ତାମିଲନାଡୁ ମୁଖ୍ୟମନ୍ତ୍ରୀ ଭାବରେ ଶପଥ ନେଲେ ଥଲାପତି ବିଜୟ । ଚେନ୍ନାଇର ଜବାହରଲାଲ ନେହେରୁ ଷ୍ଟାଡିୟମରେ ଆୟୋଜିତ ଶପଥ ଗ୍ରହଣ ଉତ୍ସବରେ ବିଜୟଙ୍କୁ ତାମିଲନାଡ଼ୁ ରାଜ୍ୟପାଳ ରାଜେନ୍ଦ୍ର ବିଶ୍ବନାଥ ଆର୍ଲେକର ପଦ ଓ ଗୋପନୀୟତାର ଶପଥ ଗ୍ରହଣ କରାଇଛନ୍ତି । ବିଜୟ ଶପଥ ନେବା ସହିତ ତାମିଲନାଡୁବାସୀଙ୍କୁ ପ୍ରଥମ ଥର ପାଇଁ ଜଣେ ଅଣଦ୍ରାବିଡ଼ ମୁଖ୍ୟମନ୍ତ୍ରୀ ମିଳିଛି ।

କେବଳ ବିଜୟ ନୁହଁନ୍ତି ତାଙ୍କ ସହିତ ତାଙ୍କର କ୍ୟାବିନେଟରେ ସ୍ଥାନ ପାଇଥିବା ୯ ଜଣ ବିଧାୟକ ମଧ୍ୟ ମନ୍ତ୍ରୀ ଭାବେ ଶପଥ ଗ୍ରହଣ କରିଛନ୍ତି । ମନ୍ତ୍ରୀ ଭାବେ ଏନ୍. ଆନନ୍ଦ, TVK ମହାସଚିବ କେ.ଜି ଅରୁଣରାଜ, କେ.ଏ ସେଙ୍ଗୋଟେୟନ, ଭେଙ୍କଟରମଣନ, ନିର୍ମାଲକୁମାର, ରାଜମୋହନ, ଟିକେ ପ୍ରଭୁ ଓ ସେଲ୍‌ଭି ଏସ୍. କୀର୍ତ୍ତନ ମନ୍ତ୍ରୀ ଭାବେ ଶପଥ ନେଇଛନ୍ତି । ଶପଥ ଗ୍ରହଣ ଉତ୍ସବରେ କଂଗ୍ରେସ ସାଂସଦ ରାହୁଲ ଗାନ୍ଧୀ ଏବଂ ଦଳର ୫ଜଣ ବିଧାୟକ ମଧ୍ୟ ସାମିଲ ହୋଇଥିଲେ ।

#WATCH | Chennai: Tamil Nadu Governor Rajendra Vishwanath Arlekar administered the oath of office to Tamilaga Vettri Kazhagam (TVK) Chief C Joseph Vijay as the Tamil Nadu Chief Minister, at the Jawaharlal Nehru Stadium in Chennai. pic.twitter.com/ZWqm6tu8xH

— ANI (@ANI) May 10, 2026

ସୂଚନା ଅନୁସାରେ, ତାମିଲନାଡୁରେ ଦୀର୍ଘ ୬ ଦଶନ୍ଧି ଧରି ଚାଲିଆସିଥିବା ଦୁଇ ଦ୍ରାବିଡ଼ ଦଳଙ୍କ ପତିଆରାରେ ପୂର୍ଣ୍ଣଛେଦ ଟାଣି ମାତ୍ର ୨ ବର୍ଷ ତଳେ ସୁପରଷ୍ଟାର ବିଜୟ ଗଢ଼ିଥିବା ନୂଆ ରାଜନୈତିକ ଦଳ TVKକୁ ସମର୍ଥନ ଅଜାଡ଼ି ଦେଇଥିଲେ ଭୋଟର । ସୋମବାର ପ୍ରକାଶ ପାଇଥିବା ବିଧାନସଭା ନିର୍ବାଚନ ଫଳାଫଳ ସାରାଦେଶର ରାଜନୈତିକ ପଣ୍ଡିତମାନଙ୍କୁ ଚକିତ କରିଦେଇଥିଲା । ବିଜୟ ଦୁଇଟି ଆସନରୁ ଜିତିଥିବାବେଳେ ମୋଟ୍ ୧୦୮ଟି ଆସନ ପାଇଥିଲା ତାମିଲଗା ଭେକଟ୍ରି କଝଗମ୍ ଅର୍ଥାତ TVK ପାର୍ଟି । ଥାଲାପତି ବିଜୟ ଏହାର ବିଧାୟକ ଦଳ ନେତା ନିର୍ବାଚିତ ହୋଇଥିବାବେଳେ ମୁଖ୍ୟମନ୍ତ୍ରୀ ଭାବେ ଶପଥ ନେବାକୁ ଆବଶ୍ୟକ ହେଉଥିଲା ଆଉ ୧୧ ବିଧାୟକଙ୍କ ସମର୍ଥନ । ୫ ଦିନର କସରତ ପରେ ଏହି ଅଭାବ ଦୂର ହେବା ସହ ୨ଜଣ ଅତିରିକ୍ତ ବିଧାୟକଙ୍କ ସମର୍ଥନ ଯୋଗାଡ଼ରେ ସଫଳ ହୋଇଛି TVK । ଏଥିସହ ଶେଷରେ ତାମିଲନାଡୁରେ ବିଜୟଙ୍କ ସରକାର ହେବାକୁ ଯାଉଛି । ୧୩ ତାରିଖ ଅର୍ଥାତ ଆସନ୍ତା ବୁଧବାର ସୁଦ୍ଧା ବିଜୟଙ୍କୁ ବିଧାନସଭାରେ ସଂଖ୍ୟାଗରିଷ୍ଠତାର ପ୍ରମାଣ ଦେବାକୁ ପଡ଼ିବ ।