Xi Jinping India Visit / ୭ ବର୍ଷ ପରେ ଭାରତ ଗସ୍ତରେ ଆସୁଛନ୍ତି ଚୀନ୍ ରାଷ୍ଟ୍ରପତି, ଶନିବାର ମୋଦିଙ୍କ ସହ ହେବ ଦ୍ୱିପାକ୍ଷିକ ବୈଠକ

ମୋଦି-ସି ଜିନପିଙ୍ଗ ଭେଟ । ଚୀନ୍ ରାଷ୍ଟ୍ରପତିଙ୍କ ୨୪ ଘଣ୍ଟିଆ ଭାରତ ଗସ୍ତରେ ବାଣିଜ୍ୟ ଏବଂ ସୀମା ବିବାଦ ରହିବ ମୁଖ୍ୟ ଏଜେଣ୍ଡା । ଚୀନ୍ ରାଷ୍ଟ୍ରପତି ସି ଜିନପିଙ୍ଗ ୭ ବର୍ଷ ପରେ ଭାରତ ଗସ୍ତରେ ଆସୁଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନିମନ୍ତ୍ରଣକ୍ରମେ ସେ ସେପ୍ଟେମ୍ବର ୧୨ ରୁ ୧୩ ପର୍ଯ୍ୟନ୍ତ ନୂଆଦିଲ୍ଲୀରେ ଅନୁଷ୍ଠିତ ହେବାକୁ ଥିବା ବ୍ରିକ୍ସ ଶିଖର ସମ୍ମିଳନୀରେ ଯୋଗଦେବେ ।

କୂଟନୈତିକ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଶନିବାର ସନ୍ଧ୍ୟାରେ ପ୍ରଧାନମନ୍ତ୍ରୀ ମୋଦିଙ୍କ ସହ ତାଙ୍କର ଦ୍ୱିପାକ୍ଷିକ ବୈଠକ ଅନୁଷ୍ଠିତ ହେବାର କାର୍ଯ୍ୟକ୍ରମ ରହିଛି । ସି ଜିନପିଙ୍ଗଙ୍କ ଏହି ୨୪ ଘଣ୍ଟିଆ ଗସ୍ତ ସମୟରେ ତାଙ୍କ ସହିତ ୬୭ ଜଣିଆ ସରକାରୀ ପ୍ରତିନିଧି ଦଳ ମଧ୍ୟ ଆସୁଛନ୍ତି । ଏହି ପ୍ରତିନିଧି ଦଳରେ ଚୀନ୍ କମ୍ୟୁନିଷ୍ଟ ପାର୍ଟିର ପଲିବୁରୋ ସ୍ଥାୟୀ ସମିତିର ସଦସ୍ୟ ତଥା ଜିନପିଙ୍ଗଙ୍କ ଅତି ନିକଟତମ କାଇ କି ଏବଂ ବୈଦେଶିକ ମନ୍ତ୍ରୀ ୱାଙ୍ଗ ଇ ସାମିଲ ଅଛନ୍ତି ।

