ଦିଲ୍ଲୀ: ଓଡ଼ିଆ କଳା, ସଂସ୍କୃତି, ଇତିହାସ, ଐତିହ୍ୟର ହେବ ମହାମିଳନ । କିଛି ଦିନ ପାଇଁ ଓଡ଼ିଶା ପାଲଟିବ ଜାତୀୟ ରାଜଧାନୀ ଦିଲ୍ଲୀ । ଏକାଠି ହେବେ ଲକ୍ଷ ଲକ୍ଷ ଓଡ଼ିଆ । ଓଡ଼ିଶାର ନାଚଗୀତ, ଲୋକକଳା, ବାଦ୍ୟଯନ୍ତ୍ରରେ କମ୍ପି ଉଠିବ ଭାରତର ହୃଦୟ । ଗୋଟିଏ ସ୍ଥାନରେ ସଭିଏଁ ହେବେ ଏକାଠି । ହାତ ପାହାନ୍ତାରେ ଓଡ଼ିଶାର ପିଠାପଣା, ମିଠା, ସୁସ୍ଵାଦୁ ବ୍ୟଞ୍ଜନର ମଜା ନେବେ ଓଡ଼ିଆ ଏବଂ ଦେଶବାସୀ । ହଜିଯାଉଥିବା ଲୋକକଳା ପ୍ରଦର୍ଶନ କରିବେ ଓଡ଼ିଶାର ନୃତ୍ୟଶିଳ୍ପୀ । ଆଦିବାସୀ ଲୋକକଳାଠୁ ଆଧୁନିକ ସଂଗୀତ, ଗୋଟିଏ ମଞ୍ଚରେ ମିଳିବ ସବୁର ଝଲକ । ଏମିତି ଏକ ମହାମଞ୍ଚ ନେଇ ଆସିଛି ଓଡ଼ିଆଙ୍କ ଗର୍ବ 'ଓଡ଼ିଶା ପର୍ବ ୨୦୨୬' ।

ନୂଆଦିଲ୍ଲୀର ଜବାହରଲାଲ ନେହେରୁ ଷ୍ଟାଡିୟମରେ ଦିଲ୍ଲୀ ସ୍ଥିତ ଅଗ୍ରଣୀ ସାମାଜିକ-ସାଂସ୍କୃତିକ ସଂଗଠନ 'ଓଡ଼ିଆ ସମାଜ' ଦ୍ଵାରା ମାର୍ଚ୍ଚ ୧୩ ତାରିଖରୁ ମାର୍ଚ୍ଚ ୧୫ ତାରିଖ ପର୍ଯ୍ୟନ୍ତ ତିନି ଧରି ଓଡ଼ିଶା ପର୍ବର ଆୟୋଜନ ହେବାକୁ ଯାଉଛି । ଓଡ଼ିଶା ପର୍ବର ମୁଖ୍ୟ ବିନ୍ଧାଣୀ, ପୃଷ୍ଠପୋଷକ ହେଉଛନ୍ତି ଓଡ଼ିଆ ପୁଅ ତଥା କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ଯିଏକି ଓଡ଼ିଶାର କଳା ସଂସ୍କୃତିକୁ ଜାତୀୟ ସ୍ତରରେ ପରିଚିତ ଏବଂ ବ୍ୟାପକ କରିବାକୁ ପଣ କରିଛନ୍ତି । ଓଡ଼ିଶା ପର୍ବକୁ ସଫଳ କରିବାରେ ତାଙ୍କର ରହିଛି ବଡ଼ ଭୂମିକା, ଯାହାକୁ ନିଜେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ମଧ୍ୟ ପ୍ରଶଂସା କରିଛନ୍ତି । ଚଳିତ ଥର ଏହି ପର୍ବରେ ଓଡ଼ିଶାର ଅନେକ ମାନ୍ୟଗଣ୍ୟ ବ୍ୟକ୍ତି ମଧ୍ୟ ଯୋଗ ଦେବେ ।

ଅଧିକ ପଢ଼ନ୍ତୁ: ଆମ ସଂସ୍କୃତି ଓ ପରମ୍ପରାର ପରିଚୟ 'ଓଡ଼ିଶା ପର୍ବ'

