SC Ruling on Temple Property Tamil Nadu / 'ମନ୍ଦିର ସମ୍ପତ୍ତି ଭଗବାନଙ୍କର, ସରକାର ଏହାର ମାଲିକ ହୋଇପାରିବେ ନାହିଁ'

ମନ୍ଦିର ସମ୍ପତ୍ତି ମାଲିକାନା, ସୁରକ୍ଷା ଏବଂ ସରକାରୀ ନିୟନ୍ତ୍ରଣ ସମ୍ପର୍କରେ ସୁପ୍ରିମକୋର୍ଟ ଏକ ଗୁରୁତ୍ୱପୂର୍ଣ୍ଣ ରାୟ ଦେଇଛନ୍ତି। ତାମିଲନାଡୁର ଏକ ମନ୍ଦିର ସହ ଜଡ଼ିତ ମାମଲାର ଶୁଣାଣି କରି କୋର୍ଟ କହିଛନ୍ତି ଯେ ମନ୍ଦିର ସମ୍ପତ୍ତି ହେଉଛି ଭଗବାନଙ୍କ ସମ୍ପତ୍ତି। ଏହାକୁ ସରକାରୀ ସମ୍ପତ୍ତି ଭାବରେ ବିବେଚନା କରାଯାଇ ପାରିବ ନାହିଁ। ସୁପ୍ରିମକୋର୍ଟ ଖଣ୍ଡପୀଠ କହିଛନ୍ତି ଯେ ଦାନ ମାଧ୍ୟମରେ ଦେବତାଙ୍କୁ ଉତ୍ସର୍ଗୀକୃତ ସମ୍ପତ୍ତି ଦାତା, ପୁରୋହିତ, ମନ୍ଦିର ଟ୍ରଷ୍ଟ କିମ୍ବା ରାଜ୍ୟର ନୁହେଁ। ବରଂ ଏହା ଭାଗବାନଙ୍କ ହୋଇଯାଏ। କୋର୍ଟ ସ୍ପଷ୍ଟ କରିଛନ୍ତି ଯେ ମନ୍ଦିର ସମ୍ପତ୍ତି ପରିଚାଳନା ଏବଂ ନିୟନ୍ତ୍ରଣରେ ସରକାରଙ୍କ ଭୂମିକା ଏହାକୁ ସେହି ସମ୍ପତ୍ତିର ମାଲିକ କରେ ନାହିଁ। କୋର୍ଟ ତାମିଲନାଡୁର ଏହି ମନ୍ଦିର ଜମିକୁ ରାଜ୍ୟ ସରକାରଙ୍କୁ ଉପହାର ଦେବା ଦାନପତ୍ରକୁ ମଧ୍ୟ ଅବୈଧ ଘୋଷଣା କରିଛନ୍ତି।

ତାମିଲନାଡୁ ମାମଲାରେ ବିଚାରପତି ପି.ଏସ୍. ନରସିଂହ ଏବଂ ଆଲୋକ ଆରାଧେଙ୍କୁ ନେଇ ଗଠିତ ଖଣ୍ଡପୀଠ ଏହି ରାୟ ଶୁଣାଇଛନ୍ତି। ରାୟରେ ମନ୍ଦିର ସମ୍ପତ୍ତିର ଆଇନଗତ ସ୍ଥିତି, ଟ୍ରଷ୍ଟିଙ୍କ ଦାୟିତ୍ୱ ଏବଂ ସରକାରଙ୍କ ଭୂମିକା ସହିତ ଜଡି଼ତ ଗୁରୁତ୍ୱପୂର୍ଣ୍ଣ ଦିଗକୁ ବିଚାର କରାଯାଇଛି। ରାୟରେ ସୁପ୍ରିମକୋର୍ଟ କହିଛନ୍ତି ଯେ ଦାନ କରାଯାଇଥିବା ସମ୍ପତ୍ତି ଦାତା, ପୁରୋହିତ, ଟ୍ରଷ୍ଟି କିମ୍ବା ରାଜ୍ୟର ନୁହେଁ ବରଂ ଏହା ହେଉଛି ଭଗବାନଙ୍କ ସମ୍ପତ୍ତି। ଯେଉଁମାନେ ଏପରି ସମ୍ପତ୍ତି ପରିଚାଳନା କରନ୍ତି ସେମାନଙ୍କର ଦାୟିତ୍ୱ ହେଉଛି ଭଗବାନଙ୍କ ହିତରେ ଏହାକୁ ସୁରକ୍ଷିତ କରିବା। ମନ୍ଦିର ସମ୍ପତ୍ତି ପରିଚାଳନା ସେମାନଙ୍କୁ ଏହାର ମାଲିକ ହେବାର ଅଧିକାର ଦିଏ ନାହିଁ। ଟ୍ରଷ୍ଟିଙ୍କୁ ମନ୍ଦିର ଏବଂ ଏହାର ସମ୍ବନ୍ଧିତ ଧାର୍ମିକ ଉଦ୍ଦେଶ୍ୟ ପାଇଁ ସମ୍ପତ୍ତି ବ୍ୟବହାର କରିବାକୁ ପଡି଼ବ। ସେମାନେ ନିଜ ପଦବୀ ଯୋଗୁଁ ଅନ୍ୟ କୌଣସି ବ୍ୟକ୍ତି କିମ୍ବା ସରକାରଙ୍କୁ ମନଇଚ୍ଛା ଭାବରେ ମନ୍ଦିର ସମ୍ପତ୍ତି ହସ୍ତାନ୍ତର କରିପାରିବେ ନାହିଁ।

ସରକାର ହେଉଛନ୍ତି ସଂରକ୍ଷକ; ମାଲିକ ନୁହେଁ
ସୁପ୍ରିମକୋର୍ଟ ସ୍ପଷ୍ଟ କରିଛନ୍ତି ଯେ ମନ୍ଦିର ସମ୍ପତ୍ତି ପରିଚାଳନା ଏବଂ ନିୟନ୍ତ୍ରଣ କରିବାର ଦାୟିତ୍ୱ ସରକାରଙ୍କୁ ଏହାର ମାଲିକ କରେ ନାହିଁ। ସରକାରଙ୍କ କର୍ତ୍ତବ୍ୟ ହେଉଛି ଏପରି ସମ୍ପତ୍ତିକୁ ସୁରକ୍ଷା ଦେବା। ଏହା କେବଳ ପ୍ରଶାସନିକ କ୍ଷମତା ଆଧାରରେ ମନ୍ଦିର ଜମିକୁ ନିଜର ବୋଲି ଦାବି କରି ମନଇଚ୍ଛା ହସ୍ତାନ୍ତର କରିପାରିବ ନାହିଁ। କୋର୍ଟ ଏହା ମଧ୍ୟ ସ୍ପଷ୍ଟ କରିଛନ୍ତି ଯେ ଆଇନ ବିରୋଧି କରାଯାଇଥିବା ହସ୍ତାନ୍ତରକୁ ସାର୍ବଜନୀନ ଉଦ୍ଦେଶ୍ୟ ଦର୍ଶାଇ ବୈଧ କରାଯାଇପାରିବ ନାହିଁ। ସରକାରୀ କାର୍ଯ୍ୟାଳୟ ନିର୍ମାଣର ଆବଶ୍ୟକତା ନିଜେ ମନ୍ଦିର ସମ୍ପତ୍ତିକୁ ମାଗଣାରେ ହସ୍ତାନ୍ତର କରିବା ପାଇଁ ଏକ ଆଇନଗତ ଆଧାର ଗଠନ କରେ ନାହିଁ।

ଏହା ସହ ପଢନ୍ତୁ:  ଗଣେଶ ପୂଜା ବେଳେ ମୂର୍ତ୍ତିକୁ ନେଇ ତେଜିଲା ବିବାଦ; ଟିଭିକେ ସରକାରଙ୍କୁ ଘେରିଲା ତାମିଲନାଡୁ ବିଜେପି