ଅଧିକ ପଢ଼ନ୍ତୁ: ଭାରତରେ ପହଞ୍ଚିଲେ ପୁଟିନ୍‌, ଆଜି PM ମୋଦିଙ୍କ ସହ ହେବ ଦ୍ବିପାକ୍ଷିକ ବୈଠକ

ଏହାସହ ଏକ ବ୍ୟବସାୟୀ ପ୍ରତିନିଧି ଦଳ ମଧ୍ୟ ପୃଥକ ଭାବେ ଏହି ଗସ୍ତରେ ଆସୁଛନ୍ତି । ଶନିବାର ଦିନ ଦ୍ୱିପ୍ରହର ୧୨:୧୦ ମିନିଟ୍‌ରେ ସି ଜିନପିଙ୍ଗ ପହଞ୍ଚିବା ପରେ ଏହି ୨୪ ଘଣ୍ଟିଆ ଗସ୍ତ ଆରମ୍ଭ ହେବ ଏବଂ ରବିବାର ଦ୍ୱିପ୍ରହର ୧୨:୨୦ ମିନିଟ୍‌ରେ ସେ ପ୍ରସ୍ଥାନ କରିବେ । ଶନିବାର ଅପରାହ୍ନ ପ୍ରାୟ ୨ଟା ସମୟରେ ସେ ଭାରତ ମଣ୍ଡପମରେ ପହଞ୍ଚିବେ, ଯେଉଁଠାରେ ପ୍ରଧାନମନ୍ତ୍ରୀ ମୋଦି ତାଙ୍କୁ ସ୍ବାଗତ କରିବେ ।

ବ୍ରିକ୍ସର ବନ୍ଦ କକ୍ଷ ଅଧିବେଶନ ଏବଂ ପ୍ରଧାନମନ୍ତ୍ରୀ ମୋଦିଙ୍କ ଦ୍ୱାରା ଆୟୋଜିତ ରାତ୍ରିଭୋଜନ ମଧ୍ୟରେ ଉଭୟ ନେତାଙ୍କ ମଧ୍ୟରେ ଦ୍ୱିପାକ୍ଷିକ ବୈଠକ ହେବାର ସମ୍ଭାବନା ଅଛି । ୨୦୨୪ କାଜାନ ବ୍ରିକ୍ସ ଶିଖର ସମ୍ମିଳନୀ ସମୟରେ ଉଭୟ ନେତାଙ୍କ ଭେଟଘାଟ ପରଠାରୁ ଦ୍ୱିପାକ୍ଷିକ ସମ୍ପର୍କରେ ଯେଉଁ ସକାରାତ୍ମକ ବାତାବରଣ ସୃଷ୍ଟି ହୋଇଛି, ସି ଜିନପିଙ୍ଗଙ୍କ ଏହି ଗସ୍ତ ତାହାକୁ ଆହୁରି ମଜଭୁତ କରିବ ବୋଲି ଆଶା କରାଯାଉଛି ।

ସେପଟେ ଆଗାମୀ ବ୍ରିକ୍ସ ଶିଖର ସମ୍ମିଳନୀ ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବାର୍ତ୍ତା । ବିଶ୍ୱ କଲ୍ୟାଣ, ସକାରାତ୍ମକ ଆଲୋଚନା ଏବଂ ସଂସ୍କୃତର ଅମର ବାଣୀ 'ସୁଭାଷିତମ୍'ର ଗୁରୁତ୍ୱକୁ ଦର୍ଶାଇ ଏକ ବାର୍ତ୍ତା ପ୍ରଦାନ କରିଛନ୍ତି ପିଏମ୍ ମୋଦି । ନିଜର ଏକ୍ସ ହ୍ୟାଣ୍ଡେଲରେ ପ୍ରଧାନମନ୍ତ୍ରୀ ଲେଖିଛନ୍ତି, "ଆଗାମୀ ଦିନରେ ବ୍ରିକ୍ସ ଶିଖର ସମ୍ମିଳନୀ ପାଇଁ ବିଶ୍ୱର ବିଭିନ୍ନ ପ୍ରାନ୍ତରୁ ନେତାମାନେ ଏକାଠି ହେବେ । ବିଶ୍ୱର କଲ୍ୟାଣ ପାଇଁ ଏକାଠି ହୋଇଥିବା ଆଶା ଏବଂ ବିଭିନ୍ନ ପ୍ରସଙ୍ଗରେ ଏହି ସମ୍ମିଳନୀରେ ସକାରାତ୍ମକ ତଥା ଅର୍ଥପୂର୍ଣ୍ଣ ଆଲୋଚନା ହେବ ବୋଲି ମୁଁ ସମ୍ପୂର୍ଣ୍ଣ ଆଶାବାଦୀ ।"