ଆଜି ତାମିଲନାଡୁରେ ହେବ 'ବିଜୟ' ତିଲକ । ସୁପରହିଟ୍ ସିନେମା ପରି ୫ ଦିନର ଅପେକ୍ଷା, ରାଜ୍ୟପାଳଙ୍କ ସହ ୪ ଥର ସାକ୍ଷାତ ଓ ସମର୍ଥନ ଯୋଗାଡ଼ ପାଇଁ ଜୋରଦାର କସରତ ଭିତରେ, ୧୧୮ର ମ୍ୟାଜିକ ନମ୍ବର ଛୁଇଁବାରେ ସଫଳ ହୋଇଛନ୍ତି TVK ସଭାପତି । କଂଗ୍ରେସ ସହ ଦୁଇ ବାମଦଳ, VCK ଏବଂ IUMLର ସମର୍ଥନ ମିଳିବା ପରେ ୧୨୦ରେ ପହଞ୍ଚିଛି ବିଧାୟକଙ୍କ ସଂଖ୍ୟା । ରାଜ ଭବନରୁ ମିଲିସାରିଛି ଫର୍ମାନ୍ । ଆଜି ମୁଖ୍ୟମନ୍ତ୍ରୀ ଭାବେ ଶପଥ ନେବା ପରେ ଆଗାମୀ ୧୩ ତାରିଖ ଅର୍ଥାତ ବୁଧବାର ସୁଦ୍ଧା ବିଜୟଙ୍କୁ ଫ୍ଲୋର ଟେଷ୍ଟ ଦେବାକୁ ପଡ଼ିବ ।

ତାମିଲନାଡୁରେ 'ବିଜୟ' ଥ୍ରୀଲର ଏହାର କ୍ଲାଇମାକ୍ସ ଆଡକୁ ଗତି କରୁଛି । କାରଣ ଶେଷରେ ମୁଖ୍ୟମନ୍ତ୍ରୀ ଆସନରେ ବସିବାକୁ ଯାଉଛନ୍ତି ଥାଲାପତି ବିଜୟ । ୫ ଦିନର ଅପେକ୍ଷା, ରାଜ୍ୟପାଳଙ୍କ ସହ ୪ଥର ସାକ୍ଷାତ ଓ ସମର୍ଥନ ଯୋଗାଡ଼ ପାଇଁ ଜୋରଦାର କସରତ ଭିତରେ ୧୧୮ର ମ୍ୟାଜିକ ନମ୍ବର ଛୁଇଁବାରେ ସଫଳ ହୋଇଛନ୍ତି TVK ସଭାପତି ।

ଅଧିକ ପଢ଼ନ୍ତୁ: ତାମିଲନାଡ଼ୁରେ TVK ସରକାର ଗଠନ ପାଇଁ ମିଳିଲା ଅନୁମତି, କାଲି ଶପଥ ନେବେ ବିଜୟ

ଶନିବାର ରାଜ୍ୟପାଳ ଆରଭି ଆର୍ଲେକରଙ୍କୁ ବିଜୟ ପୁଣିଥରେ ସାକ୍ଷାତ କରିବା ପରେ, ସରକାର ଗଠନ ପାଇଁ ମିଳିଛି ଗ୍ରୀନ୍ ସିଗନାଲ୍ । କାରଣ ମୁଖ୍ୟମନ୍ତ୍ରୀ ଭାବେ ଶପଥ ନେବାକୁ ଆବଶ୍ୟକ ସଂଖ୍ୟା ଯୋଗାଡ଼ କରିସାରିଛନ୍ତି TVK ମୁଖ୍ୟ । ଆଜି ଚେନ୍ନାଇର ନେହେରୁ ଷ୍ଟାଡିୟମରେ ହେବ ବିଜୟ ତିଲକ ।  ରାଜ୍ୟପାଳଙ୍କୁ ଭେଟିବା ସମୟରେ କଂଗ୍ରେସର ୫, ଦୁଇ ବାମଦଳ ସିପିଆଇ ଓ ସିପିଏମର ଦୁଇଟି ଲେଖାଏଁ VCK ଏବଂ IUMLର ୨ଜଣ ଲେଖାଏଁ ବିଧାୟକଙ୍କ ସମର୍ଥନ ରହିଥିବା ନେଇ TVK ମୁଖ୍ୟ ଜଣାଇଥିବା ରାଜଭବନ ପକ୍ଷରୁ ଜାରି ପ୍ରେସ ରିଲିଜରେ ସ୍ପଷ୍ଟ କରାଯାଇଛି ।

ତାମିଲନାଡୁରେ ଦୀର୍ଘ ୬ ଦଶନ୍ଧି ଧରି ଚାଲିଆସିଥିବା ଦୁଇ ଦ୍ରାବିଡ଼ ଦଳଙ୍କ ପତିଆରାରେ ପୂର୍ଣ୍ଣଛେଦ ଟାଣି ମାତ୍ର ୨ ବର୍ଷ ତଳେ ସୁପରଷ୍ଟାର ବିଜୟ ଗଢ଼ିଥିବା ନୂଆ ରାଜନୈତିକ ଦଳ TVKକୁ ସମର୍ଥନ ଅଜାଡ଼ି ଦେଇଥିଲେ ଭୋଟର । ସୋମବାର ପ୍ରକାଶ ପାଇଥିବା ବିଧାନସଭା ନିର୍ବାଚନ ଫଳାଫଳ ସାରାଦେଶର ରାଜନୈତିକ ପଣ୍ଡିତମାନଙ୍କୁ ଚକିତ କରିଦେଇଥିଲା । ବିଜୟ ଦୁଇଟି ଆସନରୁ ଜିତିଥିବାବେଳେ ମୋଟ୍ ୧୦୮ଟି ଆସନ ପାଇଥିଲା ତାମିଲଗା ଭେକଟ୍ରି କଝଗମ୍ ଅର୍ଥାତ TVK ପାର୍ଟି । ଥାଲାପତି ବିଜୟ ଏହାର ବିଧାୟକ ଦଳ ନେତା ନିର୍ବାଚିତ ହୋଇଥିବାବେଳେ ମୁଖ୍ୟମନ୍ତ୍ରୀ ଭାବେ ଶପଥ ନେବାକୁ ଆବଶ୍ୟକ ହେଉଥିଲା ଆଉ ୧୧ ବିଧାୟକଙ୍କ ସମର୍ଥନ । ୫ ଦିନର କସରତ ପରେ ଏହି ଅଭାବ ଦୂର ହେବା ସହ ୨ଜଣ ଅତିରିକ୍ତ ବିଧାୟକଙ୍କ ସମର୍ଥନ ଯୋଗାଡ଼ରେ ସଫଳ ହୋଇଛି TVK । ଏଥିସହ ଶେଷରେ ତାମିଲନାଡୁରେ ବିଜୟଙ୍କ ସରକାର ହେବାକୁ ଯାଉଛି । ୧୩ ତାରିଖ ଅର୍ଥାତ ଆସନ୍ତା ବୁଧବାର ସୁଦ୍ଧା ବିଜୟଙ୍କୁ ବିଧାନସଭାରେ ସଂଖ୍ୟାଗରିଷ୍ଠତାର ପ୍ରମାଣ ଦେବାକୁ ପଡ଼ିବ ।