ଅର୍ଗସ ବ୍ୟୁରୋ : ଜଗତଜନନୀ ମା' ଦୁର୍ଗାଙ୍କ ମେଲାଣି ପରେ ଧରାପୃଷ୍ଠକୁ ଓହ୍ଲାଇ ଆସିଛନ୍ତି ଧନଦାତ୍ରୀ ମା ଲକ୍ଷ୍ମୀ । ରବିବାର ଠାରୁ ଆରମ୍ଭ ହୋଇଛି ଗଜଲକ୍ଷ୍ମୀ ପୂଜା । ଏନେଇ ଚଳଚଞ୍ଚଳ ହୋଇଉଠିଛି  ବୌଦ୍ଧ ଜିଲ୍ଲାର ପ୍ରତିଟି ପୂଜା ମଣ୍ଡପ । କୁମାର ପୂର୍ଣ୍ଣିମା ରାତିରୁ ମା'ଙ୍କୁ ଆବାହନ କରାଯାଇଥିଲା । ସ୍ୱସ୍ତିକ କ୍ଳବ ପକ୍ଷରୁ ଆୟୋଜିତ ଗଜଳଷ୍ମୀ ପୂଜା ଚଳିତବର୍ଷ ୨୫ବର୍ଷରେ ପଦାର୍ପଣ କରିଛି । 

ଅଧିକ ପଢନ୍ତୁ ଓଡ଼ିଶା ଖବର

ପୂଜାକୁ ଆକର୍ଷଣୀୟ କରିବା ପାଇଁ ଅଷ୍ଟଲଷ୍ମୀ ମୂର୍ତ୍ତୀ ସ୍ଥାପନ ସହ ମନୋରଞ୍ଜନ ପାଇଁ ମୁରାସୁର ଦରବାର ଓ ସାଂସ୍କୃତିକ କାର୍ଯ୍ୟକ୍ରମ କରାଯାଇଛି । ଗୋଟିଏ ପଟେ ମା' ଗଜଳଷ୍ମୀଙ୍କୁ ଦର୍ଶନ ସହ ଅନ୍ୟପଟେ ମକର ପଡିଆରେ ଜମିଥିଲା ମୁରାସୁର ଦରବାର । ମୁରାସୁରର ଅଟହାସ୍ୟରେ ପ୍ରକମ୍ପିତ ହେଉଛି ପଲସାଗୋରା ମକର ପଡିଆ । ଦେବରାଜ ଇନ୍ଦ୍ର ଓ ମୁରାସୁର ମଧ୍ୟରେ ସିଂହାସନ ଆରୋହଣ ପାଇଁ ଚାଲିଛି ଯୁଦ୍ଧ । ଯୁଦ୍ଧରେ ପରାସ୍ତ ହୋଇଥିଲେ ଇନ୍ଦ୍ର । 

ଏହାପରେ ସିଂହାସନ ଆରୋହଣ କରିଛନ୍ତି ଯୁବରାଜ ମୁରାସୁର । ଏହିପରି  ପୌରାଣିକ କଥା ବସ୍ତୁକୁ ଦେଖିବା ପାଇଁ ପ୍ରତିଦିନ ଜମିଥିଲା ବହୁ ଦର୍ଶକଙ୍କ ଭିଡ଼ । କୁମାରପୂର୍ଣ୍ଣିମା ଠାରୁ ଆରମ୍ଭ ହୋଇଥିବା ଏହି ଗଜଳଷ୍ମୀ ପୂଜା ଆଠଦିନ ଧରି ଚାଲିବ । ପ୍ରତିଦିନ ଯୁବରାଜ ମୁରାସୁର ସୁସଜ୍ଜିତ ରଥରେ ବସି ନଗର ପ୍ରରିକ୍ରମା କରିବା ସହିତ ରାଜ ଦରବାରକୁ ଆସିଥାନ୍ତି । ।

ଖାଲି ସେତିକି ନୁହେଁ ମନଂରଞ୍ଜନ ସହ ଅଂଚଳ ବିଭିନ୍ନ ସମସ୍ୟାର ସମାଧାନ ପାଇଁ ମଞ୍ଚରେ ଅତିଥି ମାନଙ୍କୁ ନିମନ୍ତ୍ରଣ କରାଯାଉଛି । ଆଉ ବିଭିନ୍ନ ସମସ୍ୟା ନେଇ ନେତା ହୁଅନ୍ତୁ କି ମନ୍ତ୍ରୀ କାହାକୁ ଛାଡୁ ନାହାନ୍ତି । ପ୍ରଶ୍ନ ବାଣରେ ଘାଇଲା କରୁଛନ୍ତି ଯୁବରାଜ ମୁରାସୁର । ଆଉ ମୁରାସୁରଙ୍କ ପ୍ରଶ୍ନର ଉତ୍ତର ରଖୁଛନ୍ତି ନେତା । ମଞ୍ଚରେ ନେତାଏଁ ଘାଇଲା ହେଉଥିବା ବେଳେ ଦର୍ଶକ ମାନେ ଭରପୁର ମଜା ନେଉଛନ୍ତି । ଚଳିତବର୍ଷ ପୂଜାକମିଟି ପକ୍ଷରୁ ଆୟୋଜିତ ହୋଇଥିବା ପୌରାଣିକ କାର୍ଯ୍ୟକ୍ରମ ଆଗାମୀ ଦିନରେ ଜିଲ୍ଲା ତଥା ରାଜ୍ୟରେ ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିବ ।