ଭାରତୀୟ ରେଳବାଇର ପ୍ରିମିୟମ ଟ୍ରେନ ବନ୍ଦେ ଭାରତ ଏକ୍ସପ୍ରେସରେ ଖାଦ୍ୟର ଗୁଣବତ୍ତାକୁ ନେଇ ଉଠିଲା ପ୍ରଶ୍ନ । ପାଟନା-ଟାଟାନଗର ବନ୍ଦେ ଭାରତରେ ନିମ୍ନମାନର ଦହି ଯାତ୍ରୀଙ୍କୁ ପରିବେଷଣ କରିବା ଅଭିଯୋଗ ହୋଇଛି । ରେଳବାଇ ନିଜ କମ୍ପାନୀ IRCTC ଉପରେ ୧୦ ଲକ୍ଷ ଟଙ୍କା ଏବଂ କ୍ୟାଟରିଂ ଠିକାଦାରଙ୍କ ଉପରେ ୫୦ ଲକ୍ଷ ଟଙ୍କା ଜରିମାନା ଲଗାଇଛି । ଏହା ବ୍ୟତୀତ, ଦେଶର ପ୍ରମୁଖ ଦୁଗ୍ଧ କମ୍ପାନୀ ଅମୁଲକୁ ମଧ୍ୟ ଏହି ଅବହେଳା ପାଇଁ ଦାୟୀ କରାଯାଇଛି ।

ଆଇଆରସିଟିସି ଅମୁଲକୁ ଦହିର ଗୁଣବତ୍ତାକୁ ନେଇ ଏକ ନୋଟିସ ପଠାଇଛି । ଜଣେ ଯାତ୍ରୀ ଟ୍ରେନରେ ପରିବେଷଣ କରାଯାଉଥିବା ଅମୁଲ ଦହିର ଗୁଣବତ୍ତା ବିଷୟରେ ଅଭିଯୋଗ କରିଥିଲେ । ଏହି ଅଭିଯୋଗ ମାର୍ଚ୍ଚ ୧୫ ତାରିଖରେ ଦାଖଲ କରାଯାଇଥିଲା । ଆଇଆରସିଟିସି ଏହି ମାମଲାକୁ ଗମ୍ଭୀରତାର ସହ ନେଇ ଅମୁଲଠାରୁ ଜବାବ ମାଗିଛି ।

• କ୍ୟାଟରିଂ ଠିକାଦାରଙ୍କ ଲାଇସେନ୍ସ ବାତିଲ

ଏହି ଅଭିଯୋଗ ଆଧାରରେ IRCTC ଟ୍ରେନର ଲାଇସେନ୍ସପ୍ରାପ୍ତ କ୍ୟାଟରିଂ ଠିକାଦାରଙ୍କ ଉପରେ ଏକ ବଡ଼ ଜରିମାନା ଲଗାଇଛି । ଲାଇସେନ୍ସଧାରୀଙ୍କ ଚୁକ୍ତିନାମା ବାତିଲ କରିବାର ପ୍ରକ୍ରିୟା ଆରମ୍ଭ ହୋଇଛି । ଲାଇସେନ୍ସଧାରୀଙ୍କୁ କଳା ତାଲିକାଭୁକ୍ତ ବା ବ୍ଲାକଲିଷ୍ଟ କରିବା ପାଇଁ ମଧ୍ୟ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି ।

ପଢନ୍ତୁ ଏହି ଖବର: ସାରା ବିଶ୍ଵରେ ଦେଖାଦେଇଛି ଶକ୍ତି ସଙ୍କଟ; ପୁଣି କୋଭିଡ ପରି ଲାଗିବ କି ଲକଡାଉନ୍ ?

• IRCTC ଉପରେ ଜରିମାନା

ଏବେ IRCTC ସ୍ପଷ୍ଟୀକରଣ ପାଇଁ ଅମୁଲକୁ ସମନ କରିଛି । ଭାରତୀୟ ରେଳବାଇ ଏହି ମାମଲାରେ ପୂର୍ବରୁ ଗୁରୁତ୍ୱପୂର୍ଣ୍ଣ କାର୍ଯ୍ୟାନୁଷ୍ଠାନ ଗ୍ରହଣ କରି ନିଜ କମ୍ପାନୀ ଆଇଆରସିଟିସି ଉପରେ ୧୦ ଲକ୍ଷ ଟଙ୍କା ଜରିମାନା ଲଗାଇଛି । ରେଳବାଇ ଯାତ୍ରୀ ସୁରକ୍ଷାକୁ ଦୃଷ୍ଟିରେ ରଖି ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଛି ।

ରେଳବାଇ ସ୍ପଷ୍ଟ କରିଛି ଯେ ଯାତ୍ରୀମାନଙ୍କୁ ନିରାପଦ ଏବଂ ଗୁଣାତ୍ମକ ଖାଦ୍ୟ ଯୋଗାଇବା ଏହାର ପ୍ରାଥମିକତା । ଏଣୁ ରେଳବାଇ ଏପରି ଅବହେଳାକୁ ଏବେ କି ଭବିଷ୍ୟତରେ ଆଦୌ ବରଦାସ୍ତ କରିବ ନାହିଁ । ଏହି ଘଟଣା ପରେ, ରେଳବାଇ ଏବଂ ଆଇଆରସିଟିସି ସୂଚିତ କରିଛନ୍ତି ଯେ ସେମାନେ ଟ୍ରେନରେ ପରିବେଷଣ କରାଯାଉଥିବା ଖାଦ୍ୟର ଗୁଣବତ୍ତା ଉପରେ ନଜର ଏବଂ ନିୟନ୍ତ୍ରଣ କଡ଼ାକଡ଼ି କରିବେ । ଅଧିକାରୀମାନେ କହିଛନ୍ତି ଯେ ଯାତ୍ରୀଙ୍କ ଅଭିଯୋଗକୁ ଗମ୍ଭୀରତାର ସହ ନିଆଯିବ ଏବଂ ଦୋଷୀ ସାବ୍ୟସ୍ତ ହୋଇଥିବା ଲୋକଙ୍କ ବିରୁଦ୍ଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ।