଳିବାର ସମ୍ଭାବନା, ଅଭିଯୁକ୍ତର ଭବିଷ୍ୟତ ବ୍ୟବହାର କିମ୍ବା ପୁଣି ଥରେ ଅପରାଧ କରିବାର ଆଶଙ୍କା, ସାକ୍ଷୀର ବିଶ୍ଵସନୀୟତା କିମ୍ବା କୌଣସି ମକଦ୍ଦମାର ସମ୍ଭାବ୍ୟ ପରିଣାମର ଆକଳନ AI ଦ୍ୱାରା କରାଯାଇପାରିବ ନାହିଁ । କୋର୍ଟ କାମରେ ଏଆଇର ବ୍ୟବହାର କରିବା ପୂର୍ବରୁ ଏକ ପ୍ରକାର ପରୀକ୍ଷା କରାଯିବ । ଅର୍ଥାତ ଏହାର ନିୟନ୍ତ୍ରଣ ଓ ସୁରକ୍ଷିତ ପରିବେଶରେ ଏହାର ବ୍ୟବହାର କରାଯାଇ ହେବ କି ନାହିଁ ତା' ଉପରେ ଯାଞ୍ଚ କରାଯିବ । ଏଆଇର ବ୍ୟବହାର ଉପରେ ମଧ୍ୟ ଏକ ସ୍ଵତନ୍ତ୍ର କମିଟି ନଜର ରଖିବ ।