ଜାତୀୟ ରାଜଧାନୀ ନୂଆଦିଲ୍ଲୀରେ ଅଗ୍ରଣୀ ସାମାଜିକ-ସାଂସ୍କୃତିକ ସଂଗଠନ 'ଓଡ଼ିଆ ସମାଜ' ଦ୍ଵାରା ଆୟୋଜିତ ହେଉଛି ଓଡ଼ିଶା ପର୍ବ ୨୦୨୬ । ପର୍ବର ଦ୍ଵିତୀୟ ଦିନରେ ମୁଖ୍ୟ ଅତିଥି ଭାବେ ଯୋଗ ଦେଇଛନ୍ତି ଦିଲ୍ଲୀ ମୁଖ୍ୟମନ୍ତ୍ରୀ ରେଖା ଗୁପ୍ତା । ଓଡ଼ିଆ କଳାକାରଙ୍କ ବାଦ୍ୟ ସହିତ ଶଙ୍ଖ ଧ୍ୱନିରେ ତାଙ୍କୁ ସ୍ୱାଗତ କରାଯାଇଛି । ଓଡ଼ିଆ କଳାକାରଙ୍କ ବାଦ୍ୟରେ ଦିଲ୍ଲୀ ମୁଖ୍ୟମନ୍ତ୍ରୀ ରେଖା ଗୁପ୍ତା ଝୁମିଥିବା ଦେଖିବାକୁ ମିଳିଛି । ସେହିପରି କେନ୍ଦ୍ରମନ୍ତ୍ରୀ ଅର୍ଣ୍ଣପୂର୍ଣ୍ଣା ଦେବୀ ମଧ୍ୟ ସମ୍ମାନିତ ଅତିଥି ଭାବେ କାର୍ଯ୍ୟକ୍ରମରେ ଯୋଗ ଦେଇଛନ୍ତି ।

ମନ ମୋହିବ ନୃତ୍ୟଗୁରୁ କବିତା ମହାନ୍ତିଙ୍କ ଓଡ଼ିଶୀ ନୃତ୍ୟ
ଆଜି ଦ୍ଵିତୀୟ ଦିନର ସନ୍ଧ୍ୟାରେ ବି ଅନୁଷ୍ଠିତ ହୋଇଛି ସାଂସ୍କୃତିକ କାର୍ଯ୍ୟକ୍ରମ, ଯେଉଁଥିରେ ଯୋଗ ଦେବେ ଅନେକ କଳାକାର । ଆଉ କିଛି ସମୟ ପରେ ଓଡ଼ିଶୀ ନୃତ୍ୟ ଗୁରୁ କବିତା ମହାନ୍ତିଙ୍କ ଗ୍ରୁପ ଧର୍ମ ଚକ୍ର ଉପସ୍ଥାପନ କରିବେ । ଏହା ପରେ ଓଡ଼ିଶାରୁ ଯାଇଥିଲା ଲୋକପ୍ରିୟ ଓଡ଼ିଆ କଣ୍ଠଶିଲ୍ପୀ ସତ୍ୟଜିତ ପ୍ରାଧନ ଏବଂ ଲିପ୍ସା ମହାପାତ୍ର ସଙ୍ଗୀତ ପରିବେଷଣ କରିବେ । ବିଘ୍ନ ବିନାଶକଙ୍କ ଲୀଳା ଆକର୍ଷଣର କେନ୍ଦ୍ର ବିନ୍ଦୁ ହେବ ।

ସ୍ଵତନ୍ତ୍ର ଆଲୋଚନା ଚକ୍ର ଅନୁଷ୍ଠିତ
ସନ୍ଧ୍ୟା ପୂର୍ବରୁ ଓଡ଼ିଶା ପର୍ବର ଦ୍ଵିତୀୟ ଦିନରେ 'ନବଚେତନା ଓଡ଼ିଶା' ଏବଂ 'ଭାଷା ଓଡ଼ିଶା' ନାମରେ ଦୁଇଟି ଅଧିବେଶନରେ ଆଲୋଚନା ଚକ୍ର ଅନୁଷ୍ଠିତ ହୋଇଥିଲା । ଲକ୍ଷ୍ନୌର NBRI ନିର୍ଦ୍ଦେଶକ ଡକ୍ଟର ଅଜିତ କୁମାର ସାସାନିଙ୍କ ନେତୃତ୍ୱରେ 'ନବଚେତନା ଓଡ଼ିଶା' ଆଲୋଚନା ଚକ୍ର ଅନୁଷ୍ଠିତ ହୋଇଥିଲା । ଏଥିରେ IES ଡକ୍ଟର ଇସିତା ତ୍ରିପାଠୀ ଗାଙ୍ଗୁଲିଙ୍କ ସହିତ IAS ମୀରା ମହାନ୍ତି, ସ୍ମୃତି ରଞ୍ଜନ ବିଶ୍ୱାଳ, ରାମ୍ୟ ରଞ୍ଜନ ପଟେଲ ପ୍ରମୁଖ ଯୋଗ ଦେଇଥିଲେ । ଏହି ଅବସରରେ ଡକ୍ଟର ଅଜିତ କୁମାର ଜି କହିଥିଲେ ଯେ ନବଚେତନା ଓଡିଶା ପାଇଁ ଆମକୁ ନେତୃତ୍ୱ ନେବାର ଆବଶ୍ୟକତା ରହିଛି । ସେ ଆହୁରି କହିଥିଲେ, "ଆମ ପାଖରେ ଏହାକୁ ନେଇ ଅନେକ ଉଦାହରଣ ରହିଛି । ଆମର ମାଟି ଉର୍ବର ମାଟି । ଓଡ଼ିଶାରେ ଉପକୂଳଠୁ ନେଇ ବିଭିନ୍ନ ପ୍ରକାର କଥା ରହିଛି । ସବୁ ପ୍ରକାର ଜଳବାୟୁ ଓଡ଼ିଶାରେ ରହିଛି । ଏହାକୁ ଭଲ ଭାବରେ ବ୍ୟବହାର କରାଗଲେ ଆମେ ଆମର ଆବଶ୍ୟକତା ପୂରଣ କରିପାରିବା ।

ଏହା ବି ପଢନ୍ତୁ: ଓଡ଼ିଶାରେ ସୁଯୋଗର ରହିଛି ଅପାର ସମ୍ଭାବନା, ହୋଇ ପାରିବ ଗେମ୍ ଚେଞ୍ଜର୍

ସେହିପରି IES ଡ଼କ୍ଟର ଇସିତା ତ୍ରିପାଠୀ ଗାଙ୍ଗୁଲି କହିଥିଲେ ବିକଶିତ ଓଡ଼ିଶା ପାଇଁ ଆମକୁ କାର୍ଯ୍ୟ କରିବାକୁ ପଡ଼ିବ । ଅନେକ କଥା ରହିଛି ଯାହା କରାଯାଇ ପାରିବ । ଓଡ଼ିଶାର ଗ୍ରାମ୍ୟ ପର୍ଯ୍ୟଟନୀ ସ୍ଥଳୀଗୁଡ଼ିକୁ ନେଇ ଯୋଜନା କରିବାକୁ ସେ ଉଲ୍ଲେଖ କରିଥିଲେ । ଏହାପରେ ଦ୍ଵିତୀୟ ଅଧିବେଶନରେ NCERTର ପ୍ରଫେସର ଡକ୍ଟର ରାମାନୁଜନ ମେଘନାଥନଙ୍କ ନେତୃତ୍ୱରେ 'ଭାଷା ଓଡ଼ିଶା'କୁ ନେଇ ହୋଇଥିବା ଆଲୋଚନା ଚକ୍ରରେ ଲେଖକ ଡକ୍ଟର ଅରବିନ୍ଦ ରାୟ ଏବଂ ଡକ୍ଟର ବସନ୍ତ ପଣ୍ଡା ପ୍ରମୁଖ ଯୋଗ ଦେଇଥିଲେ । ଭାଷା ନ ବଞ୍ଚିଲେ ସାହିତ୍ୟ ବଞ୍ଚିବ ନାହିଁ ବୋଲି ଆଲୋଚନା ଚକ୍ରରେ ଚର୍ଚ୍ଚା ହୋଇଥିଲା । ଆଜିର ଏଆଇ ଦୁନିଆରେ ମଧ୍ୟ ଓଡ଼ିଆ ଭାଷା ପ୍ରବେଶ କରାଇବା ଉଚିତ ବୋଲି ବକ୍ତାମାନେ କହିଥିଲେ । ଏହାବ୍ୟତୀତ ପ୍ରତିଭା ଉତ୍ସବରେ କୁନି କୁନି ପିଲାମାନେ ନିଜର ଲୁକ୍କାୟିତ ପ୍ରତିଭା ପ୍ରଦର୍ଶନ କରିଥିଲେ ।

ଏହା ବି ପଢନ୍ତୁ: 'ମୁଁ ଓଡ଼ିଆ' ଭାବେ ଗର୍ବର ସହ ପରିଚୟ ଦେବା ଓଡ଼ିଶା ପର୍ବର ଉଦ୍ଦେଶ୍ୟ: କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର

ତିନି ଧରି ଚାଲିବ ଓଡ଼ିଶା ପର୍ବ
ଓଡ଼ିଶା ପର୍ବ ପ୍ରତିବର୍ଷ ଦିଲ୍ଲୀଠାରେ ଆୟୋଜିତ ହୋଇଆସୁଛି । ଚଳିତ ଥର ଦିଲ୍ଲୀର ଜବାହରଲାଲ ନେହେରୁ ଷ୍ଟାଡିୟମରେ ଓଡ଼ିଶା ପର୍ବ ମାର୍ଚ୍ଚ ୧୩ ତାରିଖରୁ ୧୫ ତାରିଖ ପର୍ଯ୍ୟନ୍ତ ତିନି ଦିନ ଧରି ଆୟୋଜିତ ହେଉଛି । ଏହି ପର୍ବରେ ଓଡ଼ିଆ କଳା, ସଂସ୍କୃତି, ପରମ୍ପରା, ହସ୍ତକଳା, ହସ୍ତଶିଳ୍ପର ସମ୍ଭାର ଲାଗିଛି । ପର୍ଯ୍ୟଟକମାନେ ପର୍ବ ବୁଲି ଓଡ଼ିଆ ନାଚଗୀତକୁ ଅତି ନିକଟରୁ ଦେଖୁଥିବାବେଳେ ଓଡ଼ିଆ ଖାଦ୍ୟର ମଜା ନେଉଛନ୍ତି । ଓଡ଼ିଶାର ପାରମ୍ପରିକ ଖାଦ୍ୟ ପିଠାପଣାଠୁ ଆରମ୍ଭ କରି ଦହିବରା, ରସଗୋଲା, ବାରିପଦା ମୁଢି ମାଂସ ଆଦି ବିକ୍ରି ହେଉଛି । ଓଡ଼ିଆଙ୍କ ସହିତ ଅଣଓଡ଼ିଆମାନେ ମଧ୍ୟ ପର୍ବରେ ସାମିଲ ହୋଇ ଓଡ଼ିଶା କଳା ସଂସ୍କୃତି ପ୍ରତି ଆକର୍ଷିତ ହୋଇଥିବାବେଳେ ଓଡ଼ିଆ ଖାଦ୍ୟର ପ୍ରଶଂସା କରିଛନ୍ତି ।

ଅଧିକ ଖବର ପଢନ୍ତୁ..