Argus News - ମୁଖ୍ୟମନ୍ତ୍ରୀଙ୍କ ବିରୋଧରେ ସୁପ୍ରିମକୋର୍ଟ ଗଲେ ମହିଳା, କହିଲେ 'ମୋ ସମ୍ପତ୍ତି ନେଇଯିବେ'

ନୂଆଦିଲ୍ଲୀ: ମୋ ଜୀବନ ପ୍ରତି ବିପଦ ଅଛି, ମୋ ନିଜ ରାଜ୍ୟ... ନିଜ ଘରକୁ ଯାଇ ପାରୁନି । ମୁଖ୍ୟମନ୍ତ୍ରୀ ମୋତେ ଧମକ ଦେଉଛନ୍ତି । ମୋ ଘର ଉପରେ ପଥର ମାଡ଼ କରାଯାଉଛି । ମୋତେ ସୁରକ୍ଷା ଦିଆଯାଉ । କର୍ଣ୍ଣାଟକ ମୁଖ୍ୟମନ୍ତ୍ରୀ ସିଦ୍ଧରମୈୟାଙ୍କ ବିରୋଧରେ ସୁପ୍ରିମକୋର୍ଟଙ୍କ ଦ୍ଵାରସ୍ଥ ହୋଇ ଏଭଳି ଅଭିଯୋଗ ଆଣିଛନ୍ତି ଜଣେ ମହିଳା ।

ସୁପ୍ରିମକୋର୍ଟ ଶୁକ୍ରବାର ଏ ସମ୍ପର୍କିତ ମାମଲାର ଶୁଣାଣି କରିଛନ୍ତି । ସର୍ବୋଚ୍ଚ ଅଦାଲତ କହିଛନ୍ତି, "ଆପଣଙ୍କ ଲଢ଼େଇ କୋର୍ଟରେ ଲଢ଼ନ୍ତୁ ନାହିଁ । ଏହି ମାମଲା ଉଚ୍ଚ ନ୍ୟାୟାଳୟକୁ ନେଇ ଯାଆନ୍ତୁ ।" ମହିଳା ଜଣଙ୍କ ସୁରକ୍ଷା ଦାବି କରି କହିଛନ୍ତି ଯେ, "ମୋତେ କର୍ଣ୍ଣାଟକ ବାହାରେ ରହିବାକୁ ବାଧ୍ୟ କରାଯାଉଛି ।"

ଏଥିସହ ପଢ଼ନ୍ତୁ: ମହିଳା ଅଧିକାରୀ ଅମିତା ସିଂହ ତୋମରଙ୍କୁ 'ସୁପ୍ରିମ୍' ଝଟ୍‌କା; ଜାମିନ୍ ଆବେଦନ ଅଗ୍ରାହ୍ୟ
ମହିଳାଙ୍କ ଅଭିଯୋଗ

ବାର ଆଣ୍ଡ ବେଞ୍ଚ ଅନୁସାରେ, ମହିଳାଙ୍କ ତରଫରୁ ସୁପ୍ରିମକୋର୍ଟରେ ଲଢୁଥିବା ଓକିଲ କହିଛନ୍ତି- "ମୋ ମହକିଲଙ୍କୁ ଧମକ ଦିଆଯାଉଛି । ସେ କର୍ଣ୍ଣାଟକରେ ପ୍ରବେଶ କରିପାରୁ ନାହାନ୍ତି । ତାଙ୍କ ସୁରକ୍ଷା ସହ ବୁଝାମଣା କରାଯାଉଛି । ଯେଉଁଥିପାଇଁ ସେ ଦିଲ୍ଲୀରେ ରହିବାକୁ ବାଧ୍ୟ ହେଉଛନ୍ତି । ବାରମ୍ବାର ଧମକ ମିଳୁଛି । ସେ କର୍ଣ୍ଣାଟକରେ ଥିବା ନିଜ ଘରେ ରହିବାକୁ ଚାହୁଁଛନ୍ତି, କିନ୍ତୁ ସମ୍ଭବ ହେଉ ନାହିଁ ।"

ମହିଳା ଜଣଙ୍କ ଆହୁରି କହିଛନ୍ତି ଯେ, ମୋ ସମ୍ପତ୍ତି କବ୍‌ଜା କରିବାକୁ ଉଦ୍ୟମ କରାଯାଉଛି । ମୁଁ ଫେରି କର୍ଣ୍ଣାଟକର ନିଜ ଘରେ ରହିବାକୁ ଚାହୁଁଛି । ଏନେଇ ଅଭିଯୋଗ ବି କରିଛି, ମୋ ପକ୍ଷରେ କୋର୍ଟଙ୍କ ନିର୍ଦ୍ଦେଶ ନାମା ରହିଛି । ତଥାପି ମୋତେ ଧମକ ଦିଆଯାଉଛି । ମୋ ଘର ଉପରେ ଢେଲା ଫିଙ୍ଗା ଯାଉଛି । ଗୁଣ୍ଡା ଆସି ଭଙ୍ଗାରୁଜା କରୁଛନ୍ତି । ସେମାନେ ମୋ ସମ୍ପତ୍ତି ଅକ୍ତିଆର୍ କରିବାକୁ ଚାହୁଁଛନ୍ତି ।

ଏଥିସହ ପଢ଼ନ୍ତୁ: ସୁପ୍ରିମକୋର୍ଟଙ୍କ କଡ଼ା ନିର୍ଦ୍ଦେଶ, ସ୍କୁଲରେ ମାଗଣା ସାନିଟାରୀ ପ୍ୟାଡ୍ ବ୍ୟବସ୍ଥା କରାଯାଉ
କ'ଣ କହିଲେ କୋର୍ଟ ?

ସୁପ୍ରିମକୋର୍ଟ ପଚାରିଛନ୍ତି- କ'ଣ କର୍ଣ୍ଣାଟକ ମୁଖ୍ୟମନ୍ତ୍ରୀ ଆପଣଙ୍କ ପଛରେ ଲୋକଙ୍କୁ ଦିଲ୍ଲୀ ପଠାଇଛନ୍ତି ? କୋର୍ଟ କହିଛନ୍ତି, "ଆପଣ ବି ରାଜନେତା, ଆପଣ ଆପଣଙ୍କ ଲଢ଼େଇ କୋର୍ଟରେ ଲଢ଼ନ୍ତୁ ନାହିଁ ।" ଯାହାକୁ ନେଇ ଓକିଲ ଆପତ୍ତି ଉଠାଇ କହିଛନ୍ତି ମୁଁ ରାଜନୈତିକ ବ୍ୟକ୍ତି ନୁହେଁ । ମାମଲା ହାଇକୋର୍ଟରେ ଲଢ଼ିବାକୁ ସୁପ୍ରିମକୋର୍ଟ ପରାମର୍ଶ ଦେଇଛନ୍ତି । ଏଥିପାଇଁ ଓକିଲ ମହିଳାଙ୍କୁ ସୁରକ୍ଷା ଯୋଗାଇ ଦେବାକୁ ଦାବି କରିଛନ୍ତି । ପରବର୍ତ୍ତୀ ଶୁଣାଣିରେ ସୁପ୍ରିମକୋର୍ଟ ସୁରକ୍ଷା ସମ୍ପର୍କିତ ନିଷ୍ପତ୍ତି ନେଇପାରନ୍ତି ।