Viral Story / ଶବଦାହ ପାଇଁ ଚାଲିଥିଲା ପ୍ରସ୍ତୁତି; ଶେଷ ମୁହୂର୍ତ୍ତରେ ଜଣାପଡ଼ିଲା ଝିଅ ମୃତ ନୁହେଁ ଜୀବିତ

ପାଟନା: ଆଉ କିଛି ସମୟ ପରେ ଝିଅର ହୋଇଥାନ୍ତା ଶବଦାହ । ଅନ୍ତିମ ସଂସ୍କାର ପାଇଁ ସମସ୍ତ ପ୍ରସ୍ତୁତି ବି ସରିଥିଲା । ଅଲିଅଳି ଝିଅକୁ ହରାଇ ମୁଣ୍ଡପିଟି କାନ୍ଦୁଥିଲେ ପିତାମାତା । ସେହି ଦୃଶ୍ୟ ସମସ୍ତଙ୍କ ଛାତି ଫଟାଇ ଦେଉଥିଲା । ହେଲେ ହଠାତ୍ ଘଟିଲା ଚମତ୍କାର । ଶେଷ ମୁହୂର୍ତ୍ତରେ ଜଣାପଡ଼ିଲା ଝିଅ ମୃତ ନୁହେଁ ଜୀବିତ । ବିହାରର ସମସ୍ତିପୁର ଜିଲ୍ଲାରେ ଘଟିଛି ଏପରି ବିରଳ ଘଟଣା, ଯାହାକି ସମସ୍ତଙ୍କୁ ଚକିତ କରିଛି ।

• କଣ ପୂରା ଘଟଣା ?

ବିଦ୍ୟାପତିନଗରର ଗଢିସିସାଇ ପଞ୍ଚାୟତର ଭଜନଗାମା ଗାଁର ବାସିନ୍ଦା ଅନିସା କୁମାରୀ ପ୍ରାୟ ୮ ଦିନ ଧରି ନିଖୋଜ ଥିଲେ । ଅନିସା ଜୁନ ୨୧ ତାରିଖରେ ଔଷଧ କିଣିବା ପାଇଁ ଘରୁ ବାହାରିଥିଲେ, କିନ୍ତୁ ଆଉ ଫେରି ନଥିଲେ । ଏହା ପରେ ତାଙ୍କ ପରିବାର ସନ୍ଦେହ କରିଥିଲେ ଯେ ତାଙ୍କୁ ଜମି ବିବାଦ ଯୋଗୁଁ ଅପହରଣ କରାଯାଇଛି । ପୋଲିସ ଜୁନ ୨୩ ତାରିଖରେ ଏକ ରିପୋର୍ଟ ଦାଖଲ କରିଥିଲା । ବେଗୁସରାଇର ଗରପୁରାରେ ଏକ ପୋଖରୀ କୂଳରେ ଜଣେ ଯୁବତୀଙ୍କ ମୃତଦେହ ଏକ ବସ୍ତାରେ ଭର୍ତ୍ତି ହୋଇଥିବା ଦେଖିବାକୁ ମିଳିଥିଲା । ପରିବାର ଲୋକେ ପୋଲିସ ଉପସ୍ଥିତିରେ ତାଙ୍କ ମୃତଦେହକୁ ଅନିସା ବୋଲି ଚିହ୍ନଟ କରିଥିଲେ।

• ନିଜକୁ ଜୀବିତ କହିଲେ, ଫଟୋ ବି ସେୟାର କଲେ

ସୋମବାର ସକାଳେ (ଜୁନ ୨୯) ମୃତଦେହର ଅନ୍ତିମ ସଂସ୍କାର ପାଇଁ ପ୍ରସ୍ତୁତି ଚାଲିଥିଲା । ଠିକ୍ ଏହି ସମୟରେ ଘଟଣାଟି ଏକ ନୂଆ ମୋଡ଼ ନେଇଥିଲା । ସୋସିଆଲ ମିଡିଆରେ ଭାଇରାଲ ହୋଇଥିବା ଏକ ଭିଡିଓରେ ଅନିସା ନିଜକୁ ଜୀବିତ ବୋଲି ଦାବି କରିଥିଲେ । ସେ ନିଜର ଏକ ଫଟୋ ଏବଂ ଅନ୍ୟ ଏକ ଭିଡିଓ ମଧ୍ୟ ସେୟାର କରିଥିଲେ ଯେଉଁଥିରେ ସେ ନିଜକୁ ସୁରକ୍ଷିତ ବୋଲି ଦାବି କରିଥିଲେ । ଭିଡିଓଟି ଭାଇରାଲ ହେବା ପରେ ଏବେ ଆଲୋଚନାର ବିଷୟ ପାଲଟିଛି ।

ପଢନ୍ତୁ ଏହି ଖବର: ପଥର ଖଣିରେ ବଡ଼ ଅଘଟଣ; କଟିଗଲା ଗୋଡ଼ହାତ, ୭ ଶ୍ରମିକ ମୃତ

• ପ୍ରେମ ବିବାହ ଚାହୁଁଛନ୍ତି ଯୁବତୀ

ଭିଡିଓ ପଠାଇ ଯୁବତୀ ଜଣକ ନିଜକୁ ଜୀବିତ ବୋଲି ଦାବି କରିଥିଲେ ଏବଂ ପ୍ରେମ ବିବାହ କରିବାକୁ ଚାହୁଁଥିବା କରିଥିଲେ । ଭିଡିଓ ସାମ୍ନାକୁ ଆସିବା ପରେ ପୋଲିସ ମଧ୍ୟ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲା । ଷ୍ଟେସନ ହାଉସ୍ ଅଫିସର ସୂରଜ କୁମାର କହିଛନ୍ତି ଯେ ପୋଲିସ ସୂଚନା ପାଇଛି ଏବଂ ଭିଡିଓର ସତ୍ୟତା ଯାଞ୍ଚ କରୁଛି । ଝିଅଟି ଏବେ କେଉଁଠି ଏବଂ ପୂର୍ବରୁ ଉଦ୍ଧାର ହୋଇଥିବା ଯୁବତୀର ମୃତଦେହର ପରିଚୟ ଜାଣିବା ପାଇଁ ଏକ ପୁଙ୍ଖାନୁପୁଙ୍ଖ ତଦନ୍ତ ଚାଲିଛି । ଜଣେ ପୋଲିସ ଅଧିକାରୀ କହିଛନ୍ତି ଯେ ଝିଅଟିର ପୁନରୁଦ୍ଧାର ପୋଲିସ ପାଇଁ ପ୍ରାଥମିକତା । କୋର୍ଟରେ ତାଙ୍କର ବୟାନ ରେକର୍ଡ କରାଯିବ, ଯାହା ପରେ ପ୍ରକୃତ ଘଟଣା କଣ ତାହା ସ୍ପଷ୍ଟ ହେବ ।