ବୁଲା କୁକୁର ପ୍ରସଙ୍ଗରେ ସୁପ୍ରିମକୋର୍ଟଙ୍କ ବଡ଼ ନିର୍ଦ୍ଦେଶ । ୮ ସପ୍ତାହ ମଧ୍ୟରେ ସରକାରୀ ପ୍ରତିଷ୍ଠାନ ଓ ରାଜପଥରୁ ବୁଲା ପଶୁଙ୍କୁ ହଟାଇବାକୁ ନିର୍ଦ୍ଦେଶ ଦେଇଛନ୍ତି ସୁପ୍ରିମକୋର୍ଟ । ହସପିଟାଲ, ସ୍କୁଲ, ରେଳ ଷ୍ଟେସନ ଓ ବସ ଷ୍ଟାଣ୍ଡରେ ବୁଲା କୁକୁରଙ୍କ ପ୍ରବେଶକୁ ରୋକିବା ପାଇଁ ଆବଶ୍ୟକ ଅନୁସାରେ ପରିସରକୁ ବାଡ଼ ଦେଇ ସୁରକ୍ଷିତ କରିବାକୁ ପରାମର୍ଶ ଦେଇଛନ୍ତି ସୁପ୍ରିମକୋର୍ଟ ।

ସୁପ୍ରିମକୋର୍ଟ କହିଛନ୍ତି, ସ୍ଥାନୀୟ ପୌର କର୍ତ୍ତୃପକ୍ଷ ନିୟମିତ ଭାବରେ ଯାଞ୍ଚ କରିବେ । ଯାହା ଦ୍ୱାରା ଏହା ନିଶ୍ଚିତ ହେବ ଯେ ସରକାରୀ ପ୍ରତିଷ୍ଠାନ ପରିସରରେ କୌଣସି ବୁଲା କୁକୁର ରହୁନାହାଁନ୍ତି । ପ୍ରତ୍ୟେକ ବୁଲା କୁକୁରକୁ ତୁରନ୍ତ ଏପରି ପରିସରରୁ ବାହାର କରିବା ସହ ବନ୍ଧ୍ୟାକରଣ ପରେ ଆଶ୍ରୟସ୍ଥଳକୁ ସ୍ଥାନାନ୍ତରିତ କରାଯିବା ଉଚିତ ବୋଲି ସୁପ୍ରିମକୋର୍ଟ କହିଛନ୍ତି ।

ଅଧିକ ପଢ଼ନ୍ତୁ: 'ରାହୁଲ ଗାନ୍ଧି ମିଥ୍ୟା ତଥ୍ୟର ସୌଦାଗର, ହୋଇଯାଇଛନ୍ତି ମାନସିକ ଦେବାଳିଆ'

ରାଜଧାନୀ ଦିଲ୍ଲୀ ସମେତ ସାରା ଦେଶରେ ବୁଲା କୁକୁର ସମସ୍ୟା ମାମଲାର ଶୁଣାଣି କରି ବିଚାରପତି ବିକ୍ରମ ନାଥ, ବିଚାରପତି ସନ୍ଦୀପ ମେହେଟ୍ଟା ଓ ବିଚାରପତି ଏନଭି ଅଞ୍ଜାରିଆଙ୍କୁ ନେଇ ଗଠିତ ଖଣ୍ଡପୀଠ ଏହି ନିର୍ଦ୍ଦେଶ ଦେଇଛନ୍ତି । ଏନେଇ ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳ ପରବର୍ତ୍ତୀ ଶୁଣାଣି ପୂର୍ବରୁ ସତ୍ୟପାଠ ଦାଖଲ କରିବେ । କୁକୁର କାମୁଡ଼ାର ବର୍ଦ୍ଧିତ ଘଟଣା ଦେଖି, ଏହି ସୁପ୍ରିମକୋର୍ଟ ନିର୍ଦ୍ଦେଶନାମା ଜାରି କରିଛନ୍ତି । ରିପୋର୍ଟରେ ଉଲ୍ଲେଖ କରାଯାଇଥିବା ତ୍ରୁଟିକୁ ଦୂର କରିବା ପାଇଁ ନିଆଯାଇଥିବା ପଦକ୍ଷେପ ବିଷୟରେ ସୁପ୍ରିମକୋର୍ଟ ତଥ୍ୟ ଦାଖଲ କରିବେ ରାଜ୍ୟ ସରକାର ।

ବସ ଷ୍ଟାଣ୍ଡ ସମେତ ଉପରୋକ୍ତ କୌଣସି ସ୍ଥାନରୁ ଯଦି ବୁଲା କୁକୁର ଦେଖାଯାଉଛନ୍ତି, ତା’ହେଲେ ସେମାନଙ୍କୁ ତୁରନ୍ତ କାବୁ କରି ଆଶ୍ରୟ ସ୍ଥଳରେ ଛଡ଼ାଯିବ। ସେମାନେ ନିଜ ନିଜର ପୁରୁଣା ସ୍ଥାନକୁ ଯେମିତି ନ ଫେରିବେ, ତା’କୁ ନିଶ୍ଚିତ କରିବାକୁ କୋର୍ଟ କହିଛନ୍ତି।

ଅଧିକ ପଢ଼ନ୍ତୁ: ସୁପ୍ରିମକୋର୍ଟ ଗଲେ ଶାମିଙ୍କ ପତ୍ନୀ, ୪ ଲକ୍ଷ ନୁହେଁ...ଭରଣପୋଷଣ ପାଇଁ ଦାବି କଲେ ୧୦ ଲକ୍ଷ

କେବଳ ବୁଲା କୁକୁର ନୁହନ୍ତି, ଜାତୀୟ ରାଜପଥରୁ ଗାଈଗୋରୁଙ୍କୁ ମଧ୍ୟ ହଟାଇବାକୁ ସୁପ୍ରିମକୋର୍ଟ କହିଛନ୍ତି। ଜାନୁଆରୀ ୧୩ରେ ଏବେ ମାମଲାର ପରବର୍ତ୍ତୀ ଶୁଣାଣି ହେବ ।

ବୁଲା କୁକୁର(Stray Dogs)ଙ୍କ ଉତ୍ପାତ୍ତ ବଢ଼ି ଚାଲିଥିବା ବିଭିନ୍ନ ଗଣମାଧ୍ୟମରେ ଖବର ପ୍ରକାଶ ପାଇବା ପରେ ସୁପ୍ରିମକୋର୍ଟ ଜୁଲାଇ ୨୮ରେ ଏହାର ବିଚାର ନିଜ ଆଡ଼ୁ କରିଥିଲେ। ଏବେ ସେହି ମାମଲା ଅଧୀନରେ ସର୍ବୋଚ୍ଚ ଅଦାଲତ ଏପରି ନିର୍ଦ୍ଦେଶ ଦେଇଛନ୍ତି।