ଅର୍ଗସ ବ୍ୟୁରୋ : ବିଜେଡିର ରାଜ୍ୟସଭା ପ୍ରାର୍ଥୀ ଭାବେ ନାମାଙ୍କନ ପତ୍ର ଦାଖଲ କରିଛନ୍ତି କଟକ ବାରବାଟୀର ପୂର୍ବତନ ବିଧାୟକ ଦେବାଶିଷ ସାମନ୍ତରାୟ ଓ ପୁରୀ ଯୁବ ବିଜେଡି ନେତା ଶୁଭାଶିଷ ଖୁଣ୍ଟିଆ । ବିଜେଡି ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଉପସ୍ଥିତିରେ ବିଜେଡିର ଦୁଇ ନେତା ନାମାଙ୍କନ ଭରିଛନ୍ତି । ଶୁଭାଶିଷଙ୍କ ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପ୍ରସ୍ତାବକ ଥିବା ବେଳେ ଦେବାଶିଷଙ୍କ ପାଇଁ ପ୍ରସ୍ତାବକ ରହିଛନ୍ତି ମନୋହର ରନ୍ଧାରୀ ।  ତେବେ ଉଭୟ ନେତାଙ୍କ ନାମାଙ୍କନ ସମୟରେ ଦଳର ଅନ୍ୟ ବରିଷ୍ଠ ନେତା ବି ସେଠାରେ ଉପସ୍ଥିତ ରହିଥିଲେ । 

ଦୁଇ ଜଣ ପ୍ରାର୍ଥୀ ନାମାଙ୍କନ ଭରିଥିଲେ ବି ତୃତୀୟ ପ୍ରାର୍ଥୀ ଚୟନ ଲାଗି ଏବେ ବି ଶଙ୍ଖ ଶିବିରରେ ସସପେନ୍ସ ଲାଗି ରହିଛି । ଅଭିଯୋଗ ପ୍ରକୋଷ୍ଠ ଠୁ ନେଇ ବିଭିନ୍ନ ନେତାଙ୍କ ବାସ ଭବନ ଓ ନବୀନ ନିବାସ ପର୍ଯ୍ୟନ୍ତ ସବୁଠି ଘନ ଘନ ବୈଠକ ବସୁଥିଲେ କୌଣସି ନିଷ୍କର୍ସ ବାହାରିପାରୁନାହିଁ । ତେବେ ବିଜେଡି ନେତାଙ୍କ କହିବା କଥା ଠିକ୍ ସମୟରେ ଠିକ୍ ନିଷ୍ପତ୍ତି ନେଇ ବଡ ସରପ୍ରାଇଜ ଦେବେ ନବୀନ ପଟ୍ଟନାୟକ ।   ଏହା ଭିତରେ ଗୋଟିଏ ଆସନ ପାଇଁ ଏବେ ବି ଆଶା ରଖିଛନ୍ତି ପ୍ରତିଶ୍ରୁତି ଦୁଇ ନେତା ପ୍ରସନ୍ନ ପାଟ୍ଟଶାଣୀ ଓ ରମେଶ ଚନ୍ଦ୍ର ଚାଉ ପଟ୍ଟନାୟକ ।

ସେପଟେ ରିଟନିଙ୍ଗ ଅଫିସର କହିଛନ୍ତି ବିଜେଡି ପକ୍ଷରୁ ୪ ସେଟ ଓ ୪ ନିର୍ଦଳିୟ ପ୍ରାର୍ଥୀ ଫର୍ମ ନେଇଛନ୍ତି । ଇସିଆଇଙ୍କ ଗାଇଡ଼ ଲାଇନ ଅନୁସାରେ ସେମାନଙ୍କୁ ରସିଦ ପ୍ରଦାନ କରିଛୁ । ଦୁଇ ଜଣ ନାମାଙ୍କନ ଭରିଥିବା ବେଳେ ୧୫ ତାରିଖ ଶେଷ ଦିନ ରହିଛି । ସରସ୍ୱତୀ ପୂଜା ପାଇଁ ବୁଧବାର ନାମାଙ୍କନ ହେବନାହିଁ । ୧୬ ତାରିଖରେ ଯାଞ୍ଚ କରାଯିବ । 

ଅଧିକ ପଢନ୍ତୁ ଓଡ଼ିଶା ଖବର

ଚର୍ଚ୍ଚା ହେଉଛି ଉଭୟ ଦେବାଶିଷ ଓ ଶୁଭାଶିଷଙ୍କୁ ରାଜ୍ୟସଭା ପଠାଇବା ପଛରେ ରହିଛି ବବିଙ୍କ ଗୋଟି ଚାଳନା । ନିଜ ଭିଣେଇ ତଥା ବିଜେଡି ନେତା ଅରିନ୍ଦମଙ୍କ ରାସ୍ତା ସଫା କରିବା ଲାଗି ବାରବାଟୀରୁ ବେଦଖଲ କରି ଋଶିଙ୍କୁ ରାଜ୍ୟସଭା ପଠାଇଛନ୍ତି ବବି । ସେହିପରି ମହେଶ୍ବରଙ୍କ ଦେହାନ୍ତ ପରେ ପୁଅ ସୁନିଲଙ୍କ ବଦଳରେ ଶୁଭାଶିଷଙ୍କୁ ଟିକେଟ ମିଳିବା ଆଶା କ୍ଷିଣ ଥିଲା । ତେଣୁ ନିଜ ଗୋଷ୍ଠୀର ପିଲା ଶୁଭାଶିଷଙ୍କୁ ରାଜ୍ୟସଭା ପଠାଇବାର ଯୋଜନା ବି କାଳେ ବବିଙ୍କର ବୋଲି ବିଜେଡି ଅନ୍ଦର ମହଲରେ ଚର୍ଚ୍ଚା ଜୋର ଧରିଛି ।