କ’ଣ ଥିଲା ମାମଲା?
ଏହି ମାମଲାରେ ତାମିଲନାଡୁର ଇରୋଡ ଜିଲ୍ଲାର କୋଡୁମୁଡି ଗ୍ରାମର ନାଗାପଲାୟମ ମାରିଆମ୍ମନ-ପୋନନାଚିଆମ୍ମନ ମନ୍ଦିରର ପ୍ରାୟ ଏକ ଏକର ଦଶ ସେଣ୍ଟ ଇନାମ ଜମି ସାମିଲ ଥିଲା। ଗତ ୨୦୧୭ ଅଗଷ୍ଟରେ ମନ୍ଦିରର ଜଣେ ଅସ୍ଥାୟୀ ଟ୍ରଷ୍ଟି ଏକ ତାଲୁକ କାର୍ଯ୍ୟାଳୟ ନିର୍ମାଣ ପାଇଁ ଏହି ଜମି ରାଜ୍ୟ ସରକାରଙ୍କୁ ଉପହାର ଦେଇଥିଲେ। ରାଜସ୍ୱ ଅଧିକାରୀ ମଧ୍ୟ ହସ୍ତାନ୍ତରକୁ ଗ୍ରହଣ କରି ଜମି ହସ୍ତାନ୍ତର କରିଥିଲେ। ଏହି ହସ୍ତାନ୍ତରକୁ କୋର୍ଟରେ ଚ୍ୟାଲେଞ୍ଜ କରାଯାଇଥିଲା। ମାଡ୍ରାସ ହାଇକୋର୍ଟ ୨୦୧୯ ମାର୍ଚ୍ଚରେ ଆବେଦନକୁ ଖାରଜ କରିଦେଇଥିଲେ। ଏହା ପରେ ମାମଲା ସୁପ୍ରିମକୋର୍ଟରେ ପହଞ୍ଚିଥିଲା।

ସରକାରୀ କାର୍ଯ୍ୟାଳୟରେ ହଟିବ ନାହିଁ, କିନ୍ତୁ ଭଡା ଦେବାକୁ ପଡିବ।
ଉପହାର ପତ୍ର (Gift Deed) ବାତିଲ କରିବା ସତ୍ତ୍ୱେ, ସୁପ୍ରିମକୋର୍ଟ ଜମିରେ ପୂର୍ବରୁ ଥିବା ତାଲୁକ କାର୍ଯ୍ୟାଳୟକୁ ଭାଙ୍ଗିବା ପାଇଁ ନିର୍ଦ୍ଦେଶ ଦେଇ ନଥିଲେ। କୋର୍ଟ ରାଜ୍ୟ ସରକାରଙ୍କୁ ଲିଜ୍ ଆଧାରରେ ଜମି ଦଖଲ ଜାରି ରଖିବାକୁ ଅନୁମତି ଦେଇଥିଲେ, ହେଲେ ଭଡା ସ୍ଥିର କରିଥିଲେ। ଖଣ୍ଡପୀଠ ମନ୍ଦିରକୁ ମାସିକ ୩୧,୦୦୦ ଟଙ୍କା ଭଡା ଦେବାକୁ ନିର୍ଦ୍ଦେଶ ଦେଇଥିଲେ। ଯାହା ୨୦୧୯ ମାର୍ଚ୍ଚ ୮ ତାରିଖରୁ ଲାଗୁ ହେବ। ରାଜ୍ୟ ସରକାର ମନ୍ଦିରକୁ ୧ ଲକ୍ଷ ଟଙ୍କାର କ୍ଷତିପୂରଣ ଦେବାକୁ ମଧ୍ୟ ନିର୍ଦ୍ଦେଶ ଦେଇଥିଲେ। ଏହା ସହିତ ପ୍ରତି ୩ ବର୍ଷରେ ଭଡ଼ା ପରିମାଣ ସମୀକ୍ଷା କରାଯିବ।