ଅର୍ଗସ ବ୍ୟୁରୋ : କୋରାପୁଟର କୋଟିଆ । ଯେଉଁଠି ଲଗାତାର ଅନୁପ୍ରବେଶ କରୁଛି ପଡ଼ୋଶୀ ରାଜ୍ୟ । ଆନ୍ଧ୍ରର ପ୍ରଶାସନିକ ଅଧିକାରୀଙ୍କଠାରୁ ନେଇ ନେତା ଯେଉଁଠି ମନଇଚ୍ଛା କରୁଛନ୍ତି ଦାଦାଗିରି । ସେହି କୋଟିଆକୁ ନେଇ ଭାଙ୍ଗିଲା ଓଡ଼ିଶା ସରକାରଙ୍କ ନିଦ । ରାଜ୍ୟ ପ୍ରଶାସନ ଓ କୋରାପୁଟ ପ୍ରଶାସନର ବରିଷ୍ଠ ଅଧିକାରୀଙ୍କ ସହ କୋଟିଆ ଗଲେ ରାଜ୍ୟ ମୁଖ୍ୟ ଶାସନ ସଚିବ । ସଦଳବଳେ ମେଡିକାଲ, ଥାନା, ପଞ୍ଚାୟତ ଅଫିସ, ଅଙ୍ଗନୱାଡ଼ି କେନ୍ଦ୍ର, ହାଇସ୍କୁଲ ବୁଲିଲେ ପି. କେ ଜେନା । କିନ୍ତୁ ପ୍ରଶ୍ନ ହେଲା ସୀମାନ୍ତରେ ଓଡ଼ିଆ ଭାଷା, ସୀମା, ସଂସ୍କୃତି ଧ୍ବଂସ କରି ସୀମା ମାଡ଼ିବସିବାକୁ ଷଡ଼ଯନ୍ତ୍ର କରାଯାଉ ଥିବାବେଳେ କୁଆଡେ ଯାଇଥିଲେ ସରକାର ? 

ବିଜେଡିର ୨୪ ବର୍ଷର ଶାସନରେ କଳଙ୍କିତ ହୋଇଛି ଓଡ଼ିଶାର ଗୌରବ । ଓଡ଼ିଆ ସ୍ବାଭିମାନର ସୁରକ୍ଷାର ନାରା ଦେଇ କ୍ଷମତାକୁ ଆସିଥିବା ଆଞ୍ଚଳିକ ଦଳ ବିଜେଡିର ୨୪ ବର୍ଷର ଶାସନରେ ହିଁ ସଂକଟରେ ପଡ଼ିଛି ଓଡ଼ିଶାର ଭାଷା, ସୀମା, ସଂସ୍କୃତି ଓ ସ୍ବାଭିମାନ । କୋଟିଆରେ ଭାଷାକୁ ଅସ୍ତ୍ର କରି ସୀମା ଦଖଲ କରିବାକୁ ଷଡ଼ଯନ୍ତ୍ର କରୁଛି ପଡ଼ୋଶୀ ରାଜ୍ୟ । ଓଡ଼ିଶାର ମାଟି ତଳେ ଥିବା ସମ୍ପଦ ଉପରେ ଆନ୍ଧ୍ରର ଲୋଲୁପ ଦୃଷ୍ଟି । ପୁଣି ଧର୍ମାନ୍ତରୀକରଣ କରାଇ ଓଡ଼ିଆଙ୍କୁ ଜଗନ୍ନାଥଙ୍କଠାରୁ ଦୂରେଇ ନେବାକୁ କରାଯାଉଛି ଅପଚେଷ୍ଟା । ଏ ସବୁ ସବୁ ଜାଣି ଶୁଣି କାହିଁକି ଚୁପ୍ ବସିଛନ୍ତି ବିଜେଡି ସରକାର ?

ଅଭିଯୋଗ ହେଉଛି ଆନ୍ଧ୍ରର କୋଟିଆ ଦଖଲ ଷଡ଼ଯନ୍ତ୍ରରେ ସାମିଲ ହୋଇଛି ଓଡ଼ିଆ ଅସ୍ମିତା ବିରୋଧୀ ହାତଗଣତି ଅଫିସର । କୋଟିଆ ପ୍ରସଙ୍ଗରେ ରାଜ୍ୟ ସରକାରଙ୍କୁ ଘେରିଛନ୍ତି ଓଡ଼ିଆ ସ୍ବାଭିମାନ ଆନ୍ଦୋଳନର ଜଣେ ଅଗ୍ରଣୀ ନେତା ତଥା କୋରାପୁଟର ପୂର୍ବତନ ଜିଲ୍ଲାପାଳ ଗଦାଧର ପରିଡ଼ା । ଗଦାଧର ପରିଡ଼ାଙ୍କ ମାଲିକାନାରେ ଥିବା ଫାର୍ମହାଉସରୁ ଚୋରି ହୋଇଯାଇଥିଲା ଗୁରୁତ୍ବପୂର୍ଣ୍ଣ ଫାଇଲ୍ ଓ ଭିଡିଓ କ୍ୟାସେଟ୍, ଯାହା କୋଟିଆ ଉପରେ ଆନ୍ଧ୍ରର ହକ ଛଡ଼ାଇଆଣିବାରେ ହୋଇପାରିଥାନ୍ତା ବଡ଼ ହତିଆର । ୧୯୯୬ ମସିହାରୁ ରେକର୍ଡ କରାଯାଇଥିବା ପ୍ରାୟ ଏକ ହଜାର ଘଣ୍ଟାର ଭିଡିଓ କ୍ୟାସେଟରେ ଥିଲା କୋଟିଆ ମାଟିରେ ଆନ୍ଧ୍ର ଷଡ଼ଯନ୍ତ୍ରର ବଡ଼ ପ୍ରମାଣ । ଏବେ କୋର୍ଟରେ କୋଟିଆ କାହାର ପ୍ରମାଣ ବେଳେ କଣ ଦେଖାଇବେ ରାଜ୍ୟ ସରକାର । କୋଟିଆ ଗସ୍ତରେ ଯାଇଥିବା ମୁଖ୍ୟ ଶାସନ ସଚିବ ଏ ନେଇ ଦେବେ କି ଜବାବ ?

ଅଧିକ ପଢନ୍ତୁ ଓଡ଼ିଶା ଖବର 

ପ୍ରାୟ ୩ ବର୍ଷ ତଳେ ଗଜପତି ଜିଲ୍ଲା ଗଙ୍ଗାବାଡ଼ ପଞ୍ଚାୟତରେ ଛିଡ଼ା ହୋଇ ଆନ୍ଧ୍ର ପ୍ରଦେଶ ଜଗନ ସରକାରର ମନ୍ତ୍ରୀ ଆପାଲୁ ରାଜୁ ଓଡ଼ିଶା ଅଧିକାରୀଙ୍କୁ ନାଲିଆଖି ଦେଖାଇଥିଲେ । ଓଡ଼ିଶା ସୀମାରେ ଥିଲା ଅଙ୍ଗନବାଡ଼ି କେନ୍ଦ୍ରରୁ ମାଟିରେ ମିଶାଇ ଦେବାକୁ ଖୋଲାଖୋଲି ଦେଇଥିଲେ ଚେତାବନୀ । କିନ୍ତୁ ୨୦୨୩ ମସିହା ଉତ୍କଳ ଦିବସରେ କୋଟିଆ ଯାଇ ଆନ୍ଧ୍ରକୁ ମୁହଁତୋଡ଼ ଜବାବ ଦେଇଥିଲେ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ସେଠାକାର ଲୋକଙ୍କ ସମସ୍ୟା ଶୁଣିଥିଲେ, ସୁଖଦୁଃଖ ବୁଝିଥିଲେ । ଆନ୍ଧ୍ର ଅଧିକାରୀଙ୍କୁ ଗୋ ବ୍ୟାକ୍ ଆନ୍ଧ୍ର କହି ଘଉଡାଇ ଦେଇଥିଲେ । ତଥାପି ଚେତିଲେନି ଓଡ଼ିଶା ସରକାର ।