ଉଠିବ ପଡ଼ିବ ନ୍ୟାସନାଲ୍ କ୍ୟାପିଟାଲ୍

ତିନି ଦିନ ଧରି ଜାତୀୟ ରାଜଧାନୀରେ ଜମିବ ଓଡ଼ିଶା ପର୍ବ । ଦେଶ ଦେଖିବ ଓଡ଼ିଶାର କଳା, ସଂସ୍କୃତି । ଆଉ ଚାଖିବ ଓଡ଼ିଆ ହାଣ୍ଡିଶାଳର ସ୍ଵାଦ । ସନ୍ଧ୍ୟା ହେବା ମାତ୍ରେ ଆହୁରି ରଙ୍ଗୀନ ହୋଇଯିବ ଦିଲ୍ଲୀ ପରିବେଶ । ଓଡ଼ିଶାର ପ୍ରସିଦ୍ଧ ନୃତ୍ୟଶିଳ୍ପୀ ଓ ଗାୟକ ନିଜର କଳା ପ୍ରଦର୍ଶନ କରି ସମସ୍ତଙ୍କୁ ମତୁଆଲା କରିବେ । ଓଡ଼ିଶାର ଲୋକନୃତ୍ୟ ଯେପରିକି ବାଘନାଚ, ଘୋଡ଼ାନାଚ, ରଣପାଠାରୁ ଆରମ୍ଭ କରି ଆଦିବାସୀ ନୃତ୍ୟ କେଡୁ, ଦୁରୁଆ ପର୍ଯ୍ୟନ୍ତ ସବୁକିଛି ଗୋଟିଏ ମଞ୍ଚରେ ପ୍ରଦର୍ଶିତ ହେବ ।

ମନୋରଞ୍ଜନ ସାଙ୍ଗକୁ ସପିଂ ଓ ଖାଦ୍ୟପେୟର ମଜା ନେବେ ଓଡ଼ିଶା ପର୍ବ ବୁଲିବାକୁ ଆସିଥିବା ପର୍ଯ୍ୟଟକ । ଗୋଟିଏ ସ୍ଥାନରେ ମିଳିବ ଓଡ଼ିଶାର ପିଠାପଣା, ମିଠାଠୁ ଆରମ୍ଭ କରି ସମସ୍ତ ପ୍ରସିଦ୍ଧ ଲୋକପ୍ରିୟ ଖାଦ୍ୟ । ସେ କଟକ ଦହିବରା ହେଉ କି ବାରିପଦାର ମୁଢି ମାଂସ...ଆମିଷ ଓ ନିରାମିଷ ଖାଦ୍ୟର ଆସର ଜମିବ । ପ୍ରତିଟି ଷ୍ଟଲକୁ ଯାଇ ପର୍ଯ୍ୟଟକମାନେ ନିଜ ମନ ପସନ୍ଦର ଖାଦ୍ୟ ଖାଇପାରିବେ । ସେହିପରି ଓଡ଼ିଶାର ହସ୍ତକଳାର ଷ୍ଟଲ୍ ମଧ୍ୟ ଲାଗିବ । କେନ୍ଦୁଝରର ଅଭଙ୍ଗା କଣ୍ଢେଇ, ପୁରୀର ପଟ୍ଟଚିତ୍ର, କୋରାପୁଟର କୋଟପାଡ଼ ଶାଢୀ, ସମ୍ବଲପୁରର ସମ୍ବଲପୁରୀ ଶାଢୀ ଆଦି ସମସ୍ତ ଓଡ଼ିଆ ହସ୍ତକଳା ଓ ହସ୍ତତନ୍ତର ସାମଗ୍ରୀକୁ ଦିଲ୍ଲୀରେ ପାଇବେ ପ୍ରବାସୀ ଓଡ଼ିଆ ।

ଆଉ ରହିଲା ମାତ୍ର କେଇଟା ଦିନ । ଯଦି ଆପଣ ବି ଦିଲ୍ଲୀରେ ଅଛନ୍ତି ବା ଏହି ମହୋତ୍ସବରେ ସାମିଲ ହେବାକୁ ଚାହୁଁଛନ୍ତି, ତେବେ ନିଶ୍ଚିତ ଜାଣିରଖନ୍ତୁ ଓଡ଼ିଶା ପର୍ବ ୨୦୨୬ର କାର୍ଯ୍ୟସୂଚୀ । ମାର୍ଚ୍ଚ ୧୩ରୁ ୧୫ ତାରିଖ ତିନି ଦିନ ଧରି ଅନେକ ବିଶେଷ କାର୍ଯ୍ୟକ୍ରମ ସହିତ ସାଂସ୍କୃତିକ କାର୍ଯ୍ୟକ୍ରମର ମଧ୍ୟ ଆୟୋଜନ କରାଯାଇଛି । ଯେଉଁଠି ଓଡ଼ିଶାରୁ ଦିଲ୍ଲୀ ଯାଇଥିବା ଲୋକପ୍ରିୟ କଳାକାରମାନେ ନିଜର କଳା ପ୍ରଦର୍ଶନ କରି ଉପସ୍ଥିତ ଅତିଥି ଓ ଦର୍ଶକଙ୍କ ମନ କିଣିବେ । ନିମ୍ନରେ ପଢନ୍ତୁ ସମସ୍ତ କାର୍ଯ୍ୟକ୍ରମର ତାଲିକା...

ସାଂସ୍କୃତିକ କାର୍ଯ୍ୟକ୍ରମ ବିବରଣୀ:

ପ୍ରଥମ ଦିନ - ଶୁକ୍ରବାର, ୧୩ ମାର୍ଚ୍ଚ ୨୦୨୬

ସନ୍ଧ୍ୟା ୦୬:୦୦-ସନ୍ଧ୍ୟା ୦୭:୦୦
ଆନୁଷ୍ଠାନିକ ଉଦଘାଟନୀ କାର୍ଯ୍ୟକ୍ରମ
(ଦୀପ ପ୍ରଜ୍ଜ୍ୱଳନ, ସ୍ୱାଗତ ଭାଷଣ, ସମ୍ବର୍ଦ୍ଧନା)

ସନ୍ଧ୍ୟା ୦୭:୧୦-ସନ୍ଧ୍ୟା ୦୭:୪୦
ଗାଥା ଓଡ଼ିଶା
(ପଦ୍ମଶ୍ରୀ ଅରୁଣା ମହାନ୍ତିଙ୍କ ଓଡ଼ିଶା ନୃତ୍ୟ ଏକାଡେମୀ ଦ୍ଵାରା ଓଡ଼ିଶୀ ନୃତ୍ୟ ପ୍ରଦର୍ଶନ)

ସନ୍ଧ୍ୟା ୦୭:୪୦- ରାତି ୦୮:୦୦
'ଲୋକ କଳା ଓ ଲୋକ ଜୀବନ'
(ସମ୍ବଲପୁରୀ ନୃତ୍ୟ ନାଟିକା ମାଧ୍ୟମରେ ପଶ୍ଚିମ ଓଡ଼ିଶାର ସମୃଦ୍ଧ ସାଂସ୍କୃତିକ ଐତିହ୍ୟ, କଳା ପ୍ରଦର୍ଶନ)

ରାତି ୦୮:୦୦-ରାତି ୦୮:୨୦
ଆଦିମ ଧାରା: ଓଡ଼ିଶାର ଆଦିବାସୀଙ୍କ ଯାତ୍ରା
(ଓଡ଼ିଶାର ଆଦିବାସୀ ଜନଜାତି ନୃତ୍ୟ ଓ ପରମ୍ପରାର ଏକ ଜୀବନ୍ତ ପ୍ରଦର୍ଶନ)

ରାତି ୦୮:୨୦-ରାତି ୦୯:୩୦
ପଶ୍ଚିମ ଓଡ଼ିଶା ସୁର ସନ୍ଧ୍ୟା
(ଉମାକାନ୍ତ ବାରିକ ଏବଂ ଶାଶ୍ଵତ ତ୍ରିପାଠୀଙ୍କ ଦ୍ୱାରା ଲାଇଭ୍ ସମ୍ବଲପୁରୀ ସଙ୍ଗୀତ ପ୍ରଦର୍ଶନ)

ଦ୍ଵିତୀୟ ଦିନ - ଶନିବାର, ୧୪ ମାର୍ଚ୍ଚ ୨୦୨୬

ସନ୍ଧ୍ୟା ୦୬:୦୦-ସନ୍ଧ୍ୟା ୦୭:୦୦
ଆନୁଷ୍ଠାନିକ କାର୍ଯ୍ୟକ୍ରମର ଶୁଭାରମ୍ଭ

ସନ୍ଧ୍ୟା ୦୭:୧୦ - ସନ୍ଧ୍ୟା ୦୭:୪୦
ଓଡ଼ିଶୀ ନୃତ୍ୟ ଧର୍ମ ଚକ୍ର ଅଶୋକ
(କବିତା ମହାନ୍ତି ଏବଂ ଗ୍ରୁପ୍ ଦ୍ଵାରା ନୃତ୍ୟ ପ୍ରଦର୍ଶନ)

ସନ୍ଧ୍ୟା ୦୭:୪୦-ରାତି ୦୮:୦୦
ବିଘ୍ନବିନାଶକ ଲୀଳା- ଏକ ଦିବ୍ୟ ଶୁଭାରମ୍ଭ
(ବିଦ୍ୟାଦାତା ଶ୍ରୀଗଣେଶଙ୍କୁ ଆବାହନ କରି ଏକ ଭାରତୀୟ ଲୋକନୃତ୍ୟ ଉପସ୍ଥାପନା)

ରାତି ୦୮:୦୦ – ରାତି ୦୮:୨୦
ଧ୍ଵନୀ: ସ୍ୱରର ଓଡ଼ିଶା
(ଓଡ଼ିଶାର ବିବିଧ ସଙ୍ଗୀତ ପରମ୍ପରାକୁ ଦର୍ଶାଇ ଏକ ସଙ୍ଗୀତ ବାଦ୍ୟଯନ୍ତ୍ର ଶୋ')

ରାତି ୦୮:୨୦ – ରାତି ୦୯:୩୦
ସୁର ସଙ୍ଗମ
(ସତ୍ୟଜିତ ପ୍ରଧାନ ଏବଂ ଲିପ୍ସା ମହାପାତ୍ରଙ୍କ ଦ୍ୱାରା ଲାଇଭ୍ ସଙ୍ଗୀତ କାର୍ଯ୍ୟକ୍ରମ)

ତୃତୀୟ ତଥା ଶେଷ ଦିନ – ରବିବାର, ୧୫ ମାର୍ଚ୍ଚ ୨୦୨୬

ସନ୍ଧ୍ୟା ୦୬:୦୦– ସନ୍ଧ୍ୟା ୦୭:୦୦
ଆନୁଷ୍ଠାନିକ କାର୍ଯ୍ୟକ୍ରମର ଶୁଭାରମ୍ଭ

ସନ୍ଧ୍ୟା ୦୭:୧୦ – ସନ୍ଧ୍ୟା ୦୭:୪୦
ଅନନ୍ତ ନାଦର ଅମର ପ୍ରତିଧ୍ୱନି:
ରାଷ୍ଟ୍ରୀୟ ଗୀତ 'ବନ୍ଦେ ମାତରମ'ର ୧୫୦ ବର୍ଷ ପୂର୍ତ୍ତି ଅବସରରେ ସ୍ଵତନ୍ତ୍ର କାର୍ଯ୍ୟକ୍ରମ
(ଫ୍ୟୁଜନ ଓଡ଼ିଶୀ ଏବଂ ଫ୍ରି-ଷ୍ଟାଇଲ୍ ନୃତ୍ୟ ପ୍ରଦର୍ଶନ)

ରାତି ୦୭:୪୦ – ରାତି ୦୮:୧୦
ଗୀତର ଯୁଗଯାତ୍ରା
ସ୍ମୃତିରେ ପ୍ରସିଦ୍ଧ ଓଡ଼ିଆ ଚଳଚ୍ଚିତ୍ର ଗୀତ (ଓଲିଉଡ଼ ନୃତ୍ୟ ପ୍ରଦର୍ଶନ)

ରାତି ୦୮:୧୦ – ରାତି ୦୮:୨୦
ପଞ୍ଚରାଶି
(ପଶ୍ଚିମ ଓଡ଼ିଶାର ସମୃଦ୍ଧ ଲୋକକଳା, ସଙ୍ଗୀତ ଏବଂ ସାଂସ୍କୃତିକ ଐତିହ୍ୟର ଏକ ରଙ୍ଗୀନ ଉତ୍ସବ)

ରାତି ୦୮:୨୦-ରାତି ୦୮:୪୦
ପରମ୍ପରା ପ୍ରବାହ – ଓଡ଼ିଶାର ଜୀବନ୍ତ ସୂତ୍ର
(ରଙ୍ଗବତୀ ରାମ୍ପ ଶୋ' ସହ ଓଡ଼ିଶାର ଆଦିବାସୀ ଐତିହ୍ୟ, ଲୋକକଳା, ଉତ୍କୃଷ୍ଟ ହସ୍ତତନ୍ତ ଏବଂ କାଳଜୟୀ ହସ୍ତଶିଳ୍ପ ପ୍ରଦର୍ଶନ)

ରାତି ୦୮:୪୦ – ରାତି ୦୯:୩୦
ପ୍ରତିଭା ଉତ୍ସବ – ପ୍ରତିଭାକୁ ପାଳନ
(ଓଡ଼ିଶା ଗଟ୍ ଟ୍ୟାଲେଣ୍ଟର ବିଜେତାମାନଙ୍କୁ ନେଇ ଗ୍ରାଣ୍ଡ ଫିନାଲେ)

କେବେ ପଡ଼ିଥିଲା 'ଓଡ଼ିଶା ପର୍ବ'ର ମୂଳଦୁଆ ?

ସୂଚନା ଥାଉ କି ବର୍ଷ ୨୦୧୭ ଏପ୍ରିଲ ମାସ ୨୯ ତାରିଖରୁ ମେ ୧ ତାରିଖ ତିନି ଦିନ ଯାଏଁ ପ୍ରଥମ କରି ଜାତୀୟ ରାଜଧାନୀରେ ଆରମ୍ଭ ହୋଇଥିଲା ଓଡ଼ିଶା ପର୍ବ । ଏକାଠି ହୋଇଥିଲେ ହଜାର ହଜାର ଓଡ଼ିଆ ଓ ଅଣଓଡ଼ିଆ । ଏହାପରେ ୨୦୧୮ ମସିହା ଦିଲ୍ଲୀର ଐତିହାସିକ ଇଣ୍ଡିଆ ଗେଟ୍ ଲନ୍‌ରେ ପୁଣି ଥରେ ଓଡ଼ିଶା ପର୍ବ ଆୟୋଜିତ ହୋଇଥିଲା । ୨୦୧୯ ମସିହାରେ ଥରଟିଏ ଗୁଜରାଟର ସୁରତରେ ଓଡ଼ିଶା ପର୍ବ ଆୟୋଜିତ ହୋଇଥିଲେ । ଏଠାରେ ମଧ୍ୟ ଏହି ପର୍ବକୁ ମିଳିଥିଲା ଓଡ଼ିଆ ଓ ଅଣଓଡ଼ିଆଙ୍କ ଅକୁଣ୍ଠ ଭଲପାଇବା ।

ଏପରିକି କୋଭିଡ଼ ମହାମାରୀ ସମୟରେ ମଧ୍ୟ ଓଡ଼ିଶା ପର୍ବରେ ରୋକ୍ ଲାଗିନଥିଲା । ଭର୍ଚ୍ଚୁଆଲରେ ଆୟୋଜିତ ହୋଇଥିଲା ପ୍ରତି ଓଡ଼ିଆଙ୍କ ଗର୍ବ ଓଡ଼ିଶା ପର୍ବ । ୨୦୨୩ରୁ ଏହି ପର୍ବ ପ୍ରତିବର୍ଷ ଦିଲ୍ଲୀର ଜବାହରଲାଲ ନେହେରୁ ଷ୍ଟାଡିୟମରେ ପାଳନ ହେଉଛି । ଚଳିତ ବର୍ଷ ମଧ୍ୟ ବାହୁ ମେଲାଇ ସମସ୍ତଙ୍କୁ ସ୍ଵାଗତ କରୁଛି ଓଡ଼ିଶା ପର୍ବ ୨୦୨୬ । ଓଡ଼ିଶାର କଳା, ସଂସ୍କୃତି ଏବଂ ଐତିହ୍ୟକୁ ଜାତୀୟ ଓ ଅନ୍ତର୍ଜାତୀୟ ସ୍ତରରେ ପରିଚିତ କରାଇବାର ଏହା ଏକ ବଡ଼ ସୁଯୋଗ ପାଲଟିଛି ।