ଉତ୍ତରପ୍ରଦେଶ ମୈନପୁରୀ ଅଞ୍ଚଳରୁ ଏକ ଚମକେଇବା ପରି ଘଟଣା ସାମ୍ନାକୁ ଆସିଛି । ରାତାରାତି କୋଟିପତି ହୋଇଛନ୍ତି ମହିଳା । ତାଙ୍କ ବ୍ୟାଙ୍କ ଖାତାକୁ ଅଚାନକ କୋଟି କୋଟି ଟଙ୍କା ଆସିଛି । ଯେଉଁ ଖାତାରେ ପୂର୍ବରୁ ୪୫ ହଜାର ଟଙ୍କା ଥିଲା, ଏବେ ସେହି ଆକାଉଣ୍ଟରେ ୯ କୋଟି ୯୯ ଲକ୍ଷ ୪୯ ହଜାର ୫୮୬ ଟଙ୍କା ଅଛି । ଏତେ ଗୁଡ଼ିଏ ଟଙ୍କା ଆକାଉଣ୍ଟରେ ଦେଖିବା ପରେ ପୁରା ପରିବାରର ହୋସ୍ ଉଡ଼ିଯାଇଛି । ହେଲେ ମହିଳାଙ୍କ ପ୍ରତିକ୍ରିୟା ସମସ୍ତଙ୍କୁ ଆଶ୍ଚର୍ଯ୍ୟ କରିଛି । ସିଧା ସିଧା ଟଙ୍କା ନେବେ ନାହିଁ ବୋଲି ମହିଳା ଜଣକ କହିଛନ୍ତି ।

ଉତ୍ତରପ୍ରଦେଶ ବିଛବା ଥାନା ଅଞ୍ଚଳର ଦେବଗଞ୍ଜ ଗାଁରେ ଏହା ଘଟିଛି । ମହିଳା ଜଣକ ବ୍ୟାଙ୍କ ଆକାଉଣ୍ଟ ବ୍ୟାଙ୍କ ଅଫ୍ ଇଣ୍ଡିଆ ସୁନତାନଗଞ୍ଜ ଶାଖାରେ ଅଛି । ହେଲେ ହଠାତ ଏହି ଘଟଣାଟି ଚର୍ଚ୍ଚାକୁ ଆସିଥିଲା, ଯେତେବେଳେ ମହିଳାଙ୍କ ଆକାଉଣ୍ଟକୁ ପ୍ରାୟ ୧୦ କୋଟି ଟଙ୍କା କ୍ରେଡିଟ୍ ହୋଇଥିବା ତାଙ୍କ ମୋବାଇଲ ନମ୍ବରକୁ ମେସେଜ ଆସିଥିଲା । ମହିଳାଙ୍କ ଖାତାରେ ପୂର୍ବରୁ ମାତ୍ର ୪୫ ହଜାର ଟଙ୍କା ଥିଲା । ଯେତେବେଳେ ମୋବାଇଲରେ ମେସେଜ ଦେଖି ମହିଳାଙ୍କ ପୁଅ ଏଟିଏମରେ ବାଲାନ୍ସ ଯାଞ୍ଚ କରିଥିଲେ, ସେତେବେଳେ ସ୍କ୍ରିନରେ ୯,୯୯,୪୯,୫୮୬ ବା ପ୍ରାୟ ୧୦ କୋଟି ଟଙ୍କା ଦେଖାଇଥିଲା ।

• ସଚ୍ଚୋଟତାର ପରିଚୟ ଦେଲେ ମହିଳା

ମଣିଷ ଅନେକ ସମୟରେ ଲୋଭର ବଶବର୍ତ୍ତୀ ହୋଇଥାଏ । ଟଙ୍କା, ଧନରତ୍ନ ପାଇଁ ମାନବିକତା ହରାଇଥାଏ । ହେଲେ ମହିଳା ଜଣକ ନିଜ ବ୍ୟାଙ୍କ ଖାତାରେ ଲକ୍ଷ ଲକ୍ଷ ଟଙ୍କା ଦେଖି ଲୋଭାନ୍ଵିତ ହୋଇନଥିଲେ, ବରଂ ସେ ସଚ୍ଚୋଟତା ଦେଖାଇଥିଲେ । ମହିଳା ଜଣକ ସ୍ପଷ୍ଟ ଭାବରେ କହିଥିଲେ ଯେ ତାଙ୍କୁ ଆଉ କାହାର ଟଙ୍କା ଦରକାର ନାହିଁ, ଯାହାର ଟଙ୍କା ସେ ନେଇଯାଆନ୍ତୁ । ସେ ସମ୍ପୂର୍ଣ୍ଣ ଟଙ୍କା ଫେରାଇବାକୁ ପ୍ରସ୍ତୁତ । ସେ ସଚ୍ଚୋଟତାର ପରିଚୟ ଦେଇ ନିଜ ବ୍ୟାଙ୍କ ଖାତାରୁ ଗୋଟିଏ ବି ଟଙ୍କା ଉଠାଇବାକୁ ଉଦ୍ୟମ କରିନଥିଲେ ।

ପଢନ୍ତୁ ଏହି ଖବର: ସାଇବର ଠକେଇର ଶିକାର ହେଲେ ବମ୍ବେ ହାଇକୋର୍ଟ ଜଜ୍; ଲୁଟିନେଲେ ଲକ୍ଷ ଲକ୍ଷ ଟଙ୍କା

• ପ୍ରକୃତ କଥା ଜାଣିଲେ ଉଡିବ ହୋସ୍

ଯେତେବେଳେ ଏହି ଘଟଣା ବ୍ୟାଙ୍କ ଅଫ ଇଣ୍ଡିଆ ସୁଲତାନଗଞ୍ଜ ଶାଖାର ମ୍ୟାନେଜରଙ୍କ ନିକଟରେ ପହଞ୍ଚିଥିଲା, ସେତେବେଳେ ସେ ମହିଳାଙ୍କ ଆକାଉଣ୍ଟକୁ ଯାଞ୍ଚ କରିଥିଲେ । ଏହି ପୂରା ଘଟଣା ଯାନ୍ତ୍ରିକ ତ୍ରୁଟି ଯୋଗୁଁ ହୋଇଛି ବୋଲି ସେ ସ୍ପଷ୍ଟ କରିଥିଲେ । ସିଷ୍ଟମରେ କୌଣସି ତ୍ରୁଟି ଯୋଗୁଁ ମହିଳାଙ୍କ ଆକାଉଣ୍ଟରେ ଏପରି ଦେଖାଉଥିବା ସେ କହିଛନ୍ତି । ଯଦି ମହିଳା ଜଣକ ବ୍ୟାଙ୍କ ଆସୁଛନ୍ତି, ତେବେ ଏହି ସମସ୍ୟାର ସମାଧାନ କରାଯିବ । ତେବେ ବ୍ୟାଙ୍କ ମ୍ୟାନେଜରଙ୍କ ଖୁଲାସା ପରେ ଲୋକେ ବ୍ୟାଙ୍କିଂ ସିଷ୍ଟମକୁ ନେଇ ପ୍ରଶ୍ନ ଉଠାଇଛନ୍ତି